【真人真事】當年中七AL，我打左成年天堂二，但我無悔！: 96-憧憬
GM：「我一直都係到，唔係你地叫我黎既咩？」
眾人似乎都忘記左，其實早係開戰前，小明已經就理想世界用bug食火龍，係系統入面call左gm。
GM繼續道：「所以，大家都對理想世界不滿，唔想玩了？」
樹：「嗯，我想搵你傾好耐！」
莎莎：「不滿好耐喇！」
GM：「我建議，各位可以先將account擺係到，去第二個私服玩住先，搵到合適既就係果到玩，真係搵唔到先番黎。」
咁即係咩意思？婉轉咁趕我地走？
紫幽：「其實我一直打算走。只不過係走前可以同你傾下，睇到你有係到管理，都唔錯。」
由我既角度睇，紫幽呢句說話係赤裸裸既諷刺——當然說話既真正意思只有紫幽一個人知道。
樹對GM比較恭敬：「就係覺得呢到好先留係到，所以先想搵你。」
GM：「我咁樣講吧。而家大家在意既係測試武器打玩家，做成好多不公平現象，呢一點係二月會改變。二月更換網絡後，我會將測試武器改成另一種方式，唔會影響玩家之間既嘈吵，但打怪，測試武器仍然會有優勢。」
二月，二月離而家仲有兩個月。
二月，二月我一早唔係到。
樹：「GM可唔可以講詳細d？」
紫幽：「其實打怪打王都係普通巫師強呀。我用呢把弓，打交居然仲會輸俾葉，太過份喇，死人葉……」
大綠：「我想講，唔止係打交，有d人自從換左把測試武器就去搶低級玩家練功點，真係唔知講乜好。」
GM無視其他人，回應樹：「應該咁講，到時候測試武器會全部改成特殊外觀，可好清楚分辨係唔係測武，而且打玩家時自動減弱威力。」
樹似乎滿意：「有趣有趣。」
紫幽卻驚訝：「打人威力會自動變弱？」
GM：「對，打玩家時會自動變弱。」
紫幽：「咁就係三國鼎立既狀態喇。」
GM：「到時測武玩家可以入測武專區，同普通玩家分開。兩邊打既怪一樣，但強度唔同，大致上就係咁。」
老老實實，到目前為止，我腦內只有四字感想：「空頭支票。」
但樹似乎完全唔係咁諗，佢什至開始為GM著想：
「GM，我個人覺得呢個改板對我地非測武玩家黎講係好好既消息。但係我覺得你要考慮下，咁樣會唔會令測試武器人數大減，畢竟你營運都要經費。」
GM：「呢點你放心，我唔會俾佢地覺得無聊，我會衡量。」
樹又繼續：「你真係要好好諗下呢個問題，睇下而家光頭打人已經打到癲左，佢地買武器都係為左打人。以前就有紅震住佢，而家日日都係到搵人隻抽，一時又話"你打我50"，一時又話"你打我200"，我睇到都覺得煩。所以咁樣一改後，理想世界仲會唔會消費，係主要考慮。」
小明：「光頭岩岩仲show左把武器出黎！」
GM：「我知道，我有睇到。」
紫幽：「以前佢地仲話戰神亂殺人，而家光頭咪又係一樣，之前係奇岩見到紅樹葉，光頭問都唔問就直接殺。」
GM：「你地唔係講好三盟和平？」
大綠：「三盟和平……」
話峰一轉，話題由改版變成我地三盟現狀。
紫幽：「係啊，連埋一齊打龍麻，我地一齊定下既，大家一齊食龍，唔會有紛爭，只係近兩個星期起左變化。」
soso：「佢地有優勢係到，點可能有和平！」
樹：「三盟和平，一早就係廢話喇，佢地有咩事就話"最後通碟"、"唔洗講喇"、"見到就殺"，一係就逼我認錯打千字文。」
GM：「你地論壇份合約，白打架？」
紫幽：「GM你唔係睇到晒全部對話……」
紫幽問左我心入面既問題。
不過GM冇回答：「其實我前幾日先同靜心傾過你地三盟既問題。佢知道我要插手，態度都比較緩和。」
好明顯，呢個係我同GM前幾日傾完，佢話"會搵靜心傾一傾"既後續。
