葉封印完,走入內廳,又單再手持刀,坐左係皇座上面。

呢一刻,葉,即係我,腦海入面盤算緊既係整場決戰既形勢。

聯軍雖然順利爆破入封印室內,但先鋒軍隊死亡人數唔少,打頭陣既戰神亦係其中之一。聯軍既死者番番去奇岩城鎮,不過對比起全軍死番城鎮既大理想世界同盟,我地只屬少數。根據戰神報告,理想世界既人係城鎮復活後聚集係東門條小橋上面,亦即係封左通往奇岩城堡既近道。我軍根本唔能夠即時趕去戰場,只能夠等理想世界既人離開後先從後出發到奇岩城堡。

即係話,紅樹葉已經被分成兩批。一批係奇岩城堡內,冇晒buff,一批係奇岩城鎮等緊過黎,滿buff。

若果理想世界滿buff既大軍殺到黎,城堡內既眾人包括我自己,肯定唔會守得住。後來先到既援軍,亦即係戰神一批係城鎮從後趕上既軍隊,因為力量分散,就算可以做成衝擊亦都只會死番去城鎮,呢波攻勢我軍根本冇可能守得住…





呢邊箱葉仲思考緊對策,那邊箱理想世界已經殺到,只能接戰!

平頭和尚身先士卒,綠光弓一上前就係一記"七箭"射向皇座上既葉,葉又再次被同一招一擊秒殺,安坐於皇座上,坐山觀虎鬥。然後蒼日發出"多重射擊"亂射眾人,日殺盟主韓信亦都參戰,換上一把同亞格斯一樣既紫光雙刀斬向我軍巫師。同場仲有以前既無間道as,手持紅光s級匕首"天使殺手",不停左插右插,懶理昔日伙伴……

呢場根本係一場混戰,規則?技巧?戰術?友情?通通都拋諸腦後,係呢個時刻呢個地方,邊個拳頭硬邊個就係皇者。

冇buff既城內聯軍抵擋近約3分鐘,靜心就成功突入封印室,,而後面緊貼住既係戰神援軍。可惜援軍人數少,根本突破唔到,眾人拼死殺左平頭和尚同蒼日兩個+700弓手後,戰神亦都被圍死。係人數差距下粒的既+100紅龍弓都發揮唔到咩作為,被韓信用"重擊盾暈"完後再被as鑑生插死。

終於靜心又再封印城功,我被踢走到奇岩城鎮。第三輪攻守互換,我軍再度變成攻方,我望一望錶,距離完場仲有一個鐘頭四個字左右。





我問:「理想世界死左番黎既人係邊?」

連戰、艾爾、奔馳等幾人一番到城鎮,就即刻封鎖左東門條橋仔,冇人可以係東門出去。

專業既斥侯暗殺立即答我:「佢地係北門出左去。」

我發號施令:「補完buff後立即由東門小橋出發!」

兩次係皇座上近距離觀察混戰,令我開始意識到,理想世界既情況其實同我地一樣。一樣分成兩批,一批城內,一批城外,面對我地棄守全攻,棄防重武,佢地都一樣頂唔到我軍攻勢。





紅樹葉聯軍由城鎮東門出發,殺上城堡,中間仲遇到兜路入城堡既理想世界人員,唔理係咪戰場,斬立決、殺無赦!

然後,又係一陣施殺、封印、第四輪攻守互換。

緊接既係第五輪、第六輪、第七輪攻守互換……雙方都明知戰況膠著,但係根本冇力改變,只能任由對方攻破,再回攻。

時間仲剩低大約30分鐘,呢一輪我地係攻方,理想世界係守方。

我:「等。」

三分鐘後,平頭和尚係全頻出左一句:「殺到怕,唔敢過黎?」

連戰立即反擊:「我怕你死太多,跌到得番1 level我殺得唔過癮呀!」

其實大家都心知肚明,我地就係等緊時機。最後一波攻勢,一攻入就封印,然後完場,要佢地連進攻既機會都冇。同時,亦係一個機會俾連續打左六輪既大軍休息下,不停互戰打左個半鐘,真係會好累,係身心都疲累。





仲有23分鐘,休息夠,我地出發,暗殺已經先行做哨兵睇路:「佢地全部龜係城內。」

我一直留番每次攻城戰只能插一次既旗--召喚攻城陣地。最後20分鐘,奇岩城堡外既戰場揚起紅樹葉既血盟旗!

「上呀!」

附圖:奇岩地區衛星圖