【真人真事】當年中七AL，我打左成年天堂二，但我無悔！: 外傳-討伐肯特拉獸人

今日係決戰肯特拉獸人既日子。

「肯特拉獸人、巴瑞卡賽勒諾斯，兩大傭兵民族經常略奪路過商旅，困擾高達特城鎮多時。」一名身穿白色盔甲，手執雙手大劍既半獸人，低聲道：「今次領主既任務，係要我地前去暗殺肯特拉獸人既族長－布拉齊，然後嫁禍俾巴瑞卡賽勒諾斯族，挑起兩族戰爭。」

高達特城鎮一間陰暗既酒吧內，咪嚕怒道：

「呢個高達特領主，之前又要我地接近巴瑞卡搏取信任拎軍符，而家又要我地去暗殺肯特拉族長，仲要嫁禍埋俾巴瑞卡人。次次又陰險又高風險既任務就交俾我地，佢自己既軍隊就係城堡入面嘆世界，當我地紅樹葉係咩呀？」

葉回答：「寄人籬下，我地冇本錢反抗。而且我地仲需要高達特領主幫我地建立聲望，受佢差遣又有錢賺，互惠互利姐。」





咪嘈：「哼，他日等我地座大，一定要攻陷佢城堡，連高達特都要佔領埋！」

葉一手按落咪嚕呢位女矮人既嘴上：「咁大聲未死過呀？人齊，出發啦。」

紅樹葉一行十六人，騎住十六條龍，跑出高達特城鎮，直衝入北方既肯特拉獸人軍營。

咪嚕：「又話暗殺既盟主？」

葉：「我地有咁多人仲暗咩殺，直接清佢場啦！」





葉騎住坐龍，帶著巴瑞卡既軍符，四圍亂跑吸引注意。四周既肯特拉獸人紛紛圍埋黎想致葉於死地，一時之間竟然聚集左幾十隻獸人！但係所有獸人聚集埋一齊，正好被艾爾、soso等巫師施放群體魔法。七個巫師一人一下"怒濤奔浪"、"暴風雨"、"火山爆發"等等範圍魔法，一瞬間就如葉所講，清場。幾十隻獸人跟本埋唔到葉身，就連葉坐住果條座龍身上既一片龍鱗都傷唔到就已經被全數轟殺。

十六人直接衝入肯特拉軍營既核心，包圍住單拖既肯特拉族長布拉齊！

葉：「布拉齊，我係奉巴瑞卡既"魯格瑞斯"之命黎殺你既，你乖乖地就交晒你身上既"聖者之矛"同"泰狄奧森耳環"出黎，我仲可以免你一死！」

布拉齊呆站原地，不作一聲。

咪嚕：「報告盟主，布拉齊好似啞左喎！」





葉：「佢受驚過度姐，我地等一陣。」

……

係一旁既樹終於睇唔過眼：「你兩條友玩夠role play未呀，開波啦頂！」

葉：「呢隻game係mmorpg, rpg呀！你都唔投入既，點enjoy遊戲！」

樹真係冇咁好氣，直接發號施令：「地獄食白水開王係咁挑，巫師等地獄挑夠先開波，打手直接開波攻佢後背。」

地獄聽罷就召喚左暗騎士專有既"黑豹"出黎準備助攻。啪左一下白水，亦即係"終極治療藥水"，15秒內持續回血，之後地獄就舉起大盾，以"強力盾擊"擊落布拉齊身上，再不停施放"強力挑撥"、"復仇"等技能，增加怪物對地獄既仇恨，令布拉齊只集中攻擊地獄一人以保護各隊員。隨住黑豹對布拉齊開爪，所有近戰打手亦立即跟隨黑豹向布拉齊揮刀。

十六人打呢隻小王，簡直係殺雞用牛刀。開打之後布拉齊既HP迅速減少，直頭可以用噴血黎形容。

但係王畢竟係王，就係血量只剩番五分一，就快死既時候，布拉齊突然發狂衝向外圍既巫師團。地獄不停挑撥，但係布拉齊根本唔受挑，暴走般直衝向一個巫師，揮拳打兩下就將之秒殺。然後一瞬間又衝到另一個巫師身前，又再秒殺一件！布拉齊發狂亂衝，一眾打手根本毫無辦法。眼見第三個巫師就快遭殃既時候，地獄及時放出"信念之盾"，憑信念係十五秒內幫全體成員增加防禦力之餘，吸收全員九成既傷害。巫師們立即散開，再起勢狂轟，終於擊殺布拉齊。





行者"暗殺"立即檢查遍地既寶物：「聖者之矛………的刃部，泰狄奧森耳環………的碎片。都叫左你唔好咁心急架啦樹，而家布拉齊發脾氣唔跌寶喇！」

葉、咪嚕：「咪係囉！都係你唔投入遊戲既後果！」

樹：「……」