第二日一起身,server已經例行維修完,我正式成為紅樹葉既,應該係第四任盟主? 

第一件事,就係同時宣戰奇岩亞丁。只要攻城時間唔同,就可以同時宣戰,而奇岩既攻城時間係今個星期六,亞丁係下下個星期日。 

係制定戰略之前,咪嚕買贊助武既事,令我不得不重審一下,到底呢半年黎戰力有咩重大轉變? 

我係盟內問,結果soso、艾爾、薰各自show左一把+500既魔仗出黎,樹居然show左一把+1000弓出黎。 

我:「……」 





樹:「呢把係太極把+1000弓,太極話唔玩俾左薰保管,我問薰借黎用。」 

我:「太極又唔玩?+100武器+25防如何?」 

一問完,盟入面就show晒d武防出黎,+100天使殺手、+100紅龍弓、+100伊克魯斯弓、+100王朝魔杖、+100伊克魯斯之手等等真係乜都有,原來三聯幫解散前曾經開倉派錢,加上半年既時間,差唔多人人都有一兩把勁野。而家我地盟雖然走左好多人,但留低既差唔多個個都係頂級武器頂級防具,樹形容: 

「我地以前係大批人馬既軍隊,而家係少數精英組成既遊擊隊。」 

我:「理想世界如何?」 





樹:「佢地係多數精英組成既軍隊,平頭蒼日都換左+1000弓。」 

…… 

係呢段時間入面,我曾經搵過咪嚕,亦即係紫幽,但係佢直情唔認自己係咪嚕,扮唔識我,我真係吹佢唔漲。 

星期六就係奇岩攻城日,但係戰事係星期五已經開始。 

星期五晚大概九點鐘最多人既時間,第二步,"草木皆兵"action!





大小綠班左壬生一族另一個有錢佬"梧桐勢十郎"黎幫手,呢個名即係漫畫明陵帝個主角,所以我地簡稱佢做"明陵帝",然後再簡稱做"小明"。 

大綠、小綠、小明、樹、薰、soso、艾爾七個人組成分身隊伍係外面補刀,我負責做司機,開teleport召喚師。而小隊總部就係壬生一族既城堡:海音城堡既停機坪!順帶一題,海音城係最遠離大陸既一個城堡,冇乜人會係到買野,咪嚕揀左呢個地方,明顯係想講俾大家聽,乜都唔關佢(盟)事。 

紅開左樹個角式,我開左自己隻葉,兩個都放係奇岩,做我地一行人成日做既事--唔知做乜。當然我係唔知做乜,紅就控自己同樹,自己同自己玩。而另一邊我就開分布世界各地練功場既teleport監視… 

地龍心,冇、聖者公墓,有、溫泉,冇、原始島,冇、帝國墓,有、傲慢塔,有…… 

海音停機坪上面八個人,有三個係有盟,一個名前掛住既係小盟"風之谷"既盟徽、一個係小盟"不要打我軍"、一個係小盟"夢幻無限"。 

「小明大小綠聖者,soso艾爾帝國,樹薰傲慢塔。」 

葉簡單講解後就將五人召走。 

開殺! 





小明一到聖者墓就直衝到理想世界聚集既房間,上前直接用"衝擊盾"擊暈拖緊怪既火車頭!火車頭係術語,代表拖怪既人。火車頭一暈,後面拖住既成串火車卡--怪物們立即散開,圍埋火車頭身上,衝擊盾效力持久,佢已經冇救,只能被怪物監生圍死。

同時間,小綠手持+100,加左特效"靈活思緒"既奇蹟劍,向其餘剩低既人員施放魔法。靈活思緒可以加快施法速度,加上小綠呢隻分身既職業"咒術詩人"天生施法速度極快,有心人裝冇心人,一個打手連反應都未及得上就已經死左!另一個打手劍鬥士卻立時放出劍氣"波動衝擊"向小綠反擊,但係只係反擊左一下,就俾小綠連續三下"水之爆裂"秒殺。大綠再清埋堆怪物,三人唔洗一分鐘就清左場,然後立即被葉召喚走。 

另一邊箱,帝國墓既怪比較密集,活用地型,soso艾爾兩人直接拉火車撞向理想世界!兩個人騎龍周圍打怪,打一下就轉向打第二隻,俗稱"開怪"。兩人差唔多開晒成個帝國墓既怪,然後兩隊大火車就直衝入理想世界等人既既房間入面。

理想世界既房本來得七八隻怪左右,突然間兩隊大火車拖入黎,一時之間成間房有幾十隻怪係到。soso一入到黎就立即除下防具俾怪秒殺,艾爾用緊刀仔,一入房就用技能"假死",然後幾十隻怪就同時暴走,散開,見人就斬!理想世界既人連逃走既機會都冇,一間細房聚左三四十隻怪,神仙都難救,冇人幸免,全軍覆沒!

鏡頭一轉,黎到傲慢塔。

葉用召喚師,個名就叫做"傲慢之塔",瞬間將樹薰二人由海音停機坪召喚到通往傲慢之塔頂層既長梯上。

二人一到步立即落樓到滿佈天使既傲慢塔上部,果然理想世界五人隊就係到圍嘔天使!二話不說,一下"連環箭"一個"死亡之刺"兩下就飛埋去。黎得呢d地方練功既都係新手,防禦力唔高得去邊,樹薰二人用+100武器兩下就殺一件。加上薰用緊既死靈法師不停超音速連發"死亡之刺",五人根本毫無招架之力,三兩下手勢就被全滅。





然後葉立即用召喚師召走樹薰,理想世界既五條屍攤係到一齊望住天花板同埋堆天使,連對話既機會都冇。

聖者墓、帝國墓、傲慢塔同時攻陷。