【真人真事】當年中七AL，我打左成年天堂二，但我無悔！: 91-最後一場攻城戰 (四)
「我幼稚都係為左回應你無恥！用神武神防做人牆，仲有平衡既咩，我地普通玩家打條毛呀？」
韓修修回應第二句，口吻同樹以前講數幾乎一樣：「我地全部行為都係依照遊戲規則，相反你地又用bug穿牆，又不停人身攻擊，完全違反遊戲規則，我已經影左相，攻城戰完後就會上報gm，談話到此為止，你都係想辦法做下正事罷葉。」
呢班人既忍耐程度，居然同司馬懿不相伯仲。
但我已瞬時諗到妙計！立即轉用英雄頻道回應：
「仆街啦你！你有相難道我冇相？要脅我？攻完城就post？唔洗等攻城呀，你個爛鬼亞丁我唔打喇！而家我就做正事，而家就post相，自己上論壇睇啦，睇下邊個怕邊個！」
然後就立即offline，off晒全部角式。
電話上既紅樹立即就問：「喂你黎真架！？」
呢個簡直係絕佳良機！我一直等緊一個時刻，一個你發完癲，而人地都會覺得「就算發癲都合理」既時刻！係人都知我為左攻城咩都做得出，而家被理想世界咁樣屈法，眼下仲唔係一個發癲既最好時機？
「等係真架啦。」我回答：「而家就post，你地叫盟入面唔好再鬧，扮散band，撤離內廳，叫暗殺隱身睇住，等陣執生。」
打開firefox，好快就click入左私服論壇。
紅仲係電話係咁叫：「扮乜野？即係仲打唔打我唔明喎。」
樹倒冇再講乜野，我知佢明白，佢同我有默契。
「你問樹啦。」
我上論壇，按發表新topic，打上《測試武器鑑定教學，一眼看穿誰拿測武！》……
然後就upload我自己修改左既發光檔，即係本來+100紅光、+200橙光、+500紫光、+700綠光、+1000白光、+1500黃光、+2000粉紅光既發光檔。但係，講到明係修改左，我upload呢個檔，+2000、+1000、+500三個都一樣顯示紅光。
再打幾句說明－－當然唔係說明呢個發光檔係經過修改，係說明呢個發光檔案「本來」應該show咩顏色。
發表。
未幾，就收到韓修修pm，由於翻譯做廣東話會失去神韻，所以原文照錄：「你瘋了嗎！」
我即刻向電話講：「韓修修睇緊論壇，攻攻攻攻攻攻攻，叫紫幽封城！！」
另一邊卻由得韓修修，我又走入貼圖區，將以上內容重新貼一次。
韓修修又再pm：「你咁樣會搞死呢個服！」
我回：「一開始我就諗住爆大獲架啦，係樹禁住我之麻，而家城又攻唔到，我理得你死丫！呀，你最好問下gm睇下有冇水回！談話到此為止，你都係想辦法做下正事罷！」
韓修修仲未察覺我軍攻勢，又或者可能佢一早已經知道，只不過有實力所以懶理。佢再次回覆我pm，我再一次原文照錄：「你這瘋子！」
瘋子？我的確係瘋子。咁樣玩一玩，我心情異常興奮，老老實實，仲興奮過打勝杖。
我冇理會攻城戰到底進行成點，只係專心地周圍貼文。
如無意外，韓修修會搵到gm。
然後gm就會同我對話。
我需要既，就係控制住呢個post，唔俾咁多人知道既同時，又要俾適量人數知道。
如果真係成個server都知道晒，咁「爆大獲」呢件事就唔可能再做談判籌碼，但如果一個人都唔知，gm亦冇乜好驚，一樣冇判談。就如同綁架勒索一樣，一開波就隊林人質，冇人會肯俾錢你，但係你又唔可以完全唔傷害人質，因為你一定要俾對方一個訊息：你收唔到錢真係會隊林佢。
post左幾輪……我一直等……韓修修冇再回我。
然後，換黎既，係gm既pm，gm終於上釣！
攻城戰都未完，gm就pm我：
「你既post我剷左。不過係一個亞丁城堡，葉你有必要擺我上台嗎？」
我丁點兒都唔客氣，一大輪說話車埋去，因為呢一刻我仲"發緊癲"：
「而家唔係我擺你上台！我要爆你大獲萬幾年前就爆你啦係咪先！而家係果個八婆擺緊我上台！全盟龜係封印室守城，咁唔係擺到明同我講『我地大把贊助呀唔守你都打唔過』咩！我地冇贊助既玩家仲點玩呀？由封奇岩又封亞丁，我地盟連城鎮都唔入得，買支箭都要托人買呀！好不容易破左奇岩，佢地又調25%稅，咁仲唔係存心趕我地走？而家有錢買贊助好巴閉咩？洗唔洗玩到咁盡？你gm又話唔參加玩家事務，咁我地紅樹葉幾十人仲可以點做，你教我呢隻game點玩落去丫！」
