【真人真事】當年中七AL，我打左成年天堂二，但我無悔！: 73-D-Day (二)
紅等六個我方既贊助玩家從後猛攻，加上橋前守軍，理想世界被前後夾攻，死傷慘重。
結果，亞丁守城戰，第一波攻防－－
狼來了，全滅。
可愛家族，全滅。
日殺，全滅。
激戰過後，殘破既正門前堆起無數屍體，係屍體上仍然站立既就只剩下紅、紫幽兩個分別用+2000弓及+1000弓既贊助玩家，以及橋上同廣場上兩支半倒既軍旗。
屍體逐漸消失，意味住戰場已經轉移至狼來了及日殺既重生地－－獵人村莊。
點解狼來了明明係守城方，卻要登記做攻城方？其中一個原因，就係為左呢一刻，同佢地一齊死番去獵人村，再戰！
附圖：獵人村地圖
獵人村建立於兩個崖壁上，由南北兩條吊橋連接東西兩崖，東西崖中間係萬丈深淵，而兩崖間就只有西崖有出路，能夠通往亞丁，東崖係一條死路。
「全部聚係西崖守橋，快！」我老早已經換成矮人分身creamyonion，捕係獵人村，向狼來了眾人發號：「只要我地西崖夠多人，佢地既重生點就會係東崖，守住條橋困死佢地係東崖！」
另一邊，係電話上，我同樹講：「紅樹快D準備，隨時到。」
我方人員佔據先機，一早就聚集係西崖，少數係西崖重生既理想世界人員，一重生就被我地圍殺，結果只能係東崖重生。
韓修修係聰明人，一眼就睇穿我既意圖－－又如何？一崖之隔，牆都冇得佢穿。先機已經被我所佔，眼下要突圍就只能衝出吊橋，韓修修就算千萬個不願，亦只能順應我既計謀，立時命人向橋上狂衝。
「塞爆條橋去！」
兩條闊度只能容立兩人既吊橋，就成為狼來了同日殺兩盟殊死搏鬥既競技場。
兩軍向橋上衝鋒，係橋中間打頭陣既不停戰死，但後方卻又不停輸入人員，就如同兩道牆互相擠壓，根本分唔出高下。韓信恃住自己打不死，衝到橋中間不停攻擊，卻始終衝唔過人牆，係南橋中心硬生生停住，串步不能移，只能猛力揮劍。
橋上雖然不停有人死，但係攻城戰下系統會自動分開各盟盟員既重生點，結果狼來了不停係西崖復活，日殺就不停係東涯復活，一復活又即刻往橋衝成為新既人牆，無限loop，戰事膠著，橋上互衝明顯係一場死局。
爭持良久，小綠一直係橋上既人群中，作為近戰，佢打唔到人，人地又打唔到佢，但同時卻連郁都郁唔到，無事可做，唯有係同盟頻抱怨：「咁打法打到聽朝都未完。」
小綠既抱怨冇錯，兩條陝窄既條橋上，唔用贊助武器根本就突破唔到，打落去既話真係可以打到聽朝。呢個係我精心策劃既一場死局，目的就係想咁，拖延時間，拖到攻城戰結束。但呢一點我知道、小綠知道、韓信知道、韓修修亦都知道，所有人都心知肚明。
所以佢地必然會想辦法另尋出路。
紅忽然係電話上同我講：「擺好晒陣。」
一切已經準備好，我就企係西崖武器店上既屋頂，用creamonion大叫：「睇怕你地都係衝唔過橋，乖乖地係橋上鬥到完場吧。」
面對挑釁，韓修修當機立斷，給出既反應，係自殺－－兩條橋上東邊既人牆，突然內鬥互毆，自己打自己，一瞬間就死左一大群。
我命令：「唔好衝過去，留係橋上。」
觀察數秒，橋上既屍體一直消失，卻冇人係東崖重生，我再發號：「番亞丁罷。」
轉頭又係電話上回答紅：「黎喇。」
我百份百肯定，日殺已經決定死番去佢地既位於奇岩既盟屋。
亞丁離奇岩十萬九千里咁遠，但係選擇係奇岩重生，總好過困係獵人村，係明智選擇，亦係唯一既選擇。但係一旦番左去奇岩，如果要入番去亞丁地區，除非佢地行路，否則用守門人npc傳送就一定要先傳去歐瑞城呢個必經之城。
但係佢地萬萬估唔到，紅樹聯同薰等一眾屬"星空物語"既人員，早已經埋伏係歐瑞城傳送點。
紅負責贊助部隊，樹負責星空物語，我負責其他+100+20玩家，其他人只知道自己負責既任務同目的，重點係紅樹葉三人係用電話溝通，韓修修就算插幾多支針係我盟都冇可能睇透我整場佈局。
唔洗一陣，樹就係電話報告：「到左，殺緊。」
