[教畜]私補通常都會補上床: 1.15
我們沿著車站內的通道走到另一個出口。在外面的欄杆坐著。
「個奶茶仔咩料？」Samson 問。
「之前都聽Charlotte 提過，係佢既同事黎。」
「唔似同事咁簡單喎。」
「唔知呢，都唔關我事架啦。」我把視線望向遠方。
「頭先個Polly 話我聽佢地成日都出街。」Samson 一手拿著奶茶，一手拿著手機。
「係咩。」
「奶茶仔仲成日係Charlotte 背後讚佢，話佢好正。」
「咁Charlotte 係幾正既。」我說。
「奶茶仔話要"焯"硬佢。」Samson 說。
「咁有信心？」
「你無咩感覺架咩？」Samson 問。
「我可以有咩感覺？」
「即係你知道個MK仔將Charlotte 追到手都無感覺架？」
為免日後難堪，我早就把Charlotte 當成好學生，或是妹妹一樣看待。得到她與否，我根本毫不介意。如果奶茶仔是個盡責的男朋友，我覺得Charlotte 倒可以試一試。
「我唔知呀......」
「Sony，你睇。」Samson 把手機拿給我看。
屏幕上顯示著Instagram 的畫面。畫面中有一張相，相中是垂著頭玩手機的Charlotte 。發貼人是xxxMilkteajai000。應該就是奶茶仔的帳號吧。我看一看留言，內心一沉，眼睛張得更大。
xxxMilkteajai000：一個月快樂！！！
charlotteeee0211：頂你sosad！
katykatyxD666：wow ＠charlotteeee0211咁快一個月
「有咩感覺呀Sony 哥哥，自己個好學生終於有拖拍，係咪好戥佢高興。」Samson 問。
「係。」
「Charlotte 日日都可以返工見到佢老公奶茶仔，兩個人好開心咁，一路微笑望實對方，一路沖奶茶。」Samson 說。
「嗯。」
「佢地係呢個假期會成日都出街睇戲，然後係戲院裡面，奶茶仔會攬到Charlotte 實一實。」
「正常呀。」
「跟住佢地會一齊食晚飯，你一啖，我一啖。食飽左之後奶茶仔就會拖住Charlotte ，送Charlotte 返屋企，Charlotte 會笑得好甜咁同佢講掰掰。」
「嗯。」
「Charlotte 仲有成半年先返學，佢地會一齊儲錢，然後夾定假期，可能去台灣，可能去日本。」
「唔出奇丫。」
「然後係旅遊既時候，Charlotte 會發現自己真係好鍾意奶茶仔。係酒店入面，佢地會攬緊對方......」Samson 繼續說。
「喂，兒童不宜喎。」我苦笑著說。
「Charlotte 望實奶茶仔，心諗，從來都無人對自己咁好，所以無論奶茶仔要點都好，Charlotte 都唔會拒絕。」Samson 說得好像親歷其境一樣。
「喂，Samson ......」
「奶茶仔會攬實Charlotte ，然後錫佢，摸佢。果晚，Charlotte 會一直甜笑住，將自己最重要既野比左佢......」
「Samson ......」
「就算會有少少痛，但係Charlotte 因為深愛奶茶仔，佢會忍住痛，含淚微笑望實奶茶仔。然後嗌佢一聲老公仔......」
「我求下你，唔好再講啦......嗚......」鼻子一酸，眼淚如雨般滾到臉上。
本來以為自己可以忍著不哭。但Samson 說得實在太過寫實，我腦海也跟隨了他所說的去想像著。
「頭先Charlotte 望住奶茶仔個表情同眼神，我從來都未見過......」
「我真係好掛住Charlotte ，我真係好鍾意Charlotte 。我好鍾意你呀Charlotte ......但係我有咩辦法呀......我好愛佢呀......」我說。
「我好鍾意佢專心緊個樣，好鍾意佢有骨氣又有志氣......我鍾意佢所有野阿......」
我放聲嚎哭。想停，也停不了。淚腺像氾濫一樣，不停湧出眼淚。Samson 每說一句，便有如一重拳直接打在我心坎上。那種感覺，鐵定不是老師看到自己學生與人交往而送上祝福的感覺。
剛才光想像到Charlotte 的手要牽著別人的手，已經過得很不好受。然後想到他們交往將會發生的種種點點滴滴，種種甜蜜趣事。心就好像有一把刀狠狠地插了進來，實在痛得厲害。
我恨為什麼男主角不是我？為什麼牽她手的不是我？為什麼給Charlotte 幸福的人不是我？我明明為你付出那麼多，為什麼傷心的會是我？
我涰泣了一會，淚也流乾了。用手袖抹走眼淚。
剛想說話，沒想到一張開口，淚又湧出來了，完全不能表達自己。Samson 的紙巾也被我用光了，我一個大男人在街上大哭大喊，還不停用衣袖抹眼淚，像個小孩似的。
「我想......返屋企。」我的氣管還在抽搐著，手還緊握著一張濕透了的紙巾。
「我幫你截的士。」
Samson 陪我走到馬路旁截的士。在上車前，他對我說：「我都曾經同你一樣，傷過，痛過。有D 野你無把握到，到失去左既時候先後悔就太遲。希望你下次可以把握機會。有咩需要隨時Call 我。」我點點頭。
看著車外的掠過的景物，我反覆問自己，真的錯過了嗎？為什麼不早一點認清自己的心意？不過就算我知道自己是喜歡Charlotte 的，那又如何？Charlotte 還是會遇上奶茶仔，還是會為奶茶仔傾心。