gm好聲好氣答我：「明白你地情況，所以我一直有叫戰神協助你地呀。」
我真係好嬲又好笑：「戰神？丟低三把+1000叫幫手呀，對面幾多把你清楚過我啦gm哥哥！」
問心，我既說話一d都唔客氣，但係同gm交接過幾次，我心底有數。gm係果種唔會當面發人火既人，何況呢一刻我係"合理發癲"，我既所有行為都係合理，就算再唔客氣，我相信都唔會惹到gm。
gm又答我：「我明白。我會同靜心傾一傾，同意？」
「你係大佬咪你話事囉！佢繼續開戰我一定會還手。」
gm：「你果d發光檔都唔好再post了。」
「我目的達成左仲點會post？」
gm冇再回應，我卻如釋重負。
老老實實，亞丁打唔打到我的確在意，但我更在意，係我走後，到底留番一個點樣既紅樹葉俾下一位接任盟主。我唔想再重蹈覆轍，好似當初交替，隨手就交左個波俾咪嚕，結果乜野準備都冇反而累左佢。
係我走之前，同壬生搞好戰友關係係必要既，兩盟盟必需要互相親近，一齊打一場攻城戰係一個好辦法。
而理想世界，我一直唔知點搞。
不過既然而家一石二鳥，gm話會插手，我亦放心。
呢個moment，gm大概已經捉左韓修修去傾。我問番電話果邊：
紅答我：「攻鬼咩，一開打就番晒黎啦，只係冇左隻霸主，但一樣打唔入！」
原來韓修修用緊霸主。
我上番線，立即問小愛：「有無敵未？」
「有。」
「好，我地最後一波，用無敵陣衝吧。」
眾人卻七嘴八舌，問我post左d乜野，岩岩做乜黎，我只好簡略解釋：
「岩岩係計黎，引佢地上論壇然後我地再攻其不備。但估唔到咁都唔上當……黎啦，時間都冇乜，我地有三個無敵，一口氣打入去吧，直接一開始用無敵衝。」
理想世界依舊龜係封印室。
眾人就係大廳。
「莎莎，火。」
一圈火光立時係身上燃起，大軍隨即衝鋒陷陣，向各門口進攻！
理想世界自然有無敵抵抗。但係第一圈無敵，根本唔需要理會，佢既作用只係讓我軍無損進入封印室。
十五秒過後，薰施起咒術，第二圈無敵立時出現，但估唔到，對面都燃起第二輪火圈！
「紅你又話霸主冇左既？」
「冇左會番黎加麻！」
紅唔知岩岩我先同gm傾完黎。gm話會同韓修修傾，我仲以為韓修修就咁會被帶離戰場，但估唔到仲係到！係已經傾完？定係未傾？定還是gm只係敷衍我？冇時間諗，我命令盟內眾人：
「走位，騎士們盡量埋巫師身！」
大家都係無敵身，正面負面魔法技能通通對大家無效，只能你眼望我眼，各自走位，一時間整個封印室成班人都係到亂跑。
大家都數住秒。
…………夠鐘！
騎士們就立時施放魔法反射盾！理想世界一樣毫不客氣，一見我地火光消失，就係一大群魔法招呼，卻全數被騎士反彈，但反彈至理想世界既無敵身，一樣冇效果。
幾秒後，理想世界無敵消失，一陣混戰再次展開。
斗室、人多，係破壞者既天堂。光頭大放異彩，再一次係左門開無雙。但今次唔同既係，就連華雄、蒼日、創世之神等等+1500、+1000既贊助都聚係呢邊，先前雙互無敵下既一陣亂跑，我居然冇留意呢班精英集團原來佈晒黎一樓左門。
我明白佢地既意圖，用最快速度打兩個字：「小愛！」
太遲。
華雄呢個+1500劍鬥樣唔係省油既燈，隔空狂揮雙刀，一陣陣劍氣斬向後方巫師弓手。打兩個字既時間，佢就係人牆上打出個小洞，一記"疾襲衝擊"閃到小洞前，同時將人牆擊暈，躍到後方大殺廳上既補師，以及最重要既小愛！
小愛終究訓練有素，一發劍氣埋身前，小愛已經自殺死亡－－"崇高自我獻祭"，我軍全員回復hpmp，同時無敵！
理想世界第一次踏出封印室，雖然阻止唔到小愛自我獻祭，但卻打亂晒我地腳步，小愛未施展"團體返生術"就已死，我軍人員要複活就要遂個番生，斗室內亂戰根本唔容許我軍咁做。
十五秒無敵既破解法，理想世界一早就有－－各自立即開啟自身應急技減少傷亡。
無敵只不過係幫我地拖延十五秒。
呢個世界唔會有奇蹟，十五秒後，我地只有死亡呢個結局。
兩小時過去。
面對龜陣，紅既最後一場攻城戰，以戰敗告終。