《妳做咩將成碗譚仔倒落我個頭上面！？》: 第七章
*******************************************************************
「呀！！！」
當我以衝鋒21既速度跑落去canteen食早餐既時候，我一轉入去後樓梯，就同一個轉出黎既人撞埋一舊。
「行路睇x住啦！！！！！」我俾佢撞到之後仆低左，手上攞住既散紙包趺左落地下，硬幣散滿一地。
我發出完震撼性既聲音之後望過去，先知原來撞到既係一個女仔！！
「唔……唔好意思……」佢好似俾我撞到好痛咁，手上既書亦都趺晒落地下。
佢一路禁住條腰，一路烏低身執拾地上既物品。
眼前呢個女仔依舊紮住馬尾，但係著住校服既佢又比起便服裝扮多左一分賢淑，更突顯女性既身材。
「王……王妙娜？」當佢一聽到我既說話之後，好驚訝咁抬高頭。
哈哈，果然係王妙娜。
「喂你成碌木咁企左係度望住我做咩！？快d幫手執啦！」阿娜發現左個個係我之後，語氣即該同頭先唔同左。
正啊！！有d威嚴既女仔先最吸引！ ( 利申 : 非M )
「係既遵命！」一個唔小心，將心底裡面當佢係女皇既情感表露左出黎添！
「哈！你係咪撞到腦震盪呀？乜我似係女皇咩？」阿娜笑瞇瞇咁講。
嘩！你又知我真係當你女皇既？唔通呢d就係心有淫閪！？
「似架，不過係一個好論盡、行路唔帶眼既女皇！」我都唔知自己講緊咩lu。
我淨係知道，我好想呢一個同阿娜一齊執物品既畫面，可以無限延長，最好就永遠唔好俾佢停。
好快我地就執好d錢同埋書，我地企番起身之後雙目而視。
「咁……咁我落去先喇！」對上一次咁近望住阿娜就已經係廣州，所以搞到我依家望住佢都仲有d尷尬，好想快d走，但又好唔想走，總之就好撚矛盾。
「咁好啦，遲下再見！」阿娜既笑容幾時都係咁甜。
正當我已經落左半層樓梯個陣，阿娜忽然係上面叫停我。
「阿珞，」咩話！？佢叫我阿珞！！！？嗚啊……
佢舉高左隻右手，手指公同食指頭夾住左一個5蚊。
「你呢個硬幣，就當罰你岩先撞到一個弱質女流既賠償！」佢講完之後，就拋左個5蚊俾我，我即刻用雙手接實左。
「依家就麻煩你落去幫我買包檸檬茶，一陣小息二攞過黎4A班俾我喇！」佢講完之後做左個好可愛既伸脷動作，然後繼續講 : 「呢個係女皇既命令！」
「哈哈哈，小人遵命！」我做出一個紳士鞠躬既動作，然後抬高頭望住佢，彼此雙視而微笑。
就係咁，「遵命」就變左我同佢之間獨特既溝通述語。
***********************************************************************
「阿珞？無事呀麻？」Crystal走埋黎拍一拍我既膊頭。
「……嗯？你講咩話Miss Crystal？」我被佢突如其來的觸碰嚇親。
Miss Crystal由中一開始就已經係我既藝術老師。由於佢帶過我參加好多唔同既公開比賽，又教導過我唔同既畫畫技巧，所以佢既係我既啟蒙老師，又係我既好朋友。
係平時放左學既時間，又或者係補課無咩人既時間，我都會叫佢做Crystal。但係由於Crystal話多人既時候就要俾番d面子佢，所以我上堂個陣循例都會加番句Miss。
「搞咩呀你，神不守舍咁既？叫你以『逃避現實』為題黎畫畫，你畫個5蚊銀出黎做咩！？」Crystal一路講，一路探個頭埋黎鑑定我畫紙上既5蚊銀素描。
老實講如果再我大個少少既話，Crystal一定會係我心目中完美既女朋友對象。
