【真人真事】當年中七AL，我打左成年天堂二，但我無悔！: 64-亞丁戰略 (二)
紅樹葉既同盟頻道，由八點正攻城開始一直閃過不停，五六十人每人出一句聲，對話一出就洗走左，眼慢少少都睇唔到大家講咩。
但係唔洗睇，合埋眼都知，呢一刻同盟頻道既對話全部都係：「葉到底係邊？」
喧鬧當中，有人提議：「樹不如你開葉上黎插旗啦。」
樹回答：「唔得呀上次紅玩野之後佢改左password，就係前幾日既事，我都未問佢新password。」
「打電話俾佢啦！」
「電話有冇人聽？」
「call爆佢遺言信箱！！」
樹繼續：「冇人聽呀……睇死佢又好次上次咁較左無鈐無震。」
「狼來了個盟主creamyonion呢？」
「開creamyonion上黎插左旗先啦。」
樹：「果隻同葉同account架屌！」
「……」
其實我根本就係人群入面。
人人都以為樹雙開緊既霸主分身"絕望的哀悼"，一直都係由我控制。我一直係背後監視一切，事情發展同我預想一樣，所有野都係我控制範圍內。
…………「戰神，你第一個任務就係雙開，呢邊用戰神果邊用輸贏，做無間道捉鬼同通水。」
我密"輸贏"，亦即係戰神係理想世界入面既分身：「果邊情況點？」
輸贏：「確定佢地真係有分身係同盟內。as話佢明明收到風係今日開打，而家又係盟內直播緊我地同盟既對話。」
點解我要做場戲俾壬生一族既人入紅樹葉既分身盟"狼來了"？就係因為壬生一族係人都入得，而且以前紫幽同靜心係友好關係，難保理想世界既人有分身係當中做無間道，呢點就連紫幽都唔夠膽保証冇。但係，我估唔到無間道既正身居然又係as！呢個as，n年前已經係我地紅樹葉入面做無間道，而家又係佢！
但慶幸既係，我地有戰神，佢地點都估唔到我都有無間道，呢個gm大佬就係我軍秘密武器！
「sure佢地未知道紅樹葉換左盟主？」
輸贏答我：「暫時佢地未知。」
很好，很好。
然後我將輸贏帶黎既軍情，轉交俾樹同紫幽。
…………「樹、紫幽，俾理想世界知道我今次又唔係到，然後協議一齊玩，亞格斯會肯。」
樹收到情報後，繼續扮野：「咪先咪先，葉聽電話喇！」
一兩分鐘後，樹又係同盟頻講：「頂，佢表姐結婚唔夠人手臨時俾人捉去左做接待！」
紫幽又答爹：「丫，佢好次前幾日係sms有同我提過佢表姐結婚……」
呢兩句說話，唔洗我地主動放出去，as自然會洩露俾理想世界知道。
同時間，盟內媽聲四起，所有人都信以為真。
但係狼來了入面既大綠心水清，問左一句：「冇問佢password咩！？」
樹立即補飛：「屌佢自己都唔記得！！話寫左係張紙到，張紙貼係mon上面喎！」
「車，咁唔洗攻啦…盟主都唔係到，攻左入去都冇得封印。」
「有冇搞錯呀，葉玩左咁多次，我仲信佢今次係真野…」
直到收到輸贏回報「as已經向理想世界洩露情報」後，樹係世界頻道開始向亞格斯、韓修修以及眾人說明情況：
「唔好意思，原來葉今次都係玩下，冇諗住要攻，晒左大家時間真係唔好意思。」
韓修修都未出聲回應，光頭已經率先屌人：「你地個個星期都宣戰唔攻，我地就個個星期都要走黎企，咁即係明玩野姐，照殺！！」
就係光頭準備召龍穿牆開炮之際，紅卻叫囂：「挑你隻抽夠我打先出聲啦！」
估唔到光頭真係俾紅既霸氣攝一攝，即時收聲唔講野！條龍召到一半硬生生中斷，換成韓修修答話：「無論如何我地都會係到守城，如果你地唔攻既話就走罷，唔好係我城門前撤野。」
「下我仲諗住今次真係可以玩下攻城戰…」
「靠，唔攻既話我走先。」
「白守咁多次，又空歡喜一場……」
呢d聲音，一直係兩邊既同盟頻道出現，當然輸贏有份係其中做謠。
紫幽開始佢既計劃：「既然大家都想過下手癮，而家我地兩邊又係攻守方可以合法pk，不如一齊係廣場打一場pk戰？」
自從私服由理想世界一盟獨大，已經好耐冇攻城戰，最近一次真打既攻城戰，就係個靚月前，我地紅樹葉打既一場奇岩戰。再加上樹跌武引發gm禁止pk，根本成個服都好手痕。而拖左三四場攻城戰，剩番落黎呢批堅持每次都守城既人，肯定係最手痕一批。
再由紫幽呢個表面中立既人提議，十之八九會過。
輸贏又係理想世界既盟頻入面補多一句：「老實講，禁左pk之後真係好無聊，上次神喻島雖然輸左但係不知打得幾過隱。」
果然憑呢句說話，亞格斯就上釣，先斬後奏，冇同韓修修商量就答應左！
結果，呢場臨時起辦既"漫畫卡通同盟vs大理想世界"pk戰，就咁係亞丁戰場上舉行！賽事以每場3v3進行，冇buff，職業任選，地點就係亞丁城堡門前既廣場！
韓修修幾咁唔肯都好，就算佢係日殺盟主，都冇可能妨礙盟員既自由，佢就只能夠係城牆上睇住我地打。
樹卻落力扮friend邀請：「做乜唔落黎玩，我地三盟簽左和約咁耐，除左屠龍都未搞過聯合活動，當係友好交流下啦。」
韓修修懶得回應。
………………
「你地所有人繼續係前面講和拖時間做cover。到最後十分鐘就退，樹用sigma zeta，我用sigma alpha，紫幽用葉先衝入去視察，紅、戰神、sigma alpha、sigma zeta五分鐘內破城！」
紅問：「咁封印果陣，點守？」
我既回答：「信者得救。」
………………
攻城戰演變成pk賽，樹同紫幽居然就咁將所有人拖左係門前個半鐘。
時藉九點四十五分，離攻城戰既時間剩餘十五分鐘。
我打開第二個天堂二既視窗，鍵入：
ID:teleport3
PW:TeleporterThree
click一click，打開駐紮亞丁城堡既召喚師，我n年前就已經穿牆放左佢係呢到－－亞丁城堡一個遠離戰場既塔上。
然後再鍵入指令，同火星人小隊組隊。
紫幽控制葉，職業換成高防既騎士，身穿戰神借出既+250物防魔防、手執+1000雙刀。
我控制Σα(sigma alpha)，即係紅樹葉既新盟主，身穿紅果套+500物防魔防，再配上+500地龍耳環，以及戰神既+1000矛。
樹控制Σζ(sigma zeta)，用既係紫幽借出既+1000弓、+250物防魔防。
紅控制Σξ(Sigma xi)，用+2000弓以及戰神既+250物防魔防。
戰控制Ω(Omega)，用自己一套+1000弓+250物防魔防。
呢五隻由戰神、紅、紫幽提供既+1000級別及以上贊助武防，戰力分分鐘可比二十個普通玩家，就係我既主力攻城部隊－－火星人小隊。
背住城門前開p既大隊，我將五人逐個召喚到塔上……
