【真人真事】當年中七AL，我打左成年天堂二，但我無悔！: 6-遠征四大陵墓

第二日，我係血盟頻道入面公開左呢個秘密…既一半……既一半左右：

「琴日我地搵到個秘密團練點，好難入，得閒可以一齊入去練！」

呢d所謂秘密團練點，玩開天堂二既人都會有一兩個，唔見得係咩大秘密，所以我預期佢地冇乜反應。果然盟內個個都話我都有我都有咁，仲玩得閒帶我去。

然後，我地七個知道實情既，就開始討論練"娃娃"，即係專門用黎加輔助魔法既分身。娃娃係術語，而加輔助魔法既術語就係"加buff"或者"++"、"加加"。係天堂二入面，buff係好重要，一個加齊所有buff既人什至可以單挑六七個冇buff既玩家。而要係呢d密集環境生存，我地就一定要有娃娃幫手。

首先"5566"(舞者、詩人)係一定要有。5566既buff大概每兩分鐘要放一次，但係異常強力，尤其係舞者既"吸血之舞"加8%吸血，同詩人既"大地之歌"加25%防禦力。
另外要一隻"先知"或者"戰狂"加其他可以維持20分鐘既buff同各種"預言"，即係同時加幾種能力既高級buff。




再加一隻"主教"用黎主責補血。
一隻"席林長老"用黎加"吸血鬼之王"，30秒內80%吸血，主要用黎=13px預防意外。
最後要一隻"傭兵"，專門一對多既職業，做主力掃場。

5566、戰狂先知我地都有，即係仲要練多隻席林同傭兵加主教，似乎太多。

咪嚕：「傭兵唔洗啦，你係"破壞者"，買把長槍掃怪咪得囉，用你加艾爾既巫師放群攻魔法，兩個人就可以代替傭兵。」

葉：「咁其實席林都唔洗喇，我冇血果陣"開狂"吸血咪得，只係差隻主教。」開狂係破壞者專屬技能，瞬間大幅增加攻擊力。





樹：「主教都唔洗啦，我大把橙汁，戰神送既！」橙汁即係瞬間體力回復藥水，一click就回300血。

葉：「咁等齊人行得架喇喎。」

於是當晚我班左一把A級+5塔魯矛，遠征四大陵墓。

七人係墓前門口加好晒buff。

葉：「等陣我穿牆入去先，我會開狂之後拖埋角掃，然後你地就穿入黎，艾爾放魔法，其他人保護艾爾，我開左狂吸血唔會死。」





眾人：「ok。」

葉：「ok咁我入喇。」

我一路入，周星星仲一路用動作同我揮手，當我係烈士咩。

但係三秒後……果然真係做左烈士，六條屍體訓晒係到。

艾爾：「屌！你又話開左狂唔會死！」

葉：「本來係唔死架…但係我一拖，咁就冇打怪，冇打怪就冇吸血，冇吸血就死左喇…」

暗殺：「盟主，我真係信錯左你。」

係門外既周星星就講風涼話：「嘿嘿，我都睇死你冇鬼用架喇盟主，好彩我揮完手遲左未入姐，番歸重頭黎過啦。」





葉：「你冇入黎呀？咁你幫我地復活咪得囉。」

一向少言既地獄都忍唔住講一句：「死蠢，原地復活咪原地死多次！我地番去再黎啦。」

葉心裡面偷笑。

有咩好得過一班口裡面一直話盟主冇用，但係又一直跟隨盟主帶領既盟友？