《妳做咩將成碗譚仔倒落我個頭上面！？》: 第零章

喂大家好！我叫阿珞，175 CM高。
 
我老母成日都會係班親戚面前話 : 「你睇下我個仔，係咪越大個就越似沈震軒呢？」
 
嗯……我諗班叔伯姑嗲應該無我媽咁IN，所以每次都只會回應話 : 「又幾似WO！」不過我自問，其實某程度上又真係幾似既。
 
但只不過係食肥左少少、個肚腩大左少少、塊面俾人打腫左少少、對眼去整大左少少既沈震軒囉。
 
我宜家就讀緊觀塘區某間BAND 1中學既中四級。
 


啊？成績方面？如果你係要我講既話，我只可以答你，我最強既主修科目係數學，每次考試都有3成幾既。
 
        啊？你好懷疑我點解咁都入到呢D高水平既中學？唔好玩啦，你估你讀個間中學係咩Banding，裡面既學生就真係全部都係呢個Banding咩。每一間BAND 1中學裡面，總要有一班唔讀書既BAND 3學生黎墊個班「高材生」底，亦即係我。
 
        其實我唔係因為唔聰明所以讀唔成書，只係覺得讀書好悶姐。我相信係依家既香港裡面，一定存在住好多同我一模一樣既學生 : 平時上堂就梗係發夢仲多過聽書，將D心機放晒落D無謂野到------比如話點樣係堂上訓覺唔俾人發現、抄功課要抄幾多 % 先唔俾老師發現、點樣扮家長打俾學校請病假、又或者係布里茨點樣先Q得中對手等等。
 
        你話我唔生性？咁你就錯！我依家中四讀緊既視覺藝術科同地理科，就係我發奮既最好證明。
 
        想當年中三尾，班上面個個同學都為左自己未來既選修科目努力溫習。以前小息大家打打鬧鬧既畫面，係個中三年尾大考之前，都變左做一個個埋頭苦幹既書生。
 


        仲記得個陣，我好快都俾呢種風氣感染左，小息個陣竟然都會不自覺咁攞起本書黎溫！結果個一次既大考，我一野爬左上全級30名，可以揀到自己中意既科目讀。
 
        之後？無喇，任務完成左囉，仲讀書黎做咩！不過咁，上Arts既時候我都會好俾心機聽書，成績亦都長期名列前茅。
 
我咁愛藝術既原因，可能係因為自己仲係細蚊仔個時，屋企裡面老豆老母每一日都會上演「六國大封相」，搞到家嘈屋閉。我唔想再俾佢地D私人恩怨煩親，咪惟有閂埋房門，自己同自己玩。
 
無兄弟姊妹就係咁架喇，好出奇呀？
 
        不過細細個唔會有電腦打，又無手機玩，無理由自己同自己玩煮飯仔下話？結果，咪攞起支蠟筆，牆啊書櫃啊周圍亂畫一通。
 


所謂錯有錯著，雖然我呢個行為換黎無數次俾老豆老母打，但係亦都漸漸將我藝術材能發掘左出黎。老豆老母好快都見到我既天份，所以都重點幫我培育------國畫班、寫生素描班、油畫班、立體作品製作班等等，基本上無一樣未玩過，無一樣唔精通。
 
        到中一開始，老豆老母開始比我參加一D藝術比賽------由社區中心搞既低能書法比賽，去到地區性畫畫比賽，再去到全港既大型國際藝術比賽。雖然我最犀利個次都只係係國際比賽攞左個季軍，但係我每一次既比賽，我都好開心，好開心。
 
        因為每一次比賽既時間，就係老豆老母再唔嘈交、笑得最開心，睇起上黎最似一個家庭既時間。
 
        不過，從中四起，我再無參加咩班、再無參加咩比賽。
 
        因為我開心既原因已經失去左。
 







        『單親的日子，是否就像只穿起了一隻鞋子般，很難行？』
        『對。但路還是必須要走。』