【渠底奇兵】《我，就係踩單車跌落渠果個肥仔》（已爛尾）: 33

而最後我都係喊住咁望住喊包行出左校門。 

但係我唔並唔記得佢既全名。 

或者係我從來都無知道過佢既全名，只係知佢叫喊包。 

連我問媽咪佢都唔記得。仲記得果陣時出睇班相搵番喊包出黎，但係佢只係讀左半年就轉走左。 

連班相都無影到。 



而我只可以好好珍惜喊包送比我既果一個布公仔，掛住佢係我既鎖匙扣果度。 

無論幾殘幾舊都好，我都無拎番佢落黎，直到今日今日。 

我望番既時候都會諗番起一個陪伴我咁短時間，但係令我最最最深刻既幼稚園女孩。 
-------------------------------------------------------------------------------------------
我終於從回憶同震驚度出番黎。 

「原來喊包老……呀……喊包叫做馬家晞。」 



「喂肥仔好似講到我唔係馬家晞咁喎，仲有岩岩係咪想叫老婆呢，肥仔你真係好老土啊。」 

「癡線邊有！！」 

「係咩？冬！仔！老！公！」 

「……………」我即刻紅都臉曬。 

估唔到喊包佢大個左係咁靚女咁可愛架。即係話佢呢幾個星期無啦啦接近我，係因為認出左我係呀冬。 



而唔係想收我兵！！哇Hi 你正呀喂，呢獲真係我老母話我有未婚妻都無咁開心。 

「咁………即係妳認出左我？所以黎同我做朋友？」 

「係呀果日你熱身小先鋒果陣，跌左條鎖匙落地，我眼利一眼望到覺得好似我個公仔。咁咪過左幾日直接黎搵你囉，點知你真係冬！仔！老！公！喎～～」 

佢既語氣唔係咩野好pure好true，而係擺想玩勁我想我怕羞。 

「原來係咁樣啊……呀晞妳可唔可以唔好再叫………」 

「唔好再叫咩野？冬！仔！老！公～～～喊包老婆好掛住你呀～～～～」佢一路講仲要一路扮曬得意咁。 

「…………」 

「好喇唔玩喇肥仔～～估唔到你都幾長情架喎，十年有多都仲掛住左我公仔係身。」 



妳咁都叫唔係玩？長咩情姐，雖然我係，但係想我點答姐？

「緊係啦！咁我個噹噹呢！！？」我真係紅都臉向左走向右走曬。 

「你…你仲記得啊？」反而呢個時候佢有少少口啞啞。 

「緊係記得啦！妳都記得，我會唔記得？～」終於係我佔上風喇！ 

呢個時候佢係書包度拎左佢條鎖匙出黎。 

而果個噹噹，同樣地，係掛左係佢既鎖匙果度。 

「咁……咁我掛左上去耐左，屋企又無轉鎖匙………咪……」 



哇Hi，原來妳馬家晞大小姐都會怕羞架？仲出奇過出奇蛋啊。 

岩岩仲叫老公叫得咁向左走向右走大聲。 

「得啦得啦，知妳長情啦！」 

自從知道左呀晞就係喊包之後，有一種曖昧既氣氛好似出現左咁。 

而家我就同佢妳眼望我眼，大家都無講野。 

「係呢………喊包啊…」 

「拿肥仔我警告你呀唔好係人地面前叫我喊包呀，醜死怪啊！！叫我晞好喇。如果唔係，我走去你Ｄ汶女神雪女神面前大大聲叫你老公架！」 

如果係咁都幾正喎。 



「知喇喊包晞，咁妳轉左幼稚園之後點啊？」 

「哦！仲話唔係緊張你Ｄ汶女神雪女神？肥仔我一睇知你係花心鬼啦！有無諗住溝曬佢番黎姐？」 

「頂妳做咩轉話題啊？！」 

「咩呀明明係你自己轉話題，我帶番個話題番黎，ＤＳＥ口試黎講我係有得加分架呢位同學，我諗你有少少偏離左我地既題目喇。」 

「哇真係英雄所見略同，我見時間都差唔多喇，不如我地約定下年同樣陣容，同樣地點，同樣時間， 一齊番黎重考啦，祝福你地！微臣董超先～行～告～退！！！！！！！！！！」 




呢個時候呀晞佢已經笑到平時大大隻既眼都唔見埋。 



「哈哈，肥仔點解你以前無咁搞笑架？！」而家既喊包，真係唔再喊，而係成日笑容可掬咁。 

真係好啊。 

「咁搞笑呢家野要培養既！」本身識左十幾日既女仔，忽然間變成左十幾年。 

「咁冬！仔！……」 

「我求下妳真係唔好係大家面前咁叫。」我雙手合十一臉祈求。 

「做咩呀冬仔老公～～你係咪唔鍾意喊包老婆喇？嗚啊！～～～你係咪嫌棄我喇」嗲聲嗲氣咁，加埋個可愛少女樣，真係好有威力！ 

做咩忽然間佢會恐怖得咁交關既？！！！ 

「下……唔…唔係？」 

「咁你鍾意呀雪多Ｄ，定係呀汶多Ｄ啊？～」佢真係好有一種食住花生等睇戲既感覺。 

「ＥＲ………」 

「係咪兩個都咁鍾意啊肥仔～～我地諗計溝曬佢！」 

到底咁多年黎，佢受左咩打擊？ 

「喊包妳係咪傻左呀？香港行一夫一妻制架。」 

「哦！你咁講即係你都有咁既諗法啦，今次仲捉你唔到？！」 

「是但啦是但啦，咁妳可以同我講妳轉左幼稚園之後點未啊？」 

「係呢肥仔啊，而家都７點喇，不如我地係度食埋野先走啦～」 

諗落食埋野都幾抵，原來再加幾十蚊又有得唱多幾粒鍾。 

「都好啊，咁我打番去同呀媽講啦」