【真人真事】當年中七AL，我打左成年天堂二，但我無悔！: 49-紫幽
我地紅樹葉最後呢一波攻勢，係除左我之外全員冇損既狀態下，宣佈戰敗。
我係盟頻上面講：「輸左喇，走罷。」
食正我地人少所以人牆稀簿既缺點，理想世界呢班弓手個個開晒"極限閃避"，唔理人牆，直接用"/目標 葉"呢個指令target係封印室中間既我，未埋到門口就射箭，根本想擋都冇得擋。
未幾，系統宣佈《奇岩攻城戰結束》，我地頭上面既紅色攻方logo消失，正式打敗仗。
今次戰敗，因家都預左。人數差距太大，我地冇人期待過會攻下奇岩，反而覺得成功進行封印已經可以話係嬴左。加上城戰中間有紅呢個surprise係到，大家都好興奮，就只有我一個人失落。
我係血盟頻道大叫：「今次我地戰敗純粹係因為人少，你睇下佢地班人係打把武器勁，根本唔識打機，我地咁少人都可以打入內廳，下次聚埋其他盟聯手佢就仆街！」
附和既人唔少。平心而論佢地係咪唔識打機，who cares？正所謂「敵軍勢強，眨其有勇無謀」，絕對係治軍不二之法。我既失落，重要嗎？最緊要係眾人高興。
然後食住個勢，我地全盟又去左推王。不過今次係我地紅樹葉三個做王俾人推，玩pk。
而理想世界方面，靜心一守完城就開始發難。大綠同我講，岩岩系統宣佈打完城戰，靜心就去左搵紫幽，當然又係叫佢踢人，因為攻城戰期間，大小綠就係用掛住壬生一族盟徽既分身殺人。
講數其間大綠同小明都在場，佢地就覆述俾我聽。
靜心直接同紫幽講：「你盟果兩個XXX同YYY係人地分身黎，你知唔知係乜水？岩岩打城戰佢地走黎殺我地既新手，麻煩你踢走佢。」
雖然根據眾人所講，壬生一族最初雖然係由紅樹葉分裂出黎，但其實由我番黎既第一日，壬生係人數方面已經係同理想世界平起平坐既大盟，只不過一直處於中立，少生事端。紫幽，即係咪嚕，其實好和平好細心，份人更加好friendly，而靜心就係食住佢呢兩點，根本唔當佢係一個大盟既盟主。
紫幽：「你等我了解下先，我都唔知咩事，果兩個人都唔係我收既。」
當然，因為果兩個人係大綠收加麻。
靜心：「唔洗查，我肯定果兩個人係分身黎，我地盟已經連續兩日俾人補刀，個個都唔同盟，呢d無謂野係得兩個人會做。葉番左黎成個星期，有冇搵過你？」
我擺左咁大場大龍鳳，靜心仲係講緊我，得罪你咩。不過fine，表面證供完全唔關我事，你夠膽開我波我就有信心拖死你。
紫幽順著靜心，避開左分身既話題：「有，但係我冇理佢。以前既事過去左就算啦，而家我叫紫幽，係壬生一族盟主。」
靜心搵完紫幽之後，紫幽直接問大綠：「係你地分身？」
大綠一見到就同我講，我深知咪嚕係明事理既人，就叫大綠直接將成件事和盤托出，包括我地之間既"交易"。
紫幽聽完，只係講句：「你地自己退左隻分身去啦。踢完人24小時內會收唔到人，好煩。」
……
大綠覆述完紫幽呢句說話俾我聽後，我就冇再理佢。
紫幽，aka咪嚕，已經知道晒所有事。知道係我搵人補刀，知道我既交易條件係拉攏佢對抗理想世界，但係居然就得咁既反應。我唔知佢應該有咩反應，但係我冇預計過會咁冷淡咁平靜。係睇化左定係接受左，定係一早估到？我唔知。但係"好煩"呢兩個字，係真係講緊24小時內收唔到人好煩？我好懷疑，佢係同緊自己講，亦同時係同緊我講，好煩。
星期日，我地繼續補刀。
除左我、樹、薰、soso、艾爾、大綠、小綠、小明八個人之外，今次仲多左個紅。
大家去左"昂赫瀑布"後面既山洞當做基地。當然我地係用召喚師召過黎，呢個地方老連咁遠，就連怪都唔多隻，唔會有人入黎。
我問：「大家仲有幾多個分身係冇露過面？」
眾人數一數，我地total剩番十二個分身未出過場殺人。
我諗一諗，好似唔係好夠：「大綠小綠小明你地三個再練多d分身ok？照樣打亂入其他盟。」
其實係天堂二入面，要壯大血盟，學血盟專有技能或者開附屬騎士團等等都要用到"血盟分"。而其中一個最簡單既儲分方法，就係有新玩家係血盟轄下既學院畢業，即係升到40level。每一個新人畢業有成三百幾分，反而打一個王可能得十幾二十分，所以大部份血盟都好樂意收人入學院，懶理係咪分身。只要一路練一路同血盟其他人傾下計，多數畢完業都會收番你，我地就係憑住咁樣將分身打入唔同血盟。
我同大綠等人講：「但係今次唔好避，最好同理想世界班人一齊練，俾佢認到名，我開召喚師睇下佢地係邊先。」
然後，我又開番周圍既召喚師視察。
連續兩日針對性補刀，理想世界已經火起。幾個5x level既場，居然每個場都放左五六個爆level弓手巫師係到做保鏢，仲連平頭和尚、蒼日同靜心本人都係到。保鏢人數仲多過佢地係到打怪既新手，補刀？埋到身都偷笑。
我地唯有一齊去練分身，一邊練功，一邊光明正大地監視佢地。
之前已經試過一次，扮練功，練練下走去撞佢地火車。所以今次佢地好小心，我地既分身練功團監視佢之餘，佢亦都係到監視我地。
不過今次我地真係純練分身。
練左幾個鐘，已經換左幾次人，又換左幾次場，保鏢大概係無聊得濟，只係走剩一兩件弓手同靜心一個。呢個時候紅樹兩人係"凶煞地下墓穴"、大綠小綠小明係"聖者古代公墓"，soso、艾爾、薰同我係到待機。
敵退我進，時機已到。