【真人真事】當年中七AL，我打左成年天堂二，但我無悔！: 40-主權

小綠：「我地盟主唔想連累盟友被人補刀所以先同佢假意友好咋。但係靜心得寸進尺，王被佢搶左就算喇，有時連練功點都要霸埋，盟主又叫我地讓佢！」

我真係冇乜心情聽佢講野。

我：「呢d都係你盟內事務，我又唔係美國，其他國家d事關我鬼事咩。」

呢句係真心說話。唔理呢個盟係唔係咪嚕既，就算係同盟，只要佢唔係我既血盟，我都唔方便插手，更何況我唔知頭唔知路？呢個係血盟主權問題，我一個外盟去插手，名不正言不順，冇人會睇得順眼，只會惹人反感。除非紅樹葉好似美國咁，係全世界唯一一個超級大盟，咁就打橫行都得，唔洗理人點睇，但紅樹葉唔係。

我講完呢句說話就脫左隊，離開奇岩，由得佢地兩個唔理佢，去左做地獄島任務。





地獄島係一個封閉既島，要入去就要做任務，完成後先可以用位於海音城鎮既「曲速門」傳送過去。

呢個任務係俗稱既"跑腿任務"，即係跑黎跑去，搵完呢個npc之後又搵果個npc，完全冇實際意義，純粹dum你波鐘，磨晒你d時間，所以任務既過程唔詳述。

大概係早上既六點鐘，我終於完成任務入左地獄島。行一行前，就見到soso係沙丘區拖怪打，而名前一個盟徽都冇，soso冇入任何盟。

再行前少少，soso似乎已經見到我，企定定咁被怪圍嘔左一陣死左。

soso：「！！！你係葉？」





我：「我係奇岩叫人你見唔到咩？」

soso：「葉！我好掛住你！！呢到睇唔到奇岩頻道！！」

我：「做乜離左盟？」

未等soso答我已經直接邀左佢入盟，但係估唔到，系統出左一句《soso拒絕你的邀請》。

我：「？」





soso：「葉，你唔知咩事。你走左呢半年實在發生太多事…我地同理想世界有協議我唔可以入盟。」

又係理想世界。

番左黎唔夠三個鐘，已經聽左呢個名六萬次。又乜又物咁，乜都關佢事，而家仲要soso退盟？我盟既人由佢踢，當自己係乜野？心入面突現湧起一股無名火，怒道：


「痴線，協乜春野議呀，我地盟既人到佢管？我盟既人全宇宙只有我可以踢！！」


再邀多幾次，soso終於答應左回歸紅樹葉。

soso：「葉，你知唔知而家係咩情況？」

我：「到底係咩事同理想世界開戰？」





係我走之前，雖然紅樹葉同理想世界不停係攻城戰上較量，但係呢個只係遊戲玩法，雙方未至於交惡什至去到開戰。

soso：「事源你走果次守城，贊助武器互斬，gm話兩邊都有斬叫我地自己處理，咁理想世界就執住呢點同我地嘈囉…」

我回憶一下…好似係我叫太極開拖先…

我：「太極戰神兩個都係皇族既人，我地一把神武都冇，關我地咩事？」

soso：「樹都係咁講。但係靜心佢地唔講道理加麻，根本傾唔掂，最尾咪開始互相補刀。」

我：「然後就係咪嚕主和你地主戰，大家分手？」

soso：「咪嚕帶左一班唔想打既人開新盟走左。」





我：「咁而家又係咩情況？」

soso：「而家半休戰，雙方唔可以殺有血盟既玩家，條件係幾過殺得人多既都不得入盟，不過我地盟基本上都被佢打到半散喇…」

我：「樹仲係到喎？佢應該殺得最多？」

soso：「樹一直都係開分身殺人，佢地應該唔知掛。」

……

葉：「仲有咩人係因為協議走左？」

soso：「仲有艾爾、皇上、莎莎、相思、……」

葉：「你地有聯絡係咪？唔好理咩爛鬼協議，佢鐘意退人自己退飽去。同我收番晒所有人入盟，我會再同理想世界談判。」