A宣佈完畢後,車門打開,很多乘客衝出車廂。
「而家點?」金髮青年問。
「唔好急,愈急只會愈亂,我諗住上去大堂睇下先,一唔一齊?」阿謙回答。
「好,我諗而家多個伴會好啲,係呀,我叫阿發,點叫你?」
「我叫阿謙。」他們輕輕握了手。
「不如比我同你地一齊呀?」中年大叔說。
「冇問題,點稱呼呀?」阿謙微笑。
「你地叫我強叔啦。」
「好啦,強叔,我地一齊上去望下。」





三人乘扶手電梯到上層大堂,一向很多人的九龍塘站顯得比平日更擠,而四處也有穿著黑色衣服,手持槍械的蒙面人把守。
「嘩 ... 真槍黎嫁喎 ...」阿發面色發青。
「你點知?」阿謙問。
「我平時有玩Wargame,見唔見左邊嗰個拎住MP5嘅人,普通Wargame槍個槍嘴冇咁大,入面肯定裝左實彈 ...」阿發解釋道。
此時,遠處數個MK青年試圖逃走 ...
「砰砰砰!」數下槍聲響起,他們一個個倒下 ...
「嘩!」尖叫聲四起。
「都話左係真槍嫁啦 ...」阿發的臉由青色變成紫色。
「呢度睇黎好危險,都係落返月台先啦 ... 命仔要緊呀 ...」強叔說。





三人再次回到觀塘線月台 ...
「鈴 ...」三人的手機同時響起。
是E-mail,阿謙打開郵件,內容只有兩個選項,代表路線和開始車站。
「就係呢個E-mail ... 你地諗住點揀?」阿發問。
「佢係跟我地原本要去嘅路線 ...」阿謙說:「你地本身係由邊度去邊度嫁?」
「我由黃大仙去深水埗。」強叔說。
「我就係由九龍灣去沙田,本身就係諗住九龍塘轉車,唉 ...」阿發嘆氣。
「咁之係強叔可以揀觀塘線、東鐵線同荃灣線,而阿發就係觀塘線、東鐵線同馬鐵線。」
「阿謙你呢?」阿發問。
「我呀 ... 我觀塘去青衣 ...」




「嘩!咁你咪可以揀好多條線?」
「係 ... 觀塘線、東鐵線、荃灣線、西鐵線、東涌線同機場快線 ...」
「咁不如我地一齊揀同一個車站啦,就九龍塘啦好冇?」強叔提議。
「唔好,九龍塘太危險啦!」阿謙立即反對。
「下?點解呀?」

「九龍塘本身係轉線站,東鐵線同觀塘線嘅人會溝埋一齊,雖然唔知控制地鐵班人想點,但比得我地揀分線同分站,好有可能會一條線打另一條線。
如果係咁,轉線站就會最危險,所以我地應該揀一啲唔係轉線站嘅,會安全好多。」阿謙解釋。
「又好似有啲道理喎 ...」強叔點頭贊同。
「咁阿謙你有咩提議?」阿發問。
「我覺得可以揀返觀塘線,一來成條線車站多,線路亦比較短,成條線嘅支援會比較多,另外,觀塘線全部都係島式月台。」
「島式月台?」
「之係月台係中間,路軌係左右兩邊,咁嘅話兩邊有車黎都會知,走佬都快啲,
唔似得灣仔銅鑼灣啲側式月台咁,只係知道一邊行車線嘅情況,仲要走上走落,好唔安全。」
「有道理!」




「阿謙,你識好多野呀!」
「邊係,只係平時搭得多啫。」
「咁不如我地揀返黃大仙,點睇?」阿發提議。
「如果想我地三個同一個站嘅話,樂富同黃大仙都可以。」阿謙說。
「咁就黃大仙啦!」強叔在E-mail輸入了觀塘線和黃大仙站。

此時,停在月台的列車傳來廣播:
「請選擇本站至調景嶺站為開始據點的乘客盡快上車,列車將於一分鐘後開出。」
「我地上車啦!」強叔先行上車。
「好。」阿發完成輸入後也走上車。
只有阿謙停留在原地。
「阿謙,快啲啦!」強叔揚手。
「請勿靠近車門 ... 嘟嘟嘟 ...」車門準備關上。
「啪 ...」門關上了。
阿謙徐徐地走到車門前,跟阿發和強叔輕輕揮手。




