佢地走左之後,粗口妹又出聲喇。 

「肥仔,今日你做得好好」點解妳總係次次都用唔同既稱呼黎叫我? 

「多謝你粗口妹,唔係妳既強化能力,我根本無可能跑到最後。」 

「有時候有意志先係最重要,強化只能夠加強你既身體,但係唔可以加強你既心。」 

「嗯…」 



「識左你咁多日,今日你表現得最好,最後幫你加速既積分今次就唔收啦。」 

原來最後我奮力去追過呀俊都係因為粗口妹既幫助。 

「多謝…」 

「你條撚樣唔好唔記得手機套就得喇!」 

咁先係粗口妹! 



就係呢個時候,醫療室外傳來左敲門聲。

只見有人偷偷地打開門望入黎。 

係呀汶。 

體育服別注版鍾智汶,哇正到呢。 

佢偷偷地行入黎仲同我打眼色。 



好似自己做左壞事咁偷笑。 

「呀冬…你有無事呀?我等到你D朋友走左先入黎架,佢地睇唔到我架。」 

原來偷偷摸摸就係想避開呀晨佢地。 

同我做朋友,真係咁失禮咁唔可以比人知咩,唉~ 

不過都係既,我地講好左要保密既。 

「我無事喇,而家我都諗住走架喇~我地行啦。」 

就係放雙腳落地既時候我先知自己原來真係完全有事! 

好撚痛呀師父!!! 



差D又黎多個華麗仆街,不過今次有呀汶扶住左我左臂。 

啊!~~~~ 

我隻手臂好似食到呀汶波餅呀,軟淋淋咁質感都唔錯喎。 

唔知呀雪果對……屌做咩諗呢D!

做完曬運動出完汗既呀汶點解個身一樣係咁香? 

係咪不解之謎?!!!手臂感受到呀汶對手傳來既溫度。 

有少少涼,係咪食唔夠呀?果然肥仔只係會諗食野。 



「呀冬你又話無事?唔好逞強啊。」呀汶輕皺眉頭。 

「哈……有少少腳仔軟姐。」其實仲係好痛。 

「咁遲而家學校無曬人喇,我扶住你慢慢行啦。」天使呀汶真係好好人。 

「咪住,咁不如妳著住先啦。」都唔知點解明明係9月,但今日會涼風陣陣。 

我比左件外套呀汶,係我不嬲放定係LOCKER,今日拎左出黎。 

「唔該呀冬~你都幾細心架喎。」 

忽然間我覺得我同女神呀汶之間既距離感縮小左好多好多。 

一個咁好既女仔,見到我有事專登黎等我同扶我,又肯著我呢個肥仔件外套,叫我點可以唔鍾意? 



我同呀汶兩個就好似做小偷咁時快步時慢步咁離開左學校。 

因為要確保無人見到我地,不過果陣都六點,應該無。 

同呀汶一邊行一邊傾計。 

「呀冬你今日做咩跑得咁盡力呀?」 

其實我好想鳩答佢,例如:少壯不努力 老大徒傷悲 

但係諗諗都覺得自己低能。 

「無呀,今日我地幾個心血來潮話要睇下邊個跑得最快,哈哈。」 



「其實呀冬你係唔係鍾意李曉雪呀?」 

原來呀汶都係一個出色既空氣殺手。

「哈哈傻既點解咁講呀?」我當然要故作鎮定咁啦。 

「你無睇D故事都係個男仔因為要追女仔先發奮咩?」呀汶一路扶住我一路講。 

佢既五官同我真係好接近,原來有女仔係唔洗化妝都有咁深雙眼皮同咁長眼睫毛架? 

皮膚好幼嫩而略白,一睇就知係果種文學氣質既女仔! 

「哈哈唔係呀,係呀晨同呀洪話邊個跑輸要請飲可樂咋!呀,呀晨同呀洪即係今日同我一齊跑果兩個男仔。」我真係紅都臉埋,咁廢既大話都講得出。 

話唔定上到蘋果動。 

【某高中某肥胖男學生為飲可樂,狂奔後不適暈到。】 

我連標題都諗到喇。 

「我見到既唔係咁。我見到既係呀冬你當時既眼神,一定要跑第一既眼神。」 

「呵呵…係…係呀?妳都有睇住我地跑呀?」 

「唔止我,我地呢邊個個女仔都望住你地4個跑啊,因為你地班個班長忽然間大聲叫。」 

哇家銘今次真係多撚謝曬,聽日番學一定要謝撚死你先得。 

4個就即係我地鳩跑三人組同埋呀俊啦。 

唔知呀汶妳係睇係我跑,定還是睇住呀俊跑呢… 

咁呀雪呢………? 

「哈哈呢獲出曬醜喇。」 

「一D都唔醜阿呀冬,反而令到我睇到以前既你。」呀汶微笑咁望住我。 

「以前?」 

「小五果陣呢,你記唔記得?果陣李sir要我地做果份勞作?」 

講起果份勞作,我又點會唔記得。 

因為足足做左我三粒鍾,放學都仲做緊。 

係要用一堆火柴去砌出一個塔。其實果陣李sir只係比個例子,十分鐘咁叫我地試下。 

當然結果就係個個都失敗,但偏偏我就死牛一邊頸係都要砌佢出黎! 

後尾先知原來李sir下一堂會教一個穩固既方法去砌。 

而家諗番起都覺得自己on9。

估唔到就快八年前既事,呀汶都會記住。 

「呀汶妳咁都記得?!」 

「果陣時明明李sir話砌唔到就算數,但呀冬你就一直不停試左好耐,試到落曬堂要放學都唔肯走。」 

「哈哈我果陣係咪好傻好天真。」 

「有時做人就應該咁,決定左要做既事就要一股作氣咁完成左佢。」 

原來小五當年同我身為同桌既呀汶都有留意我呢個戇鳩仔… 

諗番自己呢幾年已經唔會再咁,好似一路逃避,hea過咁。 

應該係自中二果一年表白開始變成咁… 

「任務完成:與鍾智汶身體接觸長達五分鍾,加三分。總分十一分。」 

哇估唔到今次咁都得!? 

「任務失敗:設法於明日與李曉雪共進午餐,減三分。總分八分。」 

屌你咩粗口妹。 

但係同時都拉出番我今日略過左既回憶…… 

仲記得下午既時候… 

------------------- 

「喂呀雪一陣食飯食咩呀?」 

「呀…肥冬啊,唔好意思啊今日我都同唔到你地食飯呀……」呀雪雙手合十擺出一副道歉樣。 

「係…係呀?咁放學我地去唔去食tea呀?」其實我估都估到佢今日都係約左呀俊。 

但係我唔想提起咁解…… 

「sorry呀放學都唔得呀………我參加左音樂學會,今日有活動呀。下次好唔好呀肥冬?」 

------------------- 

聽聞音樂學會會長,就係呀俊。 

唔怪得知我係醫療室入面,見唔到呀雪。 

果然我呢種肥毒撚朋友就算幾熟都好,都係唔夠人地靚仔男神重要。
已有 0 人追稿