【真人真事】當年中七AL，我打左成年天堂二，但我無悔！: 66-亞丁戰略 (四)
韓信一直衝，衝到上封印水晶前面，終於都俾佢見到，原來封印緊既由頭到尾都唔係葉，而係Σα！
佢呆一呆，根本未離得及轉目標，一下"強力盾擊"就咁打左上葉身上，然後立即轉換目標，準備向我隻Σα施展連環盾擊，企圖阻止我封印。
大家都係聖騎士，但係韓信用緊+1500單手劍，紫幽控制既葉就只有一把+1000雙刀，根本阻止唔到韓信。任憑紫幽點樣使用"挑撥"，什至連高級挑撥技能"復仇"都出埋，始終都吸引唔到韓信炮火，每一下盾擊依舊係擊向Σα身上。
望住韓信連環盾擊，我個心就一路卜卜咁跳！每一下盾擊，都係宣讀攻城失敗既判詞，只要是但中一下，亞丁戰就玩完喇！！
但出奇地，任憑韓信點攻擊，我根本完全唔受影響，盾擊既暈人效果完全發揮唔到作用，完全中斷唔到我既封印！當下我立即理解，原來係紅當日亂bid果隻+500地龍耳環既強大抗暈效果起緊作用！
韓信連擊幾下，戰神既Ω終於趕到，一炮"死光"，再用埋僅餘既一發最強魔法"雷歐波爾德"，居然仲未死！+1500級別既騎士真係唔少野，Ω連忙出一招"展翼強襲"閃埋黎身邊，再連環"爪攻擊"，加上葉無間斷地使用"裁決"，終於合力圍死呢隻打不死既韓信。
呢邊暫時解決危機，那邊箱，封印室門前仍然在戰－－上演緊既係紅Σξ、樹Σζvs已經番生既韓修修、光頭和尚。
戰神離開崗位後，左門就變成一個大空洞，韓修修同光頭兩人直接衝向左門打算突入。
紅正準備向光頭發箭既時候，樹係電話叫一聲：「先殺巫師！」
紅平日雖然成日搞鬼搞馬，但黎到關鍵時刻絕對可靠。一下箭步跳前就係一發"七箭"，連續七炮射向韓修修，就係最尾一炮擊中既同時，又再黎連環七炮－－右門趕過黎既樹所使出既"七箭"再次擊向韓修修！縱使韓修修有+1500級贊助，巫師始終係巫師，防禦力冇得同戰士比，何況面對+2000同+1000兩把神弓連射？連環十四箭，就咁秒殺左韓修修。
光頭深知佢已經冇可能再突入，立即轉移目標，攻向只有+1000既樹Σζ，打算殺得一件得一件。但係二打一光頭根本冇任何勝算，俾兩隻火星人sm圍殺，樹再飲一飲橙汁，Σζ又變番滿血狀態。
連續擊殺七隻贊助，為封印室帶黎片刻寧靜。
紅抖一抖氣，問：「咁樣遲早會唔夠打，下一波佢地五隻一齊上點守？」
由作戰會議到而家真係作緊戰，紅一路走黎始終如一，都係係到問點守，所以我都始終如一咁答佢：「都話信者得救。」
我唔係唔想話俾佢知，而係，呢個係信任既問題。
係我對佢既信任問題，同時亦係佢對我既信任問題。
紅係最強既玩家，但係我control唔到佢，所以唔可以透露太多俾佢知；相反，如果佢係全心全意咁相信我，亦都唔會反覆質疑到底點守。
事實上，我地已經勝利在望。
擊退光頭等人後，理想世界沉寂左一陣，按道理蒼日等人應該已經復活，卻未見佢地進攻。但時間唔會等人，封印五分鐘既倒數秒錶依然計緊時，大綠等援軍依然穿緊牆入黎，理想世界既主力部隊依然係城門前俾兩隻+500霸主定住。無論理想世界耍咩花招，只要援軍趕到，我地就係贏家。
說時遲那時快，封印水晶前面突然間出現一批人圍住我，正正係大小綠狼來了既援軍。
同時間，輸贏，亦即係戰神，係紅樹葉既血盟頻道傳來軍情：「佢地係內城集合準備進攻正門。」
啊？進攻正門？竟然想解救正門被定身既主力？夠時間咩？
