到我第二日醒來的時候,我發現巴基兄已經一早係佢自己張枱度溫書. 巴基返嚟嗰日就係我同Crystal 食飯嗰日. 因為當時既我冇咩心情同人傾計,所以同巴基都只係簡單地咁介紹咗自己. 我同佢打咗聲招呼,然後起身準備去廁所度梳洗. 

"噚晩咁夜返嘅?"
巴基一邊講一邊露出好猥瑣既笑容. 

"冇呀. 噚日跟團上咗去山頂." 

之後,我就同佢講返噚晚發生過既事. 當佢聽完之後,佢就話: 

"我以前都發生過一些類似既事情. 當時我同幾個朋友一齊行龍虎山,突然之間出現咗一個着住白色衫既老人. 我同幾個朋友都見到佢一枝箭咁跑咗上去樹林嗰邊,然後就消失得無影無縱." 



我聽完都唔知俾咩反應佢好. 究竟佢講既野係真呀,定係佢想作啲野嚟串我呢? 

講完之後,巴基話要鋪張毯嚟進行禮拜, 咁我就唯有走去廳坐啦. 

嗰陣啱啱完咗ocamp,所以啲sofa同枱都已經搬返哂去common area. 當我行到去common area 既時候,我發現己經有幾條友坐咗係度食早餐.  

我: "Hi" 

"Hi. My name is Ben. What's your name? " 



我:"我叫阿Ming." 

Ben:" 喂,識講廣東話既?" 

"Ben 你真係好on 9 呀. 你唔俾人係大陸嚟嘅." 

我:"啊...其實我係香港人嚟㗎. 只不過我好細個就移民去外國." 

"吓,點解你會選擇返香港嘅,"另一位樓兄弟説道. 



我:"太耐冇返想返嚟玩吓囉. 又可以住宿舍,又可以用獎學金嚟玩,何樂而不為呀?" 

"你好呀. 我叫阿一,係呢層樓既樓主. 如果你有咩問題可以隨時揾我㗎. 佢地平時講野都係咁㗎,所以唔好見怪.等我同你介紹, 剛才同你講野嘅有阿Ben啦,阿牛啦,同阿火. 佢地都係呢層樓既大仙." 

我: "大仙?嗰名咁得意嘅?" 

阿火: "大仙係指嗰啲住hall 年資比較高而且又過咗o 既人. 不過你其實都唔太需要知呢啲野呀,因為你都唔會係度長住." 

阿一: "話哂住係同一層樓,都算半個樓兄弟啊,friendly 啲好唔好?" 

阿火:"Sor." 

然後,阿一就對着大家講,"記得我地今晚有樓飯同樓會呀. 樓會主要都係要同啲nonlocal 講返佢地要為樓做既野. 好似交樓費呀,保持衛生整潔嗰類啦." 



我:"樓費?唔係已經交哂俾辦事處咩" 

阿牛:"嗰啲係for hall ga.樓費係for自己嗰層既曰常資出. 好似雪櫃入面啲維他呀,仲有如果層樓想換電視呢啲都係樓費包嘅."

阿一:"呢啲我地今晚再詳細講解."

因為噚晚行到好攰,而我又冇咩特別事要做,所以我最後都係決定係房打機.  

本來我諗住一野抽射入網,點知無啦啦有人敲門,最後搞到我輸 1-0. 當時我的確有啲嬲,所以我即刻開門諗住問候敲門嗰個人啦. 點知... 

"你...係唔係敲錯門呀?" 

企咗係我前面既係一個樣子好清純既女仔. 佢手拎著一本好細既藍色手冊,然後細細聲咁問我:"可唔可以同我做個訪問呀?"

有女仔訪問我喎, 梗係無任歡迎啦. 因為地方細既關係,我就請佢到我張床度坐. 



"我叫倩雯呀. 唔知大仙你點稱呼呢?" 

我:"Sorry ah. 其實我唔係大仙嚟㗎. 我都係剛剛過來exchange. 乜呢個訪問一定要同大仙做㗎咩?" 

雯:"都唔係嘅,佢地呢度都有一part係要訪問啲nonlocal... 咁交到貨就得啦."

說完之後佢望咗我一眼,然後就好尷尬咁望住個地下.
 

嗰一刻我真係差啲笑咗出嚟. 我覺得好笑既原因係因為我覺得呢個女仔好pure. 佢嗰種天真既性格我諗只有freshman 先會有.  

我同倩雯傾咗一陣,巴基兄就開門入嚟. 佢見到倩雯坐咗係我張床度,所以就扮放低書包然後諗住離開. 

我:"喂去邊姐,freshman 做訪問呀. 倩雯,介紹你識,呢個我同房." 



         

嗰晩我並沒有跟其他樓兄弟去食樓飯.原因係我出去嗰陣佢哋已經走咗喇.
 

可想而知,non-local 同local 其實係存在好大分歧. 佢哋都會各自各有自己既活動. 所以,嗰晚我就叫埋法國仔一齊去試樓下既canteen.     

$18嘅單拼飯,半肥瘦既义燒,食落去竟然仲俾起位於皇后大道西既燒臘粉麵店更加入口即溶. 以我食咁多年燒臘既經驗,canteen 入面既义燒飯真係唔差.
 

但唯獨是我最唔滿意係個收銀員. 講廣東話唔識聽,英文又唔識聽. 最後仲要搞到我行咗去門口旁邊嗰部機度落單... 

返到樓之後,先發現原來佢地已經開始咗樓會.  

我見到大部分non-local同班新仔都係圍住個common area企, 所以我同法國仔就同佢地一樣咁棟咗系個走廊位. 

我觀察一下周邊既環境,發覺原來除咗Ben,阿牛,阿一,阿火之外,佢地啲同屆坐哂係sofa度.可想而知,阿Ben 佢地四個係呢個樓層裡面其實都係舉足輕重. 



阿一分別叫啲新生同non-local自我介紹. 而當阿一叫到我既時候,我都未自我介紹,佢就用廣東話講:"呢個阿Ming,識講廣東話既nonlocal,剛剛由外國exchange過嚟嘅.記住下次逢禮拜四食樓飯呀." 

我:"哦." 

完咗樓會之後,我就咗去同阿一傾計. 

我:"其實下次食樓飯前可以敲下我棟門先. 如果唔係我都唔知你地出咗去食樓飯." 

一:"你閂埋門我鬼知你係唔係打緊飛機呀. 你都見到我地呢邊翼嗰啲房門全部都係開哂㗎. 搵人嗰陣都方便啲嘛." 

我:"乜你地唔驚有人會偷你野㗎咩?" 

一: "做得兄弟最緊要講個信字. 況且兩邊翼都有装cam,啲人唔會亂咁嚟嘅."


估都估唔到既係,完呢句說話唔夠幾個星期,阿一部電腦就無啦啦係hall入面消失咗.
已有 0 人追稿