『假人真事』我的宅男脫毒日記: 3.女神

「我一定唔可以好似師兄咁！」 

話雖如此，但係我連女朋友都未有。同師兄真係差十萬八千里，我望住前面上緊堂嘅同學，個個都肥矮柒毒，重要係全部都男人。 

突然有一班人係門口入嚟課室，其中一位身穿黑色套裝，黑絲，黑高跟鞋，頭髮扎起一個婆仔髻。佢入黎坐左係課室最前面，身邊一早有體貼嘅男仕留位比佢。 

我問身邊嘅文西，攪乜野咁大陣仗。 

「佢哋好似選工程系莊。」
「哦。」



 果位女同學就係全班唯一一個女仕。上至老師，下至同學，都對佢百般呵護。

佢同我一樣，都係副學士升上嚟。唯一唔同，係佢係女人。聽講佢GPA 唔係特別標青，果時interview，有人傳佢帶埋全家一齊去見教授，掹地板。而我，同佢傾計嘅句子唔超過十句，但佢一舉一動都會傳遍整個學系。

 我望住眼前咁淒涼嘅景象，我問旁邊既文西：
「係我地班成功拍施嘅機會有幾多？」
「同放工時候，係九龍塘站一班車就上到車嘅機會率一樣。」
「頂！咁咪姐係同冇。」 



文西點點頭。跟住又話： 
「你可以出去搵。」
「出去邊度搵？」
「工程系出面。」