明明早該放手 但有眼看不到: 第二集

上網睇過分班，知道自己係5E既我…依然都係唔識路既，於是就是但揾左條友問路啦。

我：同學，唔好意思，我想問5E課室係邊？
X：你就係新同學？我地同一班喎，我帶你番課室啦！

唔係講笑，真係是但搵條友講野都撞到同班同學，呢獲真係出門遇貴人喇。
兩分鍾既路程當中，我地都傾得幾埋，原來佢叫呀文，全名陳梓文。
佢高過米八，不過我諗佢無巨棍掛，人地話五短總有一長；五長總有一短嘛。

終於去到課室，因為今日第一日，所以我提早左唔少，眼見入面只係得幾個人。


而正當我諗住訓陣既時候，有一條岩岩入黎既囡囡，馬上吸引左我既目光。

佢係一個眼鏡娘，一睇就知係讀書樣，對眼就唔大，不過副眼鏡好大，好似放大埋對眼咁。
身材睇落都凹凸有致，條馬尾又幾長，目測身高應該有一米六五咁啦，唔係講笑，十分都有八分架，可以話係女神級。
望落佢咁文靜，我覺得呢種女仔一定係＂中學生不應談戀愛＂理論既支持者，所以都係望一陣就算喇…

過多一陣，其他同學慢慢番到黎，當中有唔少人，好似對我充滿興趣。
所以老師未到我已經識到兩個人。有個叫李彥琪，係一個幾TALK得既男仔，另一個就叫呀聲，份人睇落幾友善幾正常咁

不過老師黎左之後，都係要我自我介紹。



我：大家好，我叫張樂晨，今年…三圍…性取向…

講完一大堆廢話，就緊係要調位啦，一向唔好運竟然仲係咁唔好運…
我旁邊係一個叫做呀言既毒撚。點解話佢係毒撚？事關佢個樣…真係好撚毒…
未熟環境既我，當然就係咩都唔做，等人撩我傾計啦。
而我後面既正正就係今朝見到既陳梓文，同埋眼鏡娘…
佢就正啦，有得同靚女坐…
再望望旁邊條毒撚…



陳：喂張樂晨，係度有無好唔慣？
我：都OK呀，班同學都好NICE呀。
陳：咁就好喇，我話你知，咪睇我地學校普普通通，其實好撚多靚女！

我都仲未講叫佢介紹我識，佢左邊既眼鏡娘已經開口：你唔好同新同學講Ｄ咁既野啦！

陳：馮芷欣，我講事實姐,哈哈
喂原來眼鏡娘叫做馮芷欣，又幾好聽喎。

話咁快成日就咁比我HEA左，而我都識左唔少人。
一番到屋企，屎忽都未坐暖，手提電話就響起喇 ....