GM對於我地現狀，結論就係：「基本上我既想法就係三盟和平，到平衡唔到果陣，我自然會適當介入。」
樹立時反駁：「你前幾日同靜心傾過，但我地剛剛先打完一場。」
莎莎補充：「岩岩仲被蒼日一箭秒殺。」
GM倒保持一貫態度：「所以我而家介入緊呀！我地黎定個臨時條款，全伺服器和平到二月，等二月我改完板一切都會ok。」
由GM開出既條款，由GM開出既三盟和約，恐怕再冇任何反駁餘地。
但紫幽又幫我問左我想問既問題：「咁，攻城又如何？」
GM：「攻城我可能會暫時取消，因為仲有少少問題未修正。但無論如何，最後一定會三盟一人一城，到時古魯丁改做新手經濟區，三個城都會有收入。」
換言之，就係亞丁、奇岩、古魯丁三個城，紅樹葉、理想世界、壬生一族，一人一個。但另一點就係，而家奇岩亞丁都歸理想世界，我地冇得再攻。
GM：「再提提你地，到二月後錢會變得好重要，我勸你地有錢既唔好再浪費去+100武器，到時可以用錢換好武器，就算普通玩家都有機會同測武比。」大概就係咁多，反正應該知道既你地已經全部知道，唔應該知既你地都知道了，冇問題既話我就走喇。」
「886。」
「晚安GM。」
GM：「88。」
GM就咁就消失左。
紫幽：「GM都咁樣講，咁今日既事大家就唔好講出去喇。」
soso：「放心，今日既事唔會有第三個人知。」
莎莎：「剩係計呢到已經超過三個人喇soso。」
………
由頭到尾，我一粒聲都冇出過。
由頭到尾，我都只係坐係到，靜靜地思考GM所講既每一句說話。
GM話二月改版，我冇壞疑，但改版內容，似乎根本冇可能實現。
由架構過私服既人就會知道，私服通常都係某個團隊開發晒出黎，之後想開私服既人自己download晒架餐，set好個server就開得。而私服入面有咩function係work，有咩任務係未開放，有咩王有得打，全部都係由開發團隊整，同download完自己開server果個冇關係。
自己改野唔係話唔得，但係好難。
不過改唔改版又點？二月，都唔關我事。
翌日，如常上線。
GM顯然有再同理想世界傾過。係GM既條款下，壬生一族同理想世界雖然仍有搶王，但基本上雙方默認唔再開戰，搶就由得對方搶。
我，冇事好做。
天下太平既日子，冇城戰冇野戰既日子，我反而唔係好慣。
忽然間冇晒目標，冇晒方向，online唔知有乜做。
我發現，就算唔洗去美國，我可能一樣會走。
「樹，我走之後你係咪仲繼續玩？」
「嗯，asso d野唔難，我會繼續玩。你去左美國之後真係唔再玩？」
「唔玩了，我已經玩透。」我如此答樹，又問佢：「你真係覺得二月會有大改板？」
樹反問我：「GM有乜理由要講大話？」
我冇回答樹既問題。
事實上，我的確諗唔到GM有乜理由要呃我地。
所以我唔諗。
跑開，我獨自一人去左睇風景。
我將畫面開到最靚，將所有技能鍵、對話視窗等等通通關閉晒。仔細觀賞一下，其實天堂二既景色真係好靚，做得好唔錯。一個人泛舟，欣賞旁邊既湖光山色，更有幾分詩情畫意。回想以前每日打打殺殺，腦海入面剩係諗點樣攻城，點樣殺人，有幾可有咁樣係到靜靜地睇風景？忽然覺得，咁多好風景擺係面前，我以前連睇都冇睇過………
夜晚，我向眾人交代離開既事。
「我大概玩多五六日就飛，去左美國之後就唔玩了。」
美國風開玩笑話：「我美國風都未去過美國，反而你先去。」
一班老盟員唔係好信我：「睇死你去到美國忍唔住就上黎啦。」
「唔會喇，真係唔再玩。」
艾爾話：「唔好俾我批中你二月肯定又死番黎。」
我用系統動作－－微笑，作為回應。