Gennifer係我大學時候既roommate。我同Gen一男一女,share一間一房一廳既apartment,由入大學開始就一齊住,相安無事住到畢業散伙。幾個朋友一齊住,對於我地留學生黎講係常見既,不過男女同居呢段經歷,就經常引起老死Steven好奇。

Steven問我:「你地真係咩都冇發生過?」

咩都冇發生過?我地發生過既事實在太多。一齊煮飯仔、一齊對啤傾計通頂、一齊上山睇星星、一齊去clubbing、一齊同tutor駁火、一齊幫對方做功課,但係到最後佢都會番入自己房訓,而我就會訓番自己擺係廳果張床--唔記得講,咁多年都係佢訓房我訓廳--我地真係咩事都冇發生過。

「冇,真係冇,好朋友only。」

Steven追問:「定係神女無心咋?」





呢條問題著實有點兒賤格,因為佢連問都唔問就假定左前一句,我澄清:

「襄王都冇夢!」

之後佢又話:「挑,繼續扮囉,我真係唔信。」

平心而論,Gen相貌唔差,身材好得不得了,佢既selling point絕對唔止我係女人咁簡單。所以Steven對Gen好高評價:

「老老實實你roommate真係好掂,十個趣我俾爆趣。你地日對夜對咁耐可以一d野都冇一係佢les一係你gay,但係你地又唔係,所以根本冇可能。」





講到尾,Steven都係唔相信男同女係真係可以做到朋友咁簡單。

Steven貫徹佢既信念,繼續問:「如果Gennifer肯俾你你係咪唔要先?」

呢條問題真係好難答,要沉思下。如果我真係同Gen做左,我仲可唔可以當佢係我朋友?問心,好難,我細佬不嬲都唔聽話,食過一定番沉味,sp仲叫唔叫朋友?但係我又忍唔忍到唔同佢做?問心……咪住,點解我要忍先?佢冇啦啦話俾我,呢件事本身就唔係朋友所為啦。我突破左盲點!!!

「佢當我係朋友既話,佢就唔會俾我。我當佢係朋友既話,我就唔會追佢。大家都清楚介線係邊到,就好似搭地鐵stand behind the yellow line一樣,此乃朋友相處之道也。所以如果Gen真係肯俾我,即係佢已經唔當我係朋友!咁我同佢亦都冇friend做!」

講完之後我覺得自己真係無械可擊、堪稱完美,絕對可以收Steven皮。但係Steven聽完後立即爆左一句:





「你估下你地長期一個冇仔一個冇女,仲stand唔stand到behind the yellow line丫那?」

um...今鋪我真係俾佢問到口啞啞。

Steven見狀,就以大師姿態發表偉論:「挑,話左你架喇。人呢同動物就冇分別既,一個雌性一個雄性擺係間房到擺得耐就自然會扑野架啦,定律黎架。你地冇野發生,係因為各自有另一半搏住左姐。所以話你地都冇腦既,為左一棵樹放棄晒成個森林,係得d老到爬唔郁既樹懶先會咁做架咋,男人天性就係要播種架啦。」

我無意繼續講落去。係Steven既偉論面前,呢份少少既堅持係顯得幾咁卑微同可笑。
已有 0 人追稿