樹率領既星空物語眾人，加上紅既六人贊助部隊，為數一共廿人左右。星空物語入面大部份都係紅樹葉既人，地獄、風聲鶴唳、小愛等都在其中，全部都用當日補刀用既分身。佢地由戰神同韓修修開戰以黎就一直同日殺打盟戰，直到今日都未有任何一方宣佈投降，所以唔洗登記攻城都一樣可以大斬特斬。
十數人捕係歐瑞城既傳送點，戰鬥力絕對唔可以當係十數人而論。
因為捕傳送點係一件好仆街既戰略－－一個城只得一個傳送點，無論有幾多人同時傳過黎都好，全部都會重壘係果一點上面。十數人不停對果點放範圍技，簡直遇神殺神遇佛殺佛，冇人可以留低－－除左韓信－－就連神佛都可以丟那媽頂硬上既韓信！！一傳送過黎就受魔法狂轟，但係受巴列斯介指既加持居然唔死，仲立時攻向最有威脅既紅！
「咪走呀紅番黎！！」樹大叫。
「痴線佢追住我呀！」紅都大叫。
我塔句爹，樹卻又同時答話，結果冇人聽得明：「千咪五拖劍佢打走你等五巫百師防團你圍驚爆鬼佢咩……」
紅：「咩呀講多次？？」
我決定收聲等歐瑞城既兩位人士自行溝通。
樹怒道：「屌你咋咋臨拖佢番黎傳送點！」
紅反叫：「係北門呀快過黎！」
紅vs韓信，我心入面模擬緊呢場戰鬥既結果。韓信作為騎士，防又高又有禦箭術，紅把+2000弓完全冇作為。但係紅全身+500甲都唔係講笑，韓信一把+1500單手劍，騎士又冇乜攻擊招，加上韓信唔夠紅跑得快，韓信一樣殺唔死紅。結果最強矛隻抽最強盾，就係一個係咁跑一個係咁追。
「樹過黎未呀北門呀！」
「屌soso仲係到打靚！」
「我就死喇！」
紅一直係電話入面亂叫，歐瑞既戰況可想而知。
封鎖傳送點只能夠封鎖一時。係傳送點死亡後，日殺既人員就可以選擇係歐瑞城鎮重生，而重生點唔似傳送點得一個，係有好多過，封鎖難度大增，所以更有效既方法係封住傳送點及城門－－幸歐瑞只有兩個門。
呢一刻，韓信正係北門以一敵眾、樹仍然係城東傳送點屠殺傳送黎既日殺軍隊，西門有soso防守緊，整個歐瑞城鎮都陷入戰火中。
相反，呢場戰爭既主戰場亞丁城堡卻一片寂寥。可愛家族一大堆人，面對空曠既廣場發呆，冇野做，等運到。當然，留守亞丁，代表可夢風同盟既可愛家族，本來就唔係用黎守城，佢地只係一道肉盾、贊助武器防護罩。
我係亞丁之顛，望住番緊黎既狼來了大軍，問樹：「歐瑞淪陷未？」
樹作一個簡短報告：「西門已破，唔少人衝左出去，紅追緊，你睇路。」
「唔好戀戰歐瑞，飛象牙塔沿路設伏拖住佢。」
拖，一字記之約，拖。
先係廣場，再係獵人村，然後到歐瑞，已經拖延接近一小時。只要拖多一個鐘，我地就係勝利者。
「咁而家韓信班贊助係邊？」
樹答：「唔知，紅追緊。」
紅答：「唔知，追落山之後唔見左。」
「紅係邊？」
紅：「象牙塔附近野戰ing。」
「已經打到去象牙塔？贊助隊自殺死番黎先，唔好打。」
紅：「屠殺緊人喎！」
「你係主力唔好浪費，番黎準備防守，樹打野戰就得。」
贊助部隊雖然只有六人，但毫無疑問絕對係我軍主力。面對韓修修、光頭、韓信、亞格斯、蒼日五個贊助，每人都係一打十既料，用普通玩家攻略簡直係浪費，紅等人先係最直接有效既打擊方法，我唔想佢地突然出現係封引室既時候我地冇任何應對。
樹係象牙塔往亞丁既小路一直抽水，但日殺人數多，野外地又大，日殺眾人分散行軍，樹根本阻礙唔到。
更令我困惑既係樹既報告：「沿途都唔見韓修修班人。」
由衝出歐瑞開始就消失，呢批贊助玩家先係最危險既一批。我用係封印室既Γπ，係血盟頻向已經回歸既狼來了發號：「穿牆全部入黎封印室守住。」
又用Σα密暗殺同煌：「隱身出外探索下。」
時間不斷過去，日殺早已聚集係亞丁城鎮既交易區，即係整個亞丁入面唯一既安全區。呢一刻城牆上有紅既贊助部隊，城前廣場有可愛家族，封印室有狼來了，亞丁鎮內有星空物語，亞丁之顛有我Σα，野外四周有兩隻斥侯探索，但竟然完全冇人見到韓信、韓修修等人既身影。
附圖：亞丁地區地圖