屠龍會之後,就係拍賣會,拍賣屠龍所得既寶物。其中最珍貴既寶物--有吸血、抗暈作用既地龍耳環,俾阿紅幾乎動用全盟資金下bid左番黎。

而亞丁城戰,係指賣會中途已經完左,日殺近半個盟,即使樹表明唔會攻之後,依然係亞丁城既城牆上呆等兩個鐘。結果成場都冇人攻,佢地又唔敢走,直到完場先番黎夢幻島列席拍賣會。

拍賣會左之後,眾人走既走,散既散,剩低三盟首腦係到。

事前從來都冇話過拍賣會完左後大家留低,但係紫幽、亞格斯、韓信等等人卻心有靈犀,一齊留晒係到。好明顯所有人都意識到,我地呢幾個盟有必要合作。

但係現場水靜鵝飛,根本冇人出聲--應該係話,大家都只係係各自既同盟頻道出聲,就係冇人係普通頻道出聲。係呢一刻,我相信現場既兩大同盟:漫畫卡通聯盟、大理想世界,各自既同盟頻道都係熱鬧非常,而大家討論緊既野應該一樣。





樹係同盟頻道同紫幽講:「我地三個盟要合作先食到龍。」

紫幽:「就係咁我先留低之麻,壬生同紅樹葉當然冇問題,但係理想世界呢?我同亞格斯唔係好熟,唔知點開口,葉同亞格斯熟D,佢去左邊?」

呢個時候,我用緊樹果隻霸主"絕望的哀悼"扮係樹既分身。呢隻"絕望的哀悼"亦即係好耐以前用黎開"狼來了"呢個分盟既角式。因為根據樹既劇情我呢一刻應該係訓緊教,我一粒聲都唔可以出,更加唔可以俾日殺知道我仲係到,仲要突登唔去攻城,所以我一直沉默,半句爹都唔搭。

樹答:「佢訓左喇。亞格斯好易話為姐,我同佢都有計傾,問題係靜心。」

紫幽:「你指韓修修?」





樹:「你都覺得韓修修就係靜心?」

紫幽:「我唔知,但係光頭即係平頭就肯定既。平頭係靜心老公,光頭又成日同韓修修一齊,佢地出現既時間又咁岩…」

樹突然一聲怪叫,係電話入面覆述以上對話俾我聽,因為我用緊果隻"絕望的哀悼"唔屬於紅樹葉血盟,睇唔到佢地同盟既對話。

聽罷我都怪叫!光頭係靜心老公!!

紅係電話亦爆一句:「咁靜心咪即係人妻!」





「唔怪得之咁得閒啦!」我立時明晒:「咁六萬%肯定韓修修就係靜心啦!兩個都咁火爆,真係襯!」

樹仲未改到口叫佢做紫幽:「咪嚕話就算係理想世界都唔係好多人知,佢同靜心之前扮frd底靜心先會同佢講,仲叫佢唔好講出去。」

從樹既口中,可以聽得出樹覺得成件事好合理,佢相信呢件事係真實發生過。但係樹冇留意到,我其實係唔會明佢講乜。樹呢番話,意味住係我走左果半年內,紫幽曾經為左血盟和平同靜心扮frd。打機打到咁辛苦,何必呢?

然後,白頻上面,樹首先出聲,開始同理想世界講數:

「我諗,大家留係到,應該係為左同一件事,係咪?呢條地龍,以至係亞丁既火龍,奇岩既巴列斯,我地三個盟都冇可能自己食到。要打王,我地就要合作,要合作,我地首先要和平。」

亞格斯未出聲,反而係韓修修先出聲:「我地一直都好和平,係唔知咩人係到興風作浪,一直搞事。」

樹特登問一問:「你代表理想世界?」

亞格斯答:「韓修修係日殺盟主,佢講既野就係我講既野。」





我立即上網check一check,果然韓修修已經變左做日殺盟主!原來唔知幾時開始,日殺已經易左手,由一直以黎既盟主"韓信",易左手比"韓修修"--更加肯定呢條友就係靜心。

