《妳做咩將成碗譚仔倒落我個頭上面！？》: 第二章
仲好記得第一眼係中三廣州交流團見到阿娜個陣，我已經俾佢深深吸引住------秀麗既長髮紮成一條馬尾、黑而濃密的既眼睫毛將佢個對皎潔既雙眼無限昇華、五官端正而且擁有33、24、33 ( 目測 )完美身材，加上165CM身高，令佢擁有一對長美腿。真係J到下世紀。
當然啦我唔係個D咁膚淺淨係睇樣既人！雖然佢既外貌已經係贏左人地九條街，但係心地同性格唔得既話，幾靚都無用！
無錯！所以個陣我決定去認識佢，試下佢咩新鮮蘿蔔皮！
「講就天下淫極，做就碌鳩無力」……叫我畫畫就叻姐，去識女仔R話題啊叫我點做呀！！雖然係學校我都算幾出名 (因為我參加好多藝術比賽攞獎)，但其實我都只係平凡書生一個，平時都係對住蛋撻呢個老死先敢放開個人黎講野架咋！
結果，成個交流團我都無搵過阿娜傾計。除左成組人影相食飯之外，我只可以靜靜咁望住佢同其他男生傾計、睇住佢同朋友傾到嘻哈大笑。
好快，就到左交流團最後一個午餐。食完之後大家就會番翻去香港。
天啊！我連一句野都無同阿娜講過，連佢個名都係靠問佢D朋友先知咋！試問佢又點會對我有印象先得架，更加莫講話番到學校之後會繼續聯絡……
「咁多位同學，呢一餐既餸全部都係著名既廣州菜色，希望大家能夠……」我地帶隊既老師好似開左水喉咁，十幾分鐘內唔斷氣介紹晒今日既菜色。但其實佢講左D咩我已經唔係好記得，只係記得佢最後個句 : 「事不宜遲喇大家起筷！」
「唉，毒撚又點會識到女神先得架……」我抬起頭望一望圓桌席上坐我對面既阿娜，諗起呢餐之後我地就會變番陌路人 (痴線都無認識過)……
「唉，」我灰過舊磚咁攞起筷子，求其夾左舊青瓜黎食。
正所謂「皇天不負我鳩痕」。唔知道上天係咪聽到我既心願，居然係最後一日眷顧我！！！不過……幫我既方法……我覺得仲可以斯文少少。
「……」當我將呢舊又白又滑既青瓜放入口時，佢個種辛速既味道即刻源源不絕咁諷刺住我既味蕾，令到我根本出唔到聲，完全屈拜係呢件青瓜既石榴裙之下。
「生命滿希望，前路由我創！」試問我司徒珞點會俾區區一舊青瓜征服！我本能反應之下一野吐左佢出黎，然後用手撥風入個口到。
「好辣呀！！！」點知，呢句說話竟然唔係出自我口中，而係坐對面既阿娜！佢企左係身，伸左條脷出黎仲用手同樣做出一個撥涼既動作。
雖然我都唔係好明撥d風入個口對解辣有咩幫助，但係望住阿娜做呢一下動作個時既可愛表情，再加上我地做既動作一模一樣，真係當堂無晒所有辣味，得番d甜。
就係佢最無助、身邊既人都只係得個睇字既時候，我同佢既視線居然接上左。佢個個楚楚可憐既眼神，簡直令我想上佢……想上前幫助佢。我飛快咁將袋裡面老母格硬塞入黎既水樽攞出黎，然後跑過去俾阿娜飲。
「我呢樽水黎架。如果你唔介意……」我都仲未講話怕佢飲我口水尾，佢就已經一手搶左黎飲。
嘩，今次發達囉，呢個水樽成世唔洗洗囉！
「呼……」阿娜隊晒成杯水之後，稍為舒服番d咁對住我尷尬地講 : 「唔好意思啊，飲晒你成支水……一係咁啦，我一陣間幫你斟番，好無！？」
「啊……好……」係呢三日兩夜裡面，今次係我最接近咁望住阿娜既一次。雖然只係普通朋友既距離，但係已經足以令我口都塞埋、雙頰發燙！
我嘗試將心裡面，好想以後係學校都可以同佢傾計既想法講俾佢知 : 「但係……我比較中意學校d水……不如你番到去先斟俾我，好無？」
屌，我係到UP乜鳩。咁樣同MK仔溝女有咩分別，一定有壞印象啦唉……
「哈哈哈！」阿娜突然笑起出黎，展現出佢個雙迷人既酒窩。
係喇係喇！！！我終於知佢似邊個喇！！！就係……陳法拉！仲要係衝上雲宵既純品Holiday版本！
阿娜笑完之後，對住我講 : 「借D二問我抄牌既人我就見得多，但係連我個名都唔知就叫我斟水既人我第一次見！」
「梗係唔係啦我識你架！」我即刻為自己反駁 : 「你叫阿娜麻，我問你D朋友知道架！」
屌！我又UP緊D乜野……阿娜實覺得我似痴漢啦……
「嘩！原來有變態佬WO……」雖然阿娜口裡面講既說話好似鬧緊我，但係個樣又笑得好開心咁，完全睇唔透。
「不過呢……」阿娜遞番個水樽俾我 : 「其實你可以直接問我架麻，阿‧珞！」
嗚啊！！！佢竟然識我！！！
「你識我！？」我接番住個水樽，驚訝咁望住佢。
「咁就梗係啦。國際西洋畫比賽季軍WO，好難唔識你姐，司‧徒‧珞‧先‧生！」阿娜稍為哄前個身，雙手放係背後，臉上面既酒窩烘托起迷人既小彎月。佢就好似青春偶像劇上既女主角咁，個樣好純好動人。
就係咁，由個日開始，佢既笑容成為左我一世追逐既目標。
由個日開始，每一個上學天就係我最期待既時間。
由個日開始，我開始同佢傾計、出街、熟再到密。
而由今日開始，我更希望能夠與妳在「密」之前加上「親」。
『看著你笑得燦爛，是我最開心的時間。』
『若你不在我身邊，我再笑也只是腼腆。』