趁大家仲討論緊邊個plan好既時間,我地紅樹葉三個人一粒聲都冇出--我地對緊iplist,下放宣戰權。

最終民意歸向係樹plan,係"象牙塔"跑過去。

"象牙塔"到"亞丁鎮"係一段大直路,由於兩點之間可以用npc傳送師傳送,所以呢條路平時好少人行,唯一比較人多既就係中間既"傲慢之塔",不過呢個鐘數d人通常都聚係塔內埋首打怪,地面都係冇乜人。

一路上無驚無險,大隊好快就跑到去亞丁山下。

樹:「大家記住,目的係宣戰,而家所有人都有宣戰權,任何人宣完戰就立即按巨集通知,然後所有人立即747*!」





(*747係遊戲俗語,意即閃人)

說罷,大伙兒就散開,圍住亞丁山,從四方八面殺上!

亞丁鎮主要分成內外兩層,四四方方,建係斜坡上。內層從南至北由下至上就係交易區、大廣場及大教堂,外層就係一個個盟屋,以及各種任務npc。內外層中間有水河圍繞,由小橋相接,外層最上方就直接連接亞丁城堡既大廣場,而宣戰npc就企係外層北門。

紅同我既火星人部隊衝係最前,用最快速度,直接從亞丁鎮南方穿牆上山,最先踏入亞丁鎮南門既就係我Σα。一入門口,立即左轉往外層通道直走,再右轉上斜坡,再右轉……

「一個人都冇喎?」





紅都奇岩:「唔會咁白痴聚晒係內層掛?」

一路走,一路走,我同紅走到宣戰npc面前,卻有一個玩家企係旁邊,只有佢一個人。

灰黑既皮膚、雪白既頭髮、暗紅既黑珠,身穿與之反差極大,銀白至反光既一整套王朝重甲,以及左手一把閃耀白光既伊克魯斯弓。

頭上顯示既名字,只有兩個字:「輸贏」

我心裡一陣激動!!





其他人都陸陸續續到場,見到呢個情景,大家都你眼望我眼,莫名奇妙。本來所有人都打算開戰,結果一個人都冇,亞丁外層成個死城一樣,唯一一個生勾勾既,居然係消失左好耐,江湖傳聞既所謂「工作人員」。

一時之間,腦海裡一大堆問題,卻唔知問邊樣好,我巴不得可以用心電感應一次過俾佢知道我所有問題:「其他人呢?你唔係冇玩既咩?你去左邊?點解會出現?gm有冇收到我pm?你是友是敵?……」卻一句都問唔出。

到頭來,係輸贏,亦即係戰神,最先出聲,佢同我地一大班人打左個招呼:「安安。」

紅問:「你係到做乜?」

戰神懶懶閒地回答:「宣戰囉,就夠鐘。」

我一下醒悟,立即跑過去宣番個靚戰先。

紅又再問:「班友呢?」

「趕走晒。成堆人棟住唔俾人宣戰,邊有咁既規矩。」戰神答完,立即捉住紅:「咁耐冇見,打場吧!」





然後兩人就開始決鬥。

然後其他人就散既散走既走。

然後我電話就響起,係樹。

樹:「冇可能咁岩係呢個時候出現。早唔出遲唔出,就係暗殺敗露我地跑過黎呢段時間出?冇可能。」

「我都係咁諗,而且佢而家擺到明借打交迴避問題。」

樹:「呢個鐘數gm放左工,佢好大可能睇住亞丁發生緊咩事。」

「你意思係,gm特登叫戰神黎清場?」





樹:「好大可能。」

「冇所謂。最緊要搞清楚,戰神到底係咪黎幫手攻城就得。」

我地幾個幹部,就企係到等紅同戰神大戰三百回合。結果理所當然係紅贏,弓手決戰,不嬲都係裝備話事,打黎根本冇意義。

一打完我就搶問:「戰神,你會幫我地攻城係咪?」

戰神回答:「係,有咩大計?」

我就照直講:「um…其實冇,硬打硬,到時先算。」

戰神:「…你應該清楚知道佢地有幾多把武器?」

我當然聽得出戰神既言下之意弦外之音,佢既意思就係「硬打硬,你on9架?憑咩?」





我扮傻答戰神:「唔知,佢地有幾多把?」

戰神反而答番我:「我點知?」

「咁冇計啦。」

然後系統就出現《輸贏要求與你進交易,你是否願意?》

唔知戰神搞乜野,我就按確定睇一睇。

只見戰神除晒衫,放低埋把弓,變成空身,再全部丟晒上交易欄,+1000伊克魯斯弓、+1000伊克魯斯三叉戟、+1000伊克魯斯雙刀、+250王朝頭盔、+250王朝盔甲………系統又出現《輸贏已確定交易。》

