真係as?我個腦諗唔到野。

反覆思考一下,到底有冇盲點?有冇中思考陷阱?完全諗唔到。打字實在太慢,我即刻打俾樹,嘟左一聲就有人接,喂都唔講我就即刻問:

「岩岩攻城戰開始我就開creamyonion,但係一開就發現俾佢踢左出理想世界,creamyonion得你地知,下午入城堡又冇人係到,所以肯定係我地九人組入面有內鬼。」

我抖啖氣,繼續:

「我密左果三個有嫌疑既,分別同佢地講話我會去左、中、後三個地方穿牆召喚。如果係無間道,佢就會通知理想世界,即係話,只要理想世界派人捕係邊個位,邊個就係無間道。而家佢地捕後面,as就係後面果個,所以佢就係鬼,成個推論正唔正確?仲有冇其他可能性?」





樹諗左一陣,答我:「九人組入面有鬼,係合理推論。但係理論上,你呢個方法唔係100%測到邊個係鬼,內鬼唔一定會通知理想世界,理想世界派唔派人出黎都唔一定關事。但既然佢地已經派左人出黎仲要直接去左後面,咁已經唔可以當係巧合,你而家應該照開番隻召喚師去亞丁城堡後面,確定佢地係咪真係捕緊你。」

我hold住個call,立即飛奔去亞丁,再沿城外廣場既邊邊一直跑到去亞丁城堡後方,亦即係我同as預定既召喚地點。

果然,平頭和尚、蒼日兩個就企左係到,一見到我一人幾箭秒殺左隻召喚師。

呢幾箭,將我既思緒射醒左。

「做乜殺我呀,我黎散下步觀下光咋喎。」呢邊我用召喚師同平頭蒼日兩個扮晒野,但係另一邊箱係電話,我同樹講:「已經捕死左。你同咪嚕幫我繼續係廣場兩角睇住,有咩衣郁即刻話我聽,我想double confirm下。」





蒼日:「你散步散到黎亞丁城堡後面?而家攻城戰時間,非同盟接近都照殺。」

「咁觀光等係周圍行架啦,鬼知你地攻城戰咩,都冇人!」

蒼日依然係果句:「而家係攻緊城,你入黎既時候系統就有提你進入戰場,睇唔到只能算你唔好彩,我地只係負責守城。」

面對蒼日既官腔,我一於小理,繼續撤奶。

另一邊箱,除左as之外,我用葉密左所有其他行動成員:「黎亞丁,佯攻亞丁城門。」





大概五分鐘後,樹係電話講狼來了既人逐漸到達,而理想世界既人到呢個moment都未發現,直到佢地開始打城門,打左近成分鐘,先俾廣場後方「世界酒店」既攻城人員發現。

一直冇出聲既平頭而家先爆一句:「你又想搞乜呀葉?」

既然平頭咁直接,我都開宗明義:「as冇講你地知咩?」

平頭蒼日都冇回我,番左去城門殺人,唔洗幾耐兩個弓手就清左場。

我向電話講一句:「唉,收隊啦。我出街飲杯茶食個包,幫我同個盟解釋下成件事,順便踢as。」然後就收左線。 

葉密靜芯:「ok you win. well played.」 

靜芯密葉:「you are welcome.」