超靈視雜誌社: 一章－異國小精靈（完）

一個星期後，我為了兩個原因，決定到訪紡瑩工作的地方──超靈視雜誌社。
 
雜誌社在大學附近的一棟商業大廈內，只是租了一個單位。大廈外面沒什麼招牌之類的，十分不顯眼。
 
我搭升降機來到四樓，再走數步便看到了雜誌社的玻璃門。玻璃門後掛著一隻等身大的小灰人布玩偶，一雙大眼睛好像在告訴我：識趣的就快點離去吧。
 
我按下門鈴，不消一會便來了一個女孩子。
 
「紡瑩，好耐冇見喇。」
 




紡瑩看見我後，驚訝地說：
 
「咦，阿翔，點解你會係度既？你出左院嗱？」
 
「係呀，好少事啫。不過如果唔係妳，我諗我唔係度架喇。」
 
「緊係！你知唔知我幾擔心你！做乜行動之前唔同我商量啊！」紡瑩一邊開門，一邊在訓話。
 
「對唔住。」
 




「你請我食返十個 cup cake 我就原諒你啦！」
 
「嗯，冇問題。」
 
「不過都係全靠你，我先夠料寫好七月份既稿。如果唔係又俾社長鬧架喇。」
 
走進雜誌社後，我環顧四周，發現整個工作間只有紡瑩一人。
 
「係呢，妳地雜誌社社長係邊？點解全間 office 得妳一個？」
 




「哦，佢最近心情唔好，好少出現。不過其實講到底，我地呢度連埋社長都係得三個人啫。」
 
只有三個人的雜誌社？會不會太過兒戲。
 
「咁妳知唔知我可以點搵到妳地社長？」
 
「呃……霜姐姐可能會比較清楚。」
 
霜姐姐？這個不好的預感，不會是她吧？
 
「冇錯，我知道社長而家係邊。」
 
這聲音，果然是杜霜虹女王。
 
「霜、霜姐！點解妳會係度既？」




 
「見到大姐姐係唔係好開心？」女王接著說：「社長係樓下咖啡店等緊你。」
 
「吓……但我唔知道妳地社長係點樣喎？」
 
「「怪人」」女王和紡瑩異口同聲地說。而我只好搭升降機回到樓下咖啡店看看。
 
來到了咖啡店，店裡面的正中間正坐著一個怪人。
 
我向那個男人走近，問道：「請問你係唔係超靈視雜誌社既社長？」
 
「嗯。你就係樂介翔？坐。」男人的聲線