一見到系統呢句說話,我都唔廢事睇到底交易欄上有d乜野,立即按左確定交易先,所有野即時到晒我手。





之後戰神先話:「借你。」

我問戰神:「咁聽日你用乜?」

佢卻答我:「少替我擔心,我訓先,聽日見。」

輸贏就咁係我地面對消失左。

以上既對話,全部都係白頻,在場所有人都睇到。戰神除衫,一樣所有人都睇到。但係交易內容,只有我同戰神兩個人知。

戰神一走,紅就係白頻問我:「佢俾晒你?」

「係囉,無啦啦俾晒我,就走左。」

就好似老土武俠小說一樣,無啦啦一個高人現身,唔知點解將畢生精力傳晒俾你,跟住就去左仙遊,留低一個明明冇買六合彩都居然會中頭獎既你係到汒然。

雖然以前攻城時候都有問過戰神借裝,但從來都係我主動問,冇一次係好似今次咁,由戰神主動借。況且,我地以前就話同戰神係好朋友,而家,我都唔知算係咩關係……

戰神既裝備,只有我地幾個幹部一清二楚,其他人,尤其係壬生一族成員其實唔太清楚。見到輸贏變成空身除衫,又話「借我」,兩人又呆企左一陣,之後又問「聽日用乜」,所有人都明白戰神借左身上套裝備俾我,立即追問到底戰神套野係點。

我本來打算直接show晒出黎俾佢地睇,但一諗起美國風……玩完戰神套裝,就買左套+1000……立即疾左一疾,同時間樹既聲音係聽筒響起:

「佢係咪俾晒三套你?唔好show出黎。」

我下意識問左句:「點解?」

「戰神肯定係sell屎,想tum人買武器,呢個係陷阱唔好show!」

「其實,我開始覺得,我地盟多幾個人買多幾把都唔錯。好似忘殘年咁,多一把係到,只要運用得宜,每步都易走好多。」我諗一諗,又反問樹:「一開始你唔係贊成其他人買既咩,點解而家我地兩個立場好似調轉左…」

樹卻答我:「一開始贊成人地買,係因為買完真係有用,對戰事真係會有幫助。而家對面有幾十把,我地買多一兩把根本都冇用,點解要人浪費錢?」

我又諗一諗,樹的確有佢既道理。

其實我好混亂。呢排發生太多事,日打夜打,我已經深陷戰局當中,對戰事反應雖然靈敏,對大勢卻好混亂,根本邊邊是敵邊邊是友我都唔知。

但樹呢句說話我倒心知肚明,的確,而家既情形,多幾把贊助武器其實對戰局冇大影響,就好似你要同李+X鬥,我俾多幾百萬你都冇得鬥。

gm想掠水還想掠水,我係唔會幫佢手。根本係私服賣武器等同呃錢,有人心甘情願比佢呃既話我冇意見,什至樂見共成,但係我絕對唔會幫佢呃人錢。

--原則問題。

呆企一陣,我show左一把+1000弓出黎,就係咁多,其他全部都收埋。

「打俾紅,3line,我要brainstrom下。」

嘟嘟嘟…電話接通,唔等紅講野,我就係電話講:

「分析一下,岩岩戰神俾晒佢三套贊助武防俾我,點解要咁做?」

紅答:「幫我地守城囉。」

樹冇答我,佢直接反駁紅:「多三套同少三套+1000有乜分別?戰神知道理想有幾十件贊助,一定明白三套對戰局根本冇影響。」

紅:「可能佢只係單純想幫得幾多得幾多姐。」

樹又提出反駁,紅又再次回駁……

我無視任何對話,直接搬出理論:「聽我講。assume,戰神既目的就係搵錢。所以佢俾三套武器我,係想好似佢借俾美國風一樣,借我手送試玩板俾人玩。+1000同+100既威力係具大既,俾佢地聽日上埋戰場實戰,就會明白+1000有幾好用,然後好大機會釣到個新買家。合唔合理?有冇漏洞?」

呢個幾乎就係樹既論調,只不過樹冇明言,我就將佢原原本本講出黎,所以唔洗問,樹理所當然覺得合理,我只需要紅既意見。

紅聽完,諗一諗,答:「合理,你呢個都可以成立既,但係你唔可以排除戰神係純粹想幫我地呢個可能性。」

「合理就得。三個合理,呢個就係事實,之後我地照呢個方向推論。」呢個決擇絕對武斷,係純粹主觀,係我選擇左呢個「事實」,唔容許其他意見出現。但當下,我地需要既係一個清晰立場,黎協助推論,如果最終導出矛盾,佢就係一套反證法,如果最終完全合理,我地就只好相信呢個「事實」,跟隨事實行事。

「咁另一個問題就係,如果佢由頭到尾既目的就係要紅樹葉同壬生一族,變成另一個理想世界,幾乎全員幫佢買軍火,戰神一直以黎既行動有冇合唔合理?有冇漏洞?」