《妳做咩將成碗譚仔倒落我個頭上面！？》: 信

***********************************************************************
 珞 :         Hello阿珞~！好耐無同你傾計喇，有無掛住我先！係咪好奇怪我無啦啦寄信俾你呢！
 
        其實……我都係遵守番分手個陣既承諾姐！
 
        我諗，你唔會唔記得左下話！？好啦好啦我唔賣關子喇，答案就係……
 
        我終於識左新男朋友喇！！！！
 
        佢叫Sam，係同我一樣由香港移民英國既學生黎架！


 
        我同佢本來係同校唔同班既。點知有一次我經過籃球場既時候，無啦啦有個波飛埋黎打中左我個頭！我即刻覺得勁暈啦所以就坐左係地下。
 
        係呢個時候，有個人行埋黎扶起左我。
 
        但係最估唔到既係，呢個人竟然同我講廣東話！
 
        佢係咁問我有無事，之後就話為左賠償，要請我食飯咁話。
 
        哈哈，之後識落，就知道佢叫阿SAM，係早我一年移民過去既17歲男仔。


 
        再之後啊……都係個D啦，出下街大家傾下計咁~~~！
 
        不過佢份人好幽默架，成日搞到我笑到格格聲！
 
        你啊阿珞！你都要學下令女仔笑先得架！唔可以成日亂發人脾氣！女仔中意既係溫柔同自由呀知唔知道！！！
 
        係BO，都未知你近況添。
 
        你近排點呀？同爹DEE媽咪關係有無慢慢改善呢？記住啊，你呢份人成日都自欺欺人，對自己內心一D都唔坦白既。


 
        但係父母點都得一個架咋，千其唔好俾自己有後悔既機會，盡力咁愛佢地就岩架喇！
 
        就算依家無左我係你身邊，你都要加油呀！好多野將來都要靠自己架喇，再唔可以依賴我！！！
 
        坦白講呀，有時候我覺得做你女朋友，好似要做埋你呀媽個份架，哈哈！
 
        不過咁，我都好衷心咁希望，你會搵到一個合襯、夾得黎既女朋友既！
 
        我黎緊聖誕節會同屋企人番黎香港架！希望到時可以見下你呢個好朋友啦！  
*********************************************************************