佢雖然已經係呢間書院教左五年藝術科，但其實佢依家都只係得個25歲。加上佢白滑既包包臉同成日傻笑既性格，睇起上黎根本同20歲無分別，故此一路以黎都極受學生歡迎。
「下？……我本身諗住畫個教堂，但係唔知點解一落筆就變左咁。 哈哈哈我諗我未訓醒！」我胡亂咁作左d原因出黎去打發Crystal。
「咁啦，你呢幅畫下次上堂先交俾我啦。」佢將嘴輕輕靠近我右邊耳仔 : 「喂，珞仔，你搞咩呀又分手呀？心不在焉咁wo！」
「唔係啦我諗緊野姐！」我用手遮住個嘴偷偷咁講。
「啊衰仔呀上我堂諗其他野下話！唔洗問啦實係諗囡囡！」Crystal既語氣係到扮嬲咁同我咬耳仔。
「知道知道啦，下次唔敢！」我笑一笑。
「拿，係先好講！我過去攞張新畫紙俾你畫過啦！」佢報以我一個微笑。
喂喂喂事先聲明呀下，我同Crystal只係好到似姊弟既朋友，並無任何雜質！不過咁，可以同一個靚女咁熟，其實都幾開心既。
話時話……我畫個5蚊銀出黎做咩？
「哈，又發神經添……」我雙手準備撕爛呢張畫紙。
「……」
我將畫紙對摺好，然後夾左係畫簿裡面。
***
「咁大家聽日再見啦！Good bye class！」
我執拾好物品，等到課室門口既人流散去之後，先徐徐離開班房。
當我轉出班房既時候，一個衝鋒21咁上下速度既人跑過，同我撞埋一舊。
「嗚呀！！！！！」
各位讀者，係呢到同大家講番聲對唔住。
因為叫出黎個個，係我，哈哈。
如果學黎明所講，衛蘭仲肥過部電單車既話，咁我諗我眼前呢個女仔應該肥過衛蘭。
佢子彈咁快撞埋黎，就好似火影忍者裡面長次既「肉彈戰車」一樣輾過，將我擊飛到兩三米遠。
「屌你……」我被撞飛著地之後，好想即刻企起身屌個肥妹……呀唔係，係鬧個肥妹，但係奈何頭先既衝力太過強大，搞到我滿天星斗，根本連企起身既力都無。
「對唔住啊靚仔，你無事啊麻<3 ？」我依稀見到一個龐大既身影走埋黎扶起我，把聲令到我毛骨悚然。
「得架喇我無事架喇唔該……」我好客氣咁同呢個身影講。
但其實我點會無事先得架！！！我暈到仆街呀！！！
「唔緊要WO靚仔<3 ？你邊班架你咪FORM 4 架，點解我未見過你既 <3 ？」我視線開始回復正常，竟然見到個滿面油脂既四眼肥妹哄到塊面勁埋咁望住我。
雖則有人話唔可以睇死肥妹，將來話唔定會變靚女，身材會超火辣，係潛力股。
我當然就梗係知啦，我自己都係由肥仔變靚仔既！之但係……我都係比較中意已發展既優質股多D。
「欵……我呢就唔係你地個級既……不過我都無咩事架喇……所以我都係走先！」我打側個人慢慢移開，然後向住後樓梯極速狂奔。
「喂靚仔 <3！你D野……」
***
「屌，都痴撚線架！乜我地學校咁多變態架，又栗田又湯麵！」我跑到自己既座位上面，確認無肥妹既蹤影之後終於鬆一口氣。
「乜野栗田湯麵呀，發神經啊你！？」蛋撻走埋黎，一臉不解咁望住我。
我將頭先發生既野同蛋撻講左一次之後，佢笑左勁撚耐。
「咁你咪食左佢囉！反正你都兩星期換一次架啦！咪當玩下肥妹育成遊戲！夠新鮮！！」蛋撻笑到彎晒腰，捲縮成一團。
「屌你啦你食埋我個份！咁油膩既野我妹仔肥食唔落！！不過講起上黎我今日上Arts個陣就真係發神經喇！你知唔知呀，我竟然將阿娜當初拋俾我個個5蚊畫左出黎。唔信我俾你睇喇……」
正當我準備攞出我本畫簿既時候，
屌！岩先唔記得左執番趺左落地下既野，依家全部係樓下……
