【真人真事】當年中七AL，我打左成年天堂二，但我無悔！: 15-一齊玩

根據私服系統既規定，同一個城堡既每次攻城戰都會相距兩個星期，係星期六或星期日進行。換言之，即係就算攻完之後都仲有半個月時間諗點守城，更何況今日到奇岩攻城仲有半個星期，真係大把時間。我同樹商量後，都決定把握呢個機會，攻佔奇岩城，正所謂有食唔食罪大惡極，等係食左先算。

但係，雖然話就話係戰神讓我地打，呢個畢竟係理想世界既城，如果佢地知道左戰神讓城，佢地真係會由得我地打咁順攤？

戰神講過幾次：「唔洗擔心，只要呢個城一日係我既，佢地都唔會做咩。」

我點會就咁放心。戰神係咩人呀，佢當然可以咁講。但係靜心係咩人我唔知，我根本冇把握預計佢會做乜。

戰神：「靜心？傻婆囉。」





戰神對靜心既評價就係咁多，多隻字都冇。我唯有問戰神既前女友，定唔知現任，即係最多料爆既薰。

薰回答：「霸道到死。」

憑呢兩個人對靜心既評價，我推測魔界分裂或多或少同呢三個人有關。但係知道左咁又點？對攻奇岩完全冇幫助。傻婆同霸道呢兩個形容詞，只係表示左如果靜心知道我地要攻城，一定唔會咁容易放手由得我地攻。但係由登記攻城到真正攻城最短都仲有一日既時間差，只要佢地有留意下就一定會知道紅樹葉要攻城，我地可以點？

突然靈光一閃，就係唔俾佢知囉！！


如是這，穩穩妥妥到左攻城日。





紅樹葉係前一日既下午三點就登記左攻城。事前冇通知任何同盟，就連我地紅樹葉自己盟內都冇講，大家問起，我都只係話：

「個城堡係戰神既，我地同佢玩下咋。」

2200，攻城開始，奇岩城堡一個人都冇，我同樹都冇online。

一直到2320，我地先online入game，施施然行去奇岩城堡，又係全頻大叫：

「戰神，我地食飽飽黎攻城喇，受死吧，代替月亮懲罰你！！！！」





戰神：「嘿嘿，打爆城門當你贏。」


事實上，係前一日登記攻城後既幾小時，亞格斯就發現左紅樹葉登記攻城。

亞格斯密我問：「你地想攻奇岩？」

葉：「冇呀，戰神話我地咁屎肯定連城門都爆唔到，咪同佢輸賭兩金爆城門囉！」


結果樹葉二人一個斬斬斬，一個射射射，打到2345，估唔到真係連城門都爆唔到。

但係更估唔到既係，亞格斯竟然黎左，話一齊玩喎！





亞格斯：「我斬爆有冇兩金收？」

戰神：「空手爆到門我就俾十金你。」

仲有十五分鐘就夠鐘完場，亞格斯條友到底想點？