《我，就係踩單車跌落渠果個肥仔》: 1

我呢就叫做肥冬，而全名係林逸冬，今年讀中五，十八歲。

只不過係中二開始一個唔小心肥左少少，就比一班兄弟賜姓為肥。

對我黎講無AV睇果時呢就係日頭，播緊宇都宮果陣呢就係夜晚。

而我亦都深信
『你的樣子如何，你的日子也必如何。』

講番我點解會變成一個肥仔，其實係有原因既！



想當年我中一中二可以話係青靚白淨，好有潛質大個左搵女人錢。

但係自從中二暑假我向同班既呀汶表白失敗之後，我就開始左墮落。

呀汶同我係小學同學，小一至小六都同班，六年以來起碼有一半時間都係一齊坐。

於是順理成章，性格溫柔文靜而又生得有好似高登女神蔣雅文既佢，俘虜左我呢個小毒撚既心。

雖然咁多年黎同佢講野唔超過二十次。



但唔係講笑，睇住當年可愛天真既女同學成為婷婷玉立既女神，我真係無曬抵抗力。

仲記得中二果陣我精心打扮，著住對當年潮牌con屎，跑去同佢表白！

佢一見到我，二話不說就灑手擰頭拒絕左我。

老實講，我到而家都仲未知死因係咩，明明我對con屎同我個髮型襯到絕一絕。

於是我成個暑假就留左係屋企過住暴飲暴食既生活。



到左中三番學果陣，無人認得我。

就係咁又過左兩年，其實我情傷唔係話太嚴重，但係減肥就減極都減唔到。

於是就成為左大家口中既肥冬。

至於呀汶，隨左變得愈來愈靚之外，我對佢已經係一無所知。

因為呢幾年我一見到佢就連頭都唔敢點，野都唔敢講就另轉身走。

不過可幸既係中三我同佢就唔同左班，而我都識左好多新朋友。

例如呀晨，一個音樂型既男仔；同埋呀洪，一個好有義氣既搞gag能手。



我地三個無咩共同興趣，因為只要有一個人想做，另外兩個一定會捨身相陪。

而就係中四暑假最後果日，我地三個約好去踩單車。

唔好睇我肥，我踩單車都可以話係出神入化，架架單車係我跨下都會變成韋駄天翔。

你都咪話唔勁！

而我估都估唔到，今次踩單車活動，改變左我一生。