「仆街……」我即刻擺出個無助樣，對眼變到水汪汪咁同蛋撻講 : 「蛋蛋~~~呢呢呢，我就唔小心漏左D野係樓下三樓個到……咁你無理由想睇住你可憐既珞珞BB豬落去俾肥妹豺狼食撚左架麻~~~所以呢，你不如就幫手落去執番上黎！」
「你都ON 9 既我咁靚仔落到去咪輪到我渣都無得淨！？」蛋撻完全唔受我美男子既呢一套。
經過多番角力之後，我最後成功爭取！
成功爭取到送羊入虎口既機會。
「唉屌又要落番去……」由於小息鐘岩岩響起，所以我急急腳咁跑落去，一黎廢事遲左番去俾老師鬧，二黎廢事再撞到栗田。
「咩話！？」我望住藝術室門口空空如也既地板。
「屌呀！？畫筆畫簿都偷！？乜撚野世界！！！」我崩潰左咁叫左出黎。
「你係咪有病架先生，點解會連咁大本畫簿同咁大個筆袋都可以唔記得拎架呢？」一把甜美而且熟悉既聲音係右邊傳過黎。
我一轉身，琴晚既畫面同今日早會後既女仔身影即刻再次浮現。
「下次唔好咁大頭蝦喇，我幫唔到你Keep住咁多次架！」佢行左埋黎，用我本畫簿輕輕力咁拍左一下落我個頭到。
眼前既芷翹，紮起左ALL BACK馬尾之後將佢完美比例既臉蛋表露無遺。汪汪雙眼配搭白裡透紅既雙頰，再襯托住佢迷人既個對酒窩同一個半月彎既笑容。一句講晒，
好Pure、好True，好撚靚。
或者因為我淨係掛住望住佢既關係，唔記得俾反應佢，所以搞到成個場面都幾dead air下。
「司徒珞先生，你唔好話我聽你唔記得左我係邊個啊？我會嬲架！」芷翹將嘴巴輕輕咁挨近我既左耳，好誘惑咁講 : 「不過咁，話晒你琴晚抽左我成晚水，應該都唔會唔記得既，可？」
我聽完呢句之後，即刻紅都臉晒咁搶走佢手上既畫簿筆袋，然後同佢講 : 「喂！我見你琴晚喊到咁，先唔好意思推開你咋！我……我……我無心抽你水架！」
「哈哈！！！！」芷翹忽然笑起上黎。
佢繼續講 : 「得啦得啦我都唔係想怪你，我想睇下你認唔認得出我姐！照依家呢個情況睇黎……你對我都幾上心！ 嘻嘻！」
佢咁講完次後，雙眼炯炯有神咁望住我。
坦白講，我既心跳隨住見到佢之後，一直不斷咁加速、再加速。
「痴線啦我唔記得晒喇wo！」我裝作一臉不重視既樣子。
「好喇我要番去上堂喇，拜拜。」我拎轉身既時候補充。
「喂，你仲有一樣野未攞wo！」芷翹突然係我背後講出呢一句。
我轉個身望住芷翹，見到佢雙手展示出一張畫紙。
畫紙上面，有一個5蚊銀素描。
「其實你都畫得幾似架wo！」佢伸出左少少個頭，向下望番我張畫紙。
「似唔似都唔關你事啦。」我冷冷咁道出一句，然後行埋去諗住攞番幅畫。
點知當我伸出手既時候，芷翹無啦啦將畫紙放係佢背後。
「你想點呀小姐，俾番我啦！」我沒好氣咁同佢講。
「哈哈！你想攞番都得既，」佢好似裝作思考咁樣，然後笑住同我講 : 「但係你要為琴晚既事賠償！」
「我咪講左囉我琴晚係唔小心……」我都未講完既時候，佢就一句車埋黎。
「咁講到尾，你有無抽我水先？你有無俾我對波壓左十幾分鐘先？！」芷翹講緊既時候，仲係我面前挺胸收腹，將佢對C級波爆出黎。
好啦屌，我輸。
「咁你想我點賠呀小姐，我無錢架，都唔做援交！」我將視線搬開，廢事又話我用念力非禮佢。
「哦……咁就簡單啦，從今日起既每朝早，都要陪我落去canteen，請我飲一包檸檬茶！」佢好開心咁講。
「咩話！？」
「下？我咪話每朝早……」
「唔係呀！我問既係，你話要我請你飲咩話？」
「檸檬茶囉！」
「檸檬茶？」
「係啊，檸檬茶。」
『有時候他對你如此的冷淡，不是因為他不愛你。』
『而是因為他害怕愛上你以後，會不能自拔。』