「阿謙!你想點呀?」阿發拍著車門大叫。
列車駛離月台,只剩下阿謙一個。

「阿發,強叔,你地要加油,要捱到最後 ...」
阿謙看著手機螢幕 ...
「打機玩得extreme,呢個生存遊戲我都要玩extreme,人一世物一世,最緊要無悔。」
阿謙在E-mail輸入:
西鐵線 ...
美孚站。

十五分鐘後 ... 荃灣線美孚站月台 ...
阿謙下車,往西鐵線方向走去。
他為何選擇獨自行動?真的為了挑戰難度而已?
他走到往屯門方向的月台,人數比平日繁忙時間來得少。
他找了一個空位,坐在地上,拿出PSV,打開fifa遊戲。




「只要有機會入到錦上路,就會安全得多,玩,都要玩得有技巧。」阿謙心想。

他的想法是:如果各線路的人互相攻打,這樣防守是其中一個重要指標。
荃灣西至錦上路站的行車時間是六分鐘,若果前站,被其他線路的人攻佔,需經過一般較長時間才能到達錦上路及較後的路段。
換言之,生存的時間將會變長。
而且錦上路以後的車站月台設計,大堂在月台下方。
當地鐵站各出口已被封閉,敵人只能乘列車到達。那麼下樓梯遠比上樓梯來得快。
阿謙把這小細節也算進去。
「觀塘線唔係唔安全,但西鐵線咁難攻,我唔信其他線嘅人咁快想打呢條線主意 ... goal!」阿謙使用的拜仁慕尼黑入球。
阿謙的如意算盤,能成功打響嗎?

到達黃大仙站的阿發和強叔 ...
「屌,個阿謙都唔知係咪呃我地 ...」阿發抱怨。
「係囉 ... 不過佢啲分析真係好似好有道理咁 ...」
「咪就係比佢啲唔知係咪道理嘅道理呃左囉,分分鐘佢搵到個更加安全嘅車站做據點。」




「而家都改變唔到啲乜,唯有見步行步啦 ... 喂,有冇發覺黃大仙站好似少左好多人?」
「又係喎 ...」

阿發和強叔走上大堂,聚集的人數遠比九龍塘站少。
「少左咁多人,計落我地有賺。」強叔說。
「係,我記得阿謙好似話,佢本身係觀塘去青衣,」阿發開始思考起來:「佢好大機會去左另一邊,荃灣線嗰邊。」
「荃灣線好多轉車站嫁喎 ... 佢頭先明明話轉車站會危險好多 ...」
「我就係諗呢個問題 ... 青衣、荔景、美孚、太子都可以轉線,我諗佢唔會揀,咁就得返石硤尾、深水埗、長沙灣同荔枝角 ...」
「呢四個站 ... 會唔會係長沙灣?夾係啲轉車站中間 ...」
「好大機會,而且呢兩個站我地兩個都去唔到 ...」
「仆街!呃我地!自己搵好地方!」
「岩岩都見到有人死,去到呢啲時刻仲邊會理人,係人都為自己先啦,強叔,我地一於好好合作,生存到最後。」
「好!」
錯誤估算的阿發和強叔,能生存到最後嗎?

其他線路,也有人具備詳細計劃,準備這場突如其來的生存遊戲嗎?
中環站裡 ...
一個穿著灰色西裝的上班族,站在公共電腦前 ...
他從口袋拿出手機,打開E-mail ... 輸入 ...
荃灣線 ...
中環站。
「富貴險中求,人愈多,愈好玩 ... 嘿嘿 ...」
他是一所著名金融公司的金牌經紀,徐銘驊。
每天在金融市場打滾,儘管數千萬上落,對他來說,也只是普通數字而已。
現在,才是一個真正的,實在的戰爭。

同時 ... 在筲箕灣站 ...
一個身穿黑色夾克的銀髮青年,站在大堂一角,一手拿著手機,一手把玩著瑞士萬用刀 ...
手機頁面顯示著他的據點選擇:港島線 ... 筲箕灣站 ...
他轉換頁面,看著Whatsapp對話:
「Ciro,我好掛住你呀,你係邊啫?成日都唔理我 ...」
「Ciro,今晚飲唔飲酒呀?」
「Ciro ...」
「Ciro ...」
「煩死人 ...」Ciro 自言自語。
他環看筲箕灣站,人數遠比其他車站稀少。
「快快手手玩完去飲酒,乜叉野生存遊戲,阻撚住晒!」

各人開始據點如下:
阿謙 - 西鐵線美孚站
阿發、強叔 - 觀塘線黃大仙站
徐銘驊 - 荃灣線中環站
Ciro - 港島線筲箕灣站
已有 0 人追稿