【真人真事】當年中七AL，我打左成年天堂二，但我無悔！: 28-洗錢

我即刻打電話俾樹：

「喂…沙沙…沙沙…哇，樹你仲係街呀？」

樹：「係呀，server開番？點呀？」

葉：「嬴左，頭先同GM傾完計黎。你果邊好嘈呀，番到屋先call我啦！」

喇唔係賣廣告，我不嬲都話買電話等係要買motorola，起碼人地聽果個都舒服d啦。





我望住份血盟名單，一路碌碌碌，碌到去周星星，望住佢，佢真係好似好耐冇on過line。奇岩果陣唔係到，亞丁果次都唔係到。最後一次見佢好似就係攻破狄恩之後，佢同樹一齊買左王朝甲全套果陣，係我旁邊show off俾薰睇。

果兩套王朝甲就係洗錢洗番黎？

我又走去奇岩隻寶物貓。呢個私服設定左兩隻寶物貓，分別係奇岩同亞丁，專門用天價賣寶物。兩隻貓有唔同野賣，而奇岩呢隻就有王朝甲一套賣。一套王朝甲，衫褲頭手腳五件，原價每件36億，總值180億，稅後總值196億，所以當初靜堅持要我地唔收稅，d天價寶物一野就貴左成十幾億。

不過我佔領左奇岩咁耐，實際上收入大概每日得3億左右。即係根本冇人係呢個寶物貓買野。單靠收稅，我要收60日，兩個月先買到一套王朝甲留黎。除非每日都有大有錢佬搵寶物貓買野，否則我都唔洗諗靠收稅幫襯寶物貓。呢d天價既寶物，我就話有咪嚕成班人夾錢送姐，樹同周星星果套係點得番黎？唔通真係有所謂洗錢bug？點解當時咁蠢冇諗過呢個問題……

良久之後，樹終於都打俾我。





樹：「喂，點呀？GM講咩？」

葉：「GM話取消左攻城戰，fix好晒先開番，奇岩仲係歸我地。」

樹：「咁正！？咁有冇投訴平頭班人？。」

葉：「有。但係佢話我地都有洗錢犯規，係咪想佢執正黎做，叫我問你同周星星，到底係咩事？」

樹：「?…啊…之前，周星星搵到個bug，有個道具賣俾寶物貓會高過原價，咪係咁洗錢囉，但係幾日之後GM就發現左，每人罰左我地100億啦。」





葉：「屌，做乜唔講我聽呀！？」

我一講完就知自己問錯問題。點解唔講我知？大家心照。有時，說話係唔可以講咁明白，亦唔可以問咁明白，老死都係咁話。

我即刻講番句：「你早d講我聽，我地一齊洗夠幾萬億，咪唔洗打咁辛苦囉！而家仲有幾錢剩？」

樹：「唉，我點知GM咁早發現。果陣諗住大把時間洗錢，都冇洗幾多，俾佢罰完100億，再俾左d你買npc，而家得番廿幾億咋。」

葉：「咁周星星呢？佢去左邊？」

樹：「佢果次罰完錢之後好火，之後我都冇見過佢online。」

老老實實，係果個moment，我比較關心周星星……d錢。

葉：「咁佢有幾多剩？」





樹：「唔知佢。」

葉：「個bug得你地兩個人知？」

樹：「仲有薰都知。我online喇，係game傾。」

一收線，真係泄晒氣，心諗「你玩我咩？」

大佬，兩條友一個洗完冇錢剩，一個洗完就走左，你走之前留番幾套王朝甲黎都好掛星爺。而家有份洗錢既得番阿薰係到，薰又唔係我地盟既，到頭來洗錢洗到一蚊都冇賺，仲蝕埋d贊助武器打玩家既犯規cap圖，咁洗黎做乜野丫？GM又唔沒收武器，我又點同班盟員解釋果d一箭秒殺……