《我，就係踩單車跌落渠果個肥仔》: 16

終於又到星期一。

「番黎拿肥冬～」見到呀雪既笑容真係令心情都好左幾分。

「係呀，妳今日咁早既？」

「不嬲都係咁早架啦我！」

「都唔知邊個李曉雪上星期五先遲大到。」



「車！你都唔係早我好多姐～～記唔記得上個星期應承我咩呀？」

「記得…」唉估唔到佢黎真？不過都係既，為左人地又變靚又減肥咁。

「咁幾時呀？」佢對果位呀俊真係好上心。

「今日放學啦。」

「但係我地點知一定會撞到佢喎？」



「我有辦法啦…」其實我根本笑唔出，不過我相信佢已經唔會察覺到我。

因為我感覺到，以前同我稱兄道弟，講好老左就結婚既呀雪已經唔係到喇…

至於點令佢地撞到？當然係偶遇啦！唉又要召喚VENUS…

「喂粗口妹，有無可能係特定時間偶遇架？」

「可以，兩點積分。」可能係察覺到我心情唔係太好，粗口妹都唔講粗口住。



「唔該。」

於是我用左兩點積分換左偶遇。

基本上我唔認識呀俊，所以見到面都唔會打招呼，無得輸！

「一陣妳行過去佢度扮跌野就得啦。」

「肥冬你真係覺得我應該去追呀俊？」

緊係唔覺得啦……

「緊係啦如果唔係你呢幾個月既努力咪白費曬囉……」

「哦……我好緊張呀肥冬，唔知佢認唔認得我呢？」



屌，我都唔認得妳啦，妳係咪傻撚左呀。

「唔洗緊張！妳係靚女黎架！比Ｄ靚女既衰格出黎！收佢兵就得喇！」

「妖，咩野收兵喎。」

「黎喇佢黎喇，妳行啦」我一手推左呀雪出去走廊。

我用眼神示呀雪行前幾步。

佢回頭望一望我好似有Ｄ遲疑咁，有無咁緊張呀？

於是我就比左個好有信心而堅定既眼神佢！



點知呀雪一行到埋去個呀俊度，都未扮跌野，個呀俊已經出聲。

「咦同學，妳係咪我地學校今年既中五新生呀？之前未見過妳既？」

心諗無啦啦新咩野生呀，你又知佢中五？

「下…我…我唔係呀。」好心妳就唔好女神樣毒撚心啦。

「係？妳叫咩名呀？我叫做陳俊逸呀，妳叫我呀俊就得喇～」呀俊伸出手。

「我叫做李曉雪呀…」

「妳個名又幾好聽喎。」

哇屌你高手黎既，講既野咁有違和感，都仲可以表現得完全無違和感。



望住眼前既呀雪同呀俊開始左傾計，而呀雪都好似唔記得左我就係旁邊陪住佢。

唔知點解我個心有少少痛，但係見到呀雪咁主動咁好笑容。

我覺得都係值得。

所以我自己一個人安靜咁離開。