【真人真事】當年中七AL，我打左成年天堂二，但我無悔！: 60-Hacker

星期六既七點鐘既奇岩攻城戰，我地冇打。

亞格斯、韓修修等人又再一次係城堡上呆等。韓修修問樹：「到底你地攻唔攻城？」

樹例牌答：「唔知呀，葉都唔係到，又冇話要攻城，我都唔知佢宣晒咁多個城堡做乜。」

我當然例牌扮冇online。

結果，佢地又呆等左兩個鐘。





係呢兩個鐘頭入面，我開左隻分身，聯同紫幽、大綠佢地成班壬生一族，加埋紅樹葉既人一齊去左食王。星期六係雙日，即係和約下既壬生食王日，任食唔嬲。

一路掃王掃到凌晨，抖一陣，到左凌晨三四點，冇乜人既時間，我同樹就開始練火星人小隊。

練火星人小隊，同上次練分身補刀好唔同。上次既角式用途係打遊擊殺新手，只要武器夠強攻夠高就得，所以大部份都只係練到五十幾六十級，咁level拎把勁野就算。

但係今次火星人小隊係用黎打仗，仲要守五分鐘，所以我地要練爆。練爆既意思，即係除左主職業要練到最盡85level，仲要練滿晒三個副職業去到最盡80 level，務求個人物可以學到所有副職業技能，去到最強狀態，咁樣先有最高勝算。即係我地總共要練6x3x80+6x85=1950個level，而且上到75後每個level都要double經驗值先可以升級，最重要係要偷偷地練唔俾人知，真係冇番兩三個星期都搞唔掂。

不過正好，呢兩三個星期就可以用黎進行真狼來了計劃－－我每次都宣戰，每次都唔攻由得佢地呆等。正所謂一鼓作氣，再而衰，三而竭，白等三個星期，參戰人員必定等到泄晒氣，然後我先突然攻其不備，最後仲要換埋火星人，諗完都覺得自己仆街。





呢三個星期，大家就和和氣氣，得閒屠下龍，單日佢地食王雙日我地食王，全世界和平安穩咁過罷。

我本來係咁諗。

我真係以為大家可以好和平。

果晚，我同樹開完堆火星人後就開始狂練，練到朝早七點幾先訓，其間又好專心咁check住有冇其他人有機會察覺到我地呢堆火星人，成晚都精神崩緊，簡直成個人都散晒。

結果一訓我就訓到下午四點先起身。





轉頭，望一望個電話，六個miss call，全部都係阿樹。

心知不妙。

樹好少會連打咁多個電話俾我，除非有大事，而所謂既"大事"，十之八九係奶野，仲要係奶獲甘，甘過帛金果隻。

拎起部電話，我打番比樹，響左一下就通左：

「喂，樹咩事？」

「我account冇晒人，被人hack左del晒。」

我有點懷疑自己係咪聽錯：
「咩呀？你講多次？」





樹好冷靜咁重覆一次：
「我account冇晒人，被人hack左del晒。」

「冇晒d野？」

「係冇人，全部人冇晒，個揀人畫面係空既。」

雖然岩岩訓醒，但我思維尚算清晰：
「冇理由，就算del左應該有一星期時間先會清空。」

「我夠知洛，所以咪話俾人hack囉，唔信你自己入去睇下。」

我當然信樹：
「咁我account呢？」





「成個盟得我中招。」

「分身s？」

「冇，得正身個account清空左，已經係論壇pm左gm，未覆。」

我第一時間諗到，就係錢。成個盟d cash都係樹正身個account。

第二樣諗到既，係果套俾gm del剩，屬於太極既+250防，而家全部冇晒。

然後樹繼續，講左個更爆既消息：

「理想世界成個盟冇左。」

？？？





「下咩話？」

「暫時有報告俾人清左既，除左我之外，全部都係理想世界同日殺，我諗你認得既都應該俾人清左，但係佢地冇入盟既分身全部冇事。」

「你認真？」

「上論壇睇下。」

我咋咋臨郁下個滑鼠，click入私服論壇，頭板差唔多全部都係account被清空既post，夾夾埋埋有成已經廿幾個。再對一對d名，真係清一色理想世界班人，而且除左普通盟員，就連韓修修、光頭和尚、亞格斯、蒼日、韓信等呢批贊助玩家全部都奶晒野，而gm仲未出黎解話。

突然諗起，戰神有隻分身叫輸嬴，都係理想世界入面：

「有冇問戰神？」





「online到而家未見過佢。」

「咁我online先，game傾，byebye。」

收左線，坐係電腦前，合埋眼－－我要整理一下思緒。

一個好明顯既事實：呢單野係針對理想世界集團。

然後，自自然然引申出一個更明顯既問題：關樹咩事？

成個紅樹葉，得樹一個中招。樹有咩咁特別？講贊助，樹把+1000弓一早就冇左，何況我地仲有soso艾爾同薰三把+500法杖都冇事。

講仇家，我真係諗唔到有邊個係樹同理想世界同時得罪－－而我地盟又冇得罪既。

因為如果講得罪，我地紅樹葉同理想世界的確同時得罪好多小盟。單單係用分身入小盟補刀就得罪左好多，我最多只能做到冇證據證明關我地紅樹葉事，但係人地要懷疑，係唔洗講證據。只不過問題係，咁樣既話，理應係清晒我地兩個盟，而唔係樹單獨一個。

但係換過諗法，呢單野最大得益者係邊個？代入大眾思維，唔洗審，正正就係長年同理想世界敵對既我地。

岩岩先話和平一個星期，就黎單咁既野，仆街，容乜易真係被人當左我地係hacker？

我上番線。

一上去就已經見到"艾爾"同"風聲鶴唳"係全球頻道(即係全世界都睇到)同人地嘈緊，內容正正就係我擔心既野。同佢地罵戰果幾個，其中一個我見到個名就想笑，就咁叫"光頭"，又係唔洗審都知乜水。

笑還笑，我唔係幾想理，見人嘈交就覺得煩，我直接關左全頻，剩係留番個淺綠色既同盟頻道：

「紫幽係咪到？有冇中招？」

紫幽回答：「冇事，我地兩個盟得樹被清。」

我問：「樹其實你得罪左邊個？」

樹用緊我隻creamyonion：「冇頭緒。」

紅答左句爹：「佢地咁樣一鋪清袋，其實係咪應該慶祝下？」

暗殺立即附和：「當然！！」

小綠小明都立即贊成，然後同盟頻就係一連串洗板，個個都話要慶祝。

……

橫掂做乜都係俾人懷疑，仲理咁多做乜？把心一橫，順佢地意，就去慶祝囉。

「gogogo，我地去古魯丁pk場開p慶祝下！」