【真人真事】當年中七AL，我打左成年天堂二，但我無悔！: 25-奇岩防守戰 (二)

戰神完全阻唔到亞格斯，向盟內大叫：「莎莎放火！！」

不過根本唔洗戰神叫，破牆一刻企係內城門前既莎莎小隊已經睇到。艾爾、soso二人有默契地放出兩條疑光似電既魔法射到莎莎身上，傳送魔力，然後莎莎立即諗咒施法："魔法陣-不滅之火"，所有血盟成員身上發出火光，暫時刀槍不入，處於無敵狀態。

盟軍立時蜂擁而上向亞格斯狂轟。但係插左幾十箭，硬食無數魔法，身受無數刀傷既亞格斯卻仿如神一樣打不死，有神武，自然亦有神防！只不過聯盟軍處於無敵狀態，一時之間亞格斯根本無計可施，只能夠不停提氣施展"武器封鎖"，解除眾人既武器以求自保，最終雙拳難敵百手，被暗殺從背後以一記"亡命一擊"插死。

粒的、奔馳、地獄等人亦衝至已破既右城牆防守空缺。粒的同奔馳既弓手隊一向訓練有素，係寶寶龍一戰已經表現出色，而家更有地獄帶領既一群騎士上前施放"挑撥"等技倆吸引敵軍做肉盾。騎士係前擋，後方弓手就活用"跟隨射擊"逐個擊破，整隊人馬仿如銅牆鐵壁，即使係+100武器都難以突破入內。

前門有戰神拖住理想世界主力，右門有粒的防守。雖然聯盟軍實力不及，守勢遂漸被瓦解，但係仍然堅持左幾分鐘，成功令咪嚕同葉既兩部攻城高崙召出。二人立即控制兩部高崙企係內城門門口前，封鎖內門。





城內戰陣已經成形，葉立即大叫：

「戰神back！」

………「內城門戰主要用負面魔法，殺補師娃娃為上，刀仔不停出外面插陣地既娃娃，唔守水晶塔。高崙死左一部後立即棄守自殺等復活。」

戰神見到葉既指示，立即帶隊退入內，但係一路退一路死，整批人馬居然只剩低戰神、小冷、薰等幾人。平頭和尚同蒼日身先士卒，從正門突入，一個用綠光弓不斷狙擊戰神，一個用紅光弓大開殺戒，最終戰神未退入內城門前已全軍覆沒。而內城門前既兩部攻城攻崙，憑住幾十萬既血量以及龐大身驅，將內城門完全遮擋住。平頭等人因為視線被擋，根本唔可以用神武對城門攻擊，唯有不停射向高崙。

其間莎莎及樹用霸主不斷施放"絕望封印"、"極限封印"等等負面魔法，可惜莎莎似乎俾亞格斯點左相，透過"/目標 莎莎" 呢個指令，莎莎俾亞格斯隊既人不停"針殺"，即係針對攻擊。死完一番生，魔法都未放又死多次。高崙腳下既地獄見狀，就連同幾個騎士開啟鐵壁陣勢，撐起一個半圓綠色防護罩，又不停施放"復仇"、"命運的挑戰"等等挑撥招式令敵軍既攻擊目標鎖定係自己身上。莎莎同樹立即躲入防護罩，開啟"靈魂守護"，防禦力大增，成功對理想世界眾人施放各種咀咒，大大減弱敵軍殺傷力。





塔上既巫師又不停放"定身術"等等阻礙，等敵軍不停被npc傭兵亂射亂打，拖住左唔少人係內城門前。暗殺見狀，就帶一隊刀仔從後門出城，轉出城門前既陣地準備殺補師。有部份娃娃居然連盟都冇入，又有部份行到去城門前企左係到，似乎都係理想世界盟員既私伙娃娃。私服既特點就係咁，冇人肯專職做補師，所有人都自己開娃娃，結果被暗殺等人偷襲，插幾刀將娃娃殺死。

終於呢一輪防守，靠npc傭兵、高崙阻礙同眾人既努力，令理想世界無論係近戰定遠攻都打唔到內城門，呢波防守持續左唔小時間。

直到第一部高崙被理想世界攻破後，聯盟成員立即自殺死入內城，塔上既遠程部隊退入內城龜宿，聯盟軍完全停止防守。冇左聯軍阻撓，霎時間理想世界進攻能力大增，幾分鐘就推爆左第二部高崙。但係亦僅靠呢幾分鐘既拖延，聯盟軍既死亡人員已經全數複活，補buff，並準備好下一步行動。

攻城高崙被滅後，內門好快亦都被破。

而映入靜心眼簾既內城大廳，係阿葉用左近一半奇岩稅收+樹既資助，接近三十億買番黎既npc傭兵海，仲密過四大陵墓！小小一個內廳，有過百隻npc傭兵，連葉自己都唔知到底放左幾多隻！