美國留學點滴: 奇葩Housemate - Micky(1)

唔知大家有冇睇過friends？big bang theory？okok美劇冇睇過，愛情公寓睇過喇掛？

全部都冇睇過，都唔緊要。我想講既主要係上面咁多套劇既其中一個共通點－－一間屋，幾個friend一齊住，仲要相處好融洽，又一齊打機一齊食飯又盛咁。

我話俾你聽，That's why they are TV shows! 出國留學咁耐，俾到我最大最大最大最大最大既生活體驗，就係同幾個陌生人夾份租apartment一齊住，係難過登天。你唔出去同人住過，真係永遠唔會知咩叫做相見好同住難，永遠唔會知唔同人既生活習慣係真係可以咁大差別，更加唔會想像到呢個世界可以有咁多奇葩。

係我同Gennifer兩個人一齊住之前，其實我仲有同好多人一齊住。

其中一個，叫做Micky。





Micky細我兩年，定係三年？whatever我都唔記得左。總之，佢就細過我，無論係精神定肉體上。仲好記得當日第一次見到Micky，係係Walmart入面，佢同另外兩個朋友David同Kevin一齊係到揀緊傢俬，而Kevin就係我黎到美國第一個識既新朋友仔。

果陣一見到Micky，就已經覺得呢個人古古怪怪咁……我又點會諗到end up我地會住埋同一屋簷下？

中間點樣會一齊住就唔講喇。果陣我地六、七個人一齊share一間三房兩廳既大apartment，二千靚三千呎到啦，仲有個公家泳池仔同花園仔，係香港呢間野豪過至尊豪庭架喇！係呢到？普通公寓仔咋，成個單位月租先得果2000蚊美金，八算都係萬六銀港紙一個月咋，死未！？諗起香港成千萬買個五百呎單位真係心酸過心酸的情歌。

唔好意思講講下帶左大家去睇樓，講番Micky。Micky係我呢一生人第一次遇到既奇葩housemate，睇怕都會係最奇葩果個。先旨聲明以下內容全部都係真人真事。

大家黎得美國讀書，係屋企都係大少大小姐黎架啦，所以你唔識洗衫煮飯掃地吸塵－－都唔怪你喇，但我咁大個仔，真係第一次聽過有人係唔識洗頭。係，你冇睇錯我冇打錯，係唔識！洗！頭！一開始咁多位同屋主都冇乜留意，但係住左一排就發現，點解Micky個頭好似日日都打左臘咁既？行過唔小心聞到仲要好似臭臭地喎……終於有一日我地忍唔住問佢：





「喂你……到底有冇洗頭架？」

Micky：「有呀，次次沖涼都有洗架。」

「有洗？點解你個頭日日都咁臘既？洗唔洗換過隻洗頭水？」

Micky：「下？換咩洗頭水呀？花灑果d水有得換既咩？」

………





你地唔係到睇唔到我當時個驚嚇樣………喂大佬mic哥你唔係話俾我聽你十幾歲人中五畢完業考完會考連洗頭水係乜野都唔撚知下話！！！！！！！！oh my fucking god 我係咪發緊夢，神呀唔好玩我啦！！！！！！

係。Micky係唔知原來洗頭係要用shampoo，rejoice廣告賣到咁行，又柔順秀髮又乜乜物物果d，佢以為係女仔先會用既。

大伙兒接受左呢個事實之後，當下另一個housemate，Lavin，就捉左佢入浴室，當場同佢黎個溫on溫洗頭教學教曉左Micky洗頭，然後又花左差唔多半年時間，不停篤促佢：「你係咪又冇洗頭！」之下，Micky終於都學識左洗頭技能Level 99，真係要湯雞還神。

Micky既神人神事當然唔止呢單，而奇葩housemate當然亦唔止Micky一個，不過篇幅有限下期待續。