【真人真事】當年中七AL，我打左成年天堂二，但我無悔！: 4-大秘密

周星星既然係密我，而唔係用血盟頻道同我講，我估計佢係有理想世界既秘密料爆。

秘密練功地點？秘密打王？真係好心急。

我同樹立即飛去高達特城鎮，跑到去帝國墓門口，但係周星星根本唔係到。

我地用隊伍頻道：「係邊呀？我地到左門口喇。」

周星星：「係帝國墓最入面，四大陵墓果到，你地跑入黎啦！」





唔係掛？玩我咩周星星同學？雖知帝國墓係團練既地方，通道窄怪物密，我地又冇坐騎，兩條友就咁衝入去最深處而唔死，仲難過叫bosco唱k歌之王。

周星星：「係喎你地冇養龍冇得騎入黎喎…咁叫埋咪嚕、暗殺、地獄、艾爾佢地一齊殺入黎啦。」

呢幾個人唔算係我地紅樹葉入面最好打既打手，但絕對係最早加入既一批盟員，亦都係同紅樹葉一齊長大既新玩家，可以叫做「信得過」。當初遇到周星星果陣，我同樹就係同暗殺等人係帝國墓團練緊，佢揀得呢幾個人，好明顯呢個係大秘密，即使係同一個血盟都唔可以隨便公開。

「似乎真係有咩大秘密喎。」我同樹講。

於是集齊人馬後，一群人就殺入去最深處，經過傳送門，我地終於到左四大陵墓。





四大陵墓係一個空既場地，傳送入黎之後只有四度門，一隻怪都冇。係正服，呢個地方係用黎做任務打大boss"巴溫之子-芙琳泰莎"既。要開呢四度門就一定要做任務拎鎖匙，但係我地呢個私服根本冇開放相關既任務，所以呢到只係一個廢既地方。而周星星，就騎住隻龍，企左係其中一個墓前面。

周星星：「喇，以下既野，唔好同人講，最多最多都係俾我地盟內知就算，ok?」

眾人：「ok。」

之後周星星就同我同樹透過系統"交易"，俾左兩條龍我地。

「我得兩條龍咋。你地而家叫條龍出黎先，騎住佢，用keyboard控制對住道門係咁跑。」





我地照做。

「而家收番條龍。」

……

仆街！我竟然穿左入去！入面係一大群怪，仲密過帝國墓，一間細房粗略估計有五十隻怪！正服既四大陵墓根本就冇咁多怪！我係剎那間真係呆左，一入黎就俾班怪圍攻秒殺，我完全反應唔到。最讓我震撼既，就係竟然可以咁樣穿牆！

阿樹比較冷靜，問：「所以，你既意思就係，理想世界平時就係呢到打怪賺錢？」

周星星：「係。呢個地方好似特別多怪，用傭兵一打多係到掃怪，攻夠高既話加左"吸血"就唔洗死，好安全，練功賺錢都極快。理想世界既人平時會入多一道門，係第二間房練。」

OMG，呢一刻，我咩都聽唔入耳，成個腦只有一個念頭，就係爆晒俾全宇宙知！