【真人真事】當年中七AL，我打左成年天堂二，但我無悔！: 94-火龍爭奪戰 (一)
一刀揮過，光頭大罵：「我唔打你你打我？」
「我唔開心，搵你發泄！」我接近無賴地回答：「一係還拖一係番屋企訓覺，唔好咁多爹！」
光頭倒真係唔回話，回頭、彎腰、舉手，大刀就向我斬過黎。
我又用世界頻道喊話：「私人恩怨，插手者死！」
然後就向光頭還擊。
同樣係破壞者，同樣手持巨型大刀，係光頭既+1500伊克魯斯重兵刃下，我手上呢把+100英雄刀無限滅斬，顯得暗淡無光。唔洗十秒，已經被斬成紅血，狂，開唔開都冇乜分別，我默默地揮刀，默默地受斬，等待結束既呼喊聲。
「嗚哇」－－葉一聲呼叫，就訓左係地上，一切都完結。
我望住螢幕上訓係地板既葉，望住光頭行前踩住我，舉起大刀發出勝利既呼聲，望住左下角普道頻道寫住「白痴！憑你把爛刀同我打！」
心裡面丁點兒難受都冇，只係有少少內疚。
望住葉既屍體，忽然間，就有少少內疚。
然後就off左line。
………
良久之後，樹先係msn同我打招呼：「hello?」
「壬生同理想有冇開到戰？」
樹答我：「韓修修同紫幽談判破裂，理想世界已經正式宣佈斷絕兩盟友好關係。」
「所以雨軒就係紫幽？」我問樹。
「嗯。」樹簡潔地回答。
「仲有邊個知佢係紫幽？」
「佢叮囑我地唔好講你聽。」樹冇答我問既問題，卻答左我真正想問既問題，俾左個我真正想要知道既答案。
「good。」good當然唔係指good咁簡單，一個good字，含意萬千，真正意思要隨語境、態度、對象而變。
而樹顯然明白good字既含意，答我：
「我有問過你，你話唔洗同紫幽解釋。」
「係人都知我不嬲唔想拖佢落水。」
「唔係，你係想拖佢落水，只係唔想做拖佢落水果個，所以就一直拖到今日，但係我唔會幫你賣單。」
我服了。
樹同我咁多年兄弟，似乎比我更加了解我自己。
「我只係……唔想欠佢太多。以前係咪嚕幫我執屎，而家又係紫幽幫我執屎。」
樹冇回應我。
雨軒就係紫幽，紫幽就係雨軒，呢個事實，直到第二日我online後，見到紫幽參與戰爭，我先完全相信。
一online，同盟頻道就係一大堆雜亂無章既對話－－
紫幽：「係水入面既飛走，我拉番佢番去。」
小明：「已經回報左俾gm，最多大家都冇得食。」
「乜野大家都冇得食？」我問。
冇人理我。
同盟頻道依舊一片混亂。
紫幽又重覆：「係水入面既先飛，等上面既拉番去！」
大綠：「拉到呢邊要加buff好麻煩。」
「乜野拉左去邊到？」我再問。
終於大綠答我：「火龍。」
香草補一句：「係水入面。」
我仲係一頭冒水。
然後大綠先用全句解釋：「你黎亞丁大圓形競技場，佢地拉左條龍去前門外面！」
紫幽倒冇理我，卻又係世界頻道發多一次同樣既命令：「係水入面既飛走！！全部都唔好打，等我拉番去！水入面既飛走！」
小明卻又同時大叫：「又一個神武黎左！果個"傲笑風雲"用神武一直狂打！」
一片混亂。
我立即飛去"亞丁大圓形競技場"。大圓形競技場浮係"納爾賽湖"上面，東西兩端由橋連接，係全遊戲入面最大型既pk場。而火龍"巴拉卡斯"就被gm放左係競技場既中心，但係一到步，就見到"巴拉卡斯"，唔知點解居然跌左去競技場邊，係納爾賽湖湖底，攻擊唔到任何人！而橋上及水底，就係一眾壬生、理想既盟員係到互打互殺，一時又打下龍，一時又打下玩家。
雖然現場各人分散四周，但理想世界同壬生一族，卻已經開緊戰。
樹一樣係現場，但同盟頻道太亂，我直接打電話問佢：「到底係咩一回事？」
樹用最簡短既文字描述：「理想用bug食龍，紫幽下令搶龍加殺走理想。」