「我仲以為日殺係理想世界分盟tim。」樹再潤一潤亞格斯同韓修修,又繼續:「以我所知,我地紅樹葉同理想世界係有和平協議,互相唔收以前殺過人既成員。但係葉番黎之後,兩盟都破左戒,加上GM禁左任意pk,先大家都冇理,不了了之姐。理論上,而家紅樹葉同理想世界係處於戰爭狀態。早幾日我仲要被日殺補完刀黎,當然,我既意思唔係話要同你地開打,我係想兩盟正式簽署和約,確立兩盟以後和平。」

韓修修:「而家GM禁左PK,我地就已經係和平狀態,仲確立乜野?你唔係之前搞我地,唔通我會主動打你?你搞清楚,一路以黎理想世界都係被打先反擊!」

佢呢句"你唔係之前打我地",其實就係暗指,唔係,應該話係明指之前用分身補刀背後既就係我地。

樹:「邊個打邊個先,咁耐既事邊個計到?我地雙方開戰、和平、開戰咁斷斷續續到而家已經有四五個月,你最清楚平頭和尚有幾火爆,你確定佢冇先開打過?兩盟開戰咁耐,大家都會覺得自己係受害者,大家都唔想被人打,所以確立和約係有必要,而且要有阻嚇性既罰則,確保以後和平!」

樹扮唔知"之前打我地"指既係分身補刀,一下就跳番去我回歸前既補刀戰。

韓修修:「唔打就唔打。你唔打我我亦唔會打你,罰乜野則?多餘。」





樹:「唔立罰則,咁同冇立過條約有乜分別?隨時反口都得啦。」

光頭又加把口:「你地盟主一番黎咪反口收番soso囉!和約未立過咩?白痴先會信你!」

艾爾:「你平頭和尚咪又係入番理想世界!仲犯規俾gm禁埋,改個名以為唔認得你咩白痴!」

光頭又立即一大堆注音粗口回敬艾爾,二人台語加注音互插,我作為香港人真係完全唔知佢地講乜,更加想像唔到佢地以前到底係點談判,唔怪得果陣既結論係要踢晒佢地出盟,我生平第一次,係心底入面認同靜心。

我同樹講:「喂叫佢地收聲啦,好煩。」

樹答我:「兩個都係火爆人,點收聲呀。」

我建議:「密佢地幾個頭目解team,互組,係隊頻講。」

如是姐,一共六個人,"絕望的哀悼"、"樹"、"紅"、"紫幽"、"韓修修"、"亞格斯"組成一team。樹用分身召喚師既名義,加左"絕望的哀悼",即係我,入team。然後我就控制呢隻"霸主"轉職做"戰狂",再用"門扉頌歌",一下子將所有人召喚到"海音城"廣場--壬生一族既地頭,冇人既地方,繼續談判。樹就趁呢個空檔,同紫幽商討等陣點講。





今次紫幽先出聲:「你地紅樹葉理想世界既戰事先唔好講。今次我地係商討合作食龍,我想同時定立食其他王,即係扎肯、蟻后等等既條約。早前我地兩盟已經鬥搶過幾次,我唔想傷大家和氣,不如直接分單雙,單日理想,雙日壬生,星期日先到先得?」

韓修修對紫幽明顯比較客氣:「冇問題,就咁定。食龍既事,反正大家都明白三缺一不可,根本唔洗立和約,要食時候組團就可以。」

樹順勢立即propose:「罰則我已經諗好,今日既所有事,包括你地兩盟食王,我地同理想世界和平,或者任一盟偷食龍,任一盟殺其他兩盟,總之一犯,就罰上論壇寫一篇千字道歉文,並且要其餘兩盟收貨先得。」

韓修修不滿:「罰乜野則?更何況寫文!你會唔會太無聊?」

結果兩人就為左罰則、點解要罰、罰d乜野,傾左成個半鐘。我同紅頂唔順,跟到一半就真係去左訓覺。

翌日樹同我講,最終由"樹"、"紫幽"、"亞格斯"三人代表三盟投票,千字文罰則2:1通過,並定立從此三盟和平、分王食條約,由紫幽負責將條約列出post上論壇。