整理一下思緒。而家只係剩番三分鐘，正門有地獄做指揮守住，兩隻+500霸主，艾爾+500巫師，仲有暗殺皇上soso等等十幾個+100。理想世界由封印開始到而家只有兩分鐘時間call人，call到番黎既人應該唔多，但係五隻贊助，仲要有三件+1500，係先手既優勢下突破正門唔係難事。計一計，佢地集合衝出去30秒，解救完後幫班人補buff要近一分鐘，穿番入黎又要一分鐘，攻完正門再攻番入黎根本就冇時間打，毫無勝數。
但係我唔知韓修修想玩咩花樣，愈無勝數既事，可能就愈有勝數。慎重起見，我決定派一隊人去幫手。
就係我準備打字係同盟頻道落命令之際，猛然醒起，仲有as呢個無間度係到！如果我係同盟頻道落命令增援，咪即係等同講俾as聽我地有針插係理想世界！？
人急智生，第二個方法瞬間浮現係腦海中，我係同盟頻道命令：「封印室全人類解team！」
隨即又向電話下旨：「樹你組一隊+100，先爆一個水晶塔，再穿去正門幫拖。」
咁樣做，同盟頻道收到既訊息就只有解team，而唔知我落左咩命令。就算俾到最盡，as只可能由此判斷到我地知道同盟內有無間道，而唔會判斷到我地都有無間道係理想世界入面，睇到佢地既軍情。
咪住！！！諗到呢到，突然間，我又靈光一閃－－韓修修會唔會係想用呢個情報測試一下自己既大理想世界同盟內有冇內鬼？要知道，既然佢地集合緊，佢地大可以集合後直接用普通頻道落命令，洗乜係同盟頻道講！？－但係落左去既命令係收唔番，樹已經極高效率地組好一隊，出左發。
然後，大概一分鐘左右，水晶塔已破，樹既Σζ小隊早已經到左正門，但係正門根本毫無異樣。
「頂咁就俾佢洗走左一隻+1000，仲露埋張，真係白痴仔！」就係我覺得深深不忿，埋怨點解自己落既命令永遠都快過個腦，好唔憤氣好唔gur既時候，突然之間，我面前又空降左一批神兵，十幾人係我面前突然閃現將我包圍！係大理想世界同盟，又係穿牆！！
「護駕！！！！！」我既即時反應同周星馳套韋小寶冇乜分別，唯一唔同係，我冇叫出聲。
就連理想世界都未開弓，Σξ卻最先反應過黎，一發"火焰之鷹"就咁畢直向我既方向射埋黎！雖然明知唔會有事，但係視覺效果實在太震撼，一隻燃燒既神雕向我直衝、撞埋黎、化成一大團火燃燒四周，我差少少以為我會就咁葬身火海玩完！！
但係，火鳥消失既瞬間，我不單冇死，身旁仲多出一大堆燒焦既屍體！+2000弓加上用弓手最強範圍技能，結果係咩？秒殺！群體秒殺！！呢一刻，紅先係真正既「戰神」，可惜，在場冇人知道Σξ就係紅！
受火鳥攻擊而不死既，就只有高防既騎士以及幾隻贊助人。
呢下奇襲真係嚇我一嚇，但韓修修棋差一著，佢算少左，狼來了、以及我，所有人都係咁樣穿牆入黎。所以，在場所有人既位置都重疊晒，呢到大大話話有三十幾四十人圍住係一個格仔咁細既位到，冇人可以點擊到係中心既我，又礙於打唔到我Σα呢個名，即係話，根本韓修修target唔到我，係呢一刻，冇人可以對我進行指定攻擊！
更何況，咁樣集埋一點，最適合就係用範圍技掃場，結果就咁一下俾紅清全場！
隨著紅既Σξ大發神威，所有人都開始亂放範圍技，乜野"箭雨"、"精神裂破"、"墜星術"等放到周圍都係。而戰神同紅，就用預先定好既巨集target韓修修等贊助玩家，一個放箭，一個放死光，遂個驚破。
呢一波奇襲，有驚無險，我地贏左。
樹擊破左水晶塔，佢地要重生就要等成兩分鐘，即係話，佢地已經冇時間再阻止我封印！
除著系統宣讀《紅樹葉成功進行封印》，攻城時間剩下唔夠五分鐘，冇可能再進行下一波封印。韓修修已經輸左，大理想世界再唔係亞丁話事人。
從今日起，我地紅樹葉就係亞丁既新主人！！！