「理想幾多人係到？」依我所見，根本唔多人。
樹都答我：「得一team，但一直黎緊。」
呢場戰鬥發生得好倉猝，事前根本冇人有作戰準備，連隊伍都未分配好。紫幽既命令亦被迅速洗板洗走，根本冇乜人留意到，而且壬生一族好少參加呢種街戰，現場混作一團，所有人都只係各打各，同攻城戰完全係兩回事。
我問樹：「而家任務係乜野？」
「殺晒有份打龍既理想世界，咁紫幽+1000弓就會變成對龍最高傷害果個，條龍就會追住佢。然後我地就可以拉番條龍入競技場，理想世界而家人少擋唔到火龍，到時我地再用霸主搶龍。」
我有少少疑問：「點解唔直接係到食左去？火龍係水打唔到人喎。」
樹答：「因為報左gm！」
紫幽就係橋上，不停對火龍狂射。
另一方面，理想世界卻又不停有人黎打火龍，想拉番走……
而樹、美國風及其他人，卻係另一頭不停屠殺理想世界既人。
漸漸戰場就變成一場扯大攬，火龍就係條攬，一邊有紫幽用力扯，另一邊係理想世界車輪戰。
雖然戰場混亂，毫無章法可言，但樹畢竟訓練有素，由樹帶頭，用發光檔案偵測對火龍最有威脅既玩家，一到射程範圍就圍起殺之。理想世界呢一刻只有少量人，大攬漸漸被紫幽扯過去……
一直向紫幽衝過去，火龍最終卻被橋卡住，根本上唔番黎，更莫論入番去競技場！
我就企係橋上，問樹：「佢地一開始點拖條龍落水？」
「點知佢。」
紫幽企係我旁邊，望實條龍。
火龍身型太大，紫幽企係大圓形競技場正門橋上一直拉，居然將火龍拉左埋去橋底，硬生生卡死左，仲衰過之前！
紫幽係同盟頻話：「我跑番去競技場中心試試拉唔拉得走。」
然後唔理其他人睇唔睇到呢句命令，一個轉身就向門內跑去。
但火龍根本郁都唔郁。
正確黎講，火龍不停係原位震動－－就好似其他設計不良既遊戲一樣，因為object卡死左，郁唔到，就不停係果個位置上下左右震動，只不過咁大條龍震起來，畫面詭異非常，我什至見到火龍個頭就係我橋中心硬生生地突左出黎，兩個3d物件衝阻，居然將龍頭震出橋面！
我心生好奇，跑到龍頭旁，火龍卻怒吼一聲，葉頓時不受控制，不停向競技場內直跑－－雖然火龍被卡死，但能力仍在，剛剛一接近，我就中左一招"巴拉卡斯恐懼"，向反方向直奔。
呢一刻競技場就只有紫幽一人。
我一直向裡面直跑，係白頻向紫幽講左句：「對唔住。」
紫幽回左我一句：「你又走…」
然後，當我仲諗緊點答佢之際，我就走左……巴拉卡斯恐懼效果下，我一直跑，跑左出競技場外。
到我用teleport召喚自己番戰場既時間，火龍巴拉卡斯已經被卡死左係橋上，連震都唔震，突個龍頭出黎亂咁噴火。
而旁邊，就係理想世界一眾神人！由一開始只有一team，到而家已經吹雞到有起碼四team人，共三十幾個，光頭、韓信、蒼日、華雄等全部齊晒，正係到抽火龍水之餘，同壬生一族、紅樹葉混戰。
同搶地龍戰唔同，地龍戰由頭到尾搞事既就只有我地紅樹葉，理想世界係被打一群，一直處於被動，被打完都唔知咩事，而且大部份由頭到尾都堅持打地龍，完全冇還拖。但今次打火龍，係貨真價實既大混戰，火龍就係中間卡實亂放技能，旁邊既雙方卻根本唔在意，不斷係火龍旁邊施殺，打火龍反而成為其次！
但火龍吼一聲，又一次技能大爆發。
煌係同盟頻叫道：「火龍好煩！中左恐懼！」
同時間幾個理想世界正打得火熱既，瞬間就回頭直跑。
蒼日向樹射出"七箭"…韓信衝前一記"猛擊盾"打向小綠…大綠口中諗諗有詞向前方施放"隕石術"…紫幽"鬼刺"連擊數個嘍囉……
中間火龍又噴一下火，不分壬生理想紅樹，所有人都受火傷，地上又多左幾條燒焦既屍體……
如果我剛剛到步既景況叫做混亂，咁呢一刻，大概應該叫做混沌。