簡介

到底 我女朋友係消失左定係我根本無女朋友...



《到底 我女朋友係消失左定係我根本無女朋友... 》

一起身個世界好靜,都係既。

我從來都係一個人住就緊係靜。至少我記得係咁。

但我望住張雙人床,望住屋企成雙成對既野,我又好似記得我的確係有個女朋友。

佢既樣我唔記得,但我記得我同佢周圍玩既時光,可惜個畫面好抽象。



我打開手機翻開屋企相簿,一張佢既相我都搵唔到。

呢個時候,我發現床頭上有張紙寫住:「i love you 」

呢一刻,我知道我真係有女朋友。

究竟你去左邊我好擔心你呀,我對住塊鏡咆哮。

點解我會諗唔起有關我女朋友既野,但係我的確實實在在感受到我地係曾經有好多回憶。



我坐係張床到好細心諗左好耐,唔通係我女朋友比我既驚喜?

但無可能,無理由我腦既記憶會唔見埋。


我再諗,唔通我女朋友真係係呢個世界消失左, 而物品只係仿彿佢曾經留係呢個世界既痕跡...

我好驚,我好怕。 我真係好擔心我女朋友去左邊。

我瘋狂咁打晒比咁多個朋友問佢地有無我女朋友既消息, 但個個朋友都笑笑口話咪玩啦,就收左我線。



我好無助,我行到鏡前面,回憶我同佢既時光。

女朋友呀,究竟你消失左定我根本從來都無女朋友。我問塊鏡。

塊鏡無答到我,但我見到佢笑左一笑。



「bb快d聽電話啦」 電話既鈴聲劃破左我既思緒。 同時我更加肯定我係有女朋友,一定有。

「喂,你究竟去左邊呀,你知唔知我有幾擔心你呀,你知唔知呀?」

我拎起個電話痴晒線咁叫。 電話好快就黑左mon。呢一刻我突然好冷靜。



我知道一定係你太擔心我先會打黎再咁快收線,一定係咁。

我坐左係床上面,摸住你日日都訓既枕頭,我好似感受你係我身邊。

我好似感覺到你輕輕咁拍一拍我,叫我快d去搵你...

但係我諗黎諗去都係諗唔到你既樣,點解你同上天都要對我咁殘忍,

你走左,但點解個天連回憶都要拎走埋...點解要咁?

我真係無晒方法,我唯有拎起個電話再一次搵下有無d咩線索。

相簿無, 電話簿無,

連通話紀錄都係133



我再一次失望

我再一次坐係塊鏡前面

亦再一次望住佢笑 但今次電話無再響

今次 我見到鏡入面佢唱起歌黎

除非你是我 才可與我常在 一個人 從鏡內發展恩愛 一個人...還是兩個人..

唱下唱下, 我見到塊鏡流淚...


佢唱左好耐好耐。 我見到鏡入面既佢一邊唱歌一邊喊,



見佢喊得咁犀利,我就慢慢幫佢抹眼淚。

但係越抹佢喊得越多,慢慢我低下頭見到自己件衫濕晒。

整間屋只係得d嗚嗚聲同大力既呼吸聲。

我想安慰佢,唯有問下佢

「你做咩喊呀? 」

「你女朋友又係唔見左呀?」

「你唔好唔開心啦,我地一齊努力搵返佢返黎啦。」



我望住塊鏡...
塊鏡望住我...
我望住塊鏡...
塊鏡望住我...

「無錯…你從來都無錯過。」佢講。

「點解我不斷咁努力去忘記你,但你始終唔肯係我腦海消失。」我答佢。
__________________________________________________________________

「書,你又讀得唔係好過人,得個中學畢業? 」
「工,叫左你幾多次搵份好d既,你幾時有聽過我講? 」
「上進心呀,點解你咁無上進心呀?」
「你自己照下塊鏡,碌大隻眼望住呀,點解你個人可以咁失敗呀?」
「你話比我聽,你個人有咩叻? 」
「唔係呀......」
「你唔洗答我啦,過兩日我會執埋d野走,我以後唔想見到你。係咁。」

我望住塊鏡,聽住佢第十二次重複佢同佢女朋友分手時既對話。

流離在某月某天某地 仍自覺共你一起 從未來再見 遺憾舊時不太會戀愛


我望住塊鏡,佢一邊講一邊企起身行去窗口打開窗花。

望住樓下萬花筒既景色,我既思緒亦都好清晰。

我知道我係有女朋友,只不過佢已經永遠消失左...

唔係...消失左既唔係佢,而係我。

再見 仍舊未能跟你再戀愛…
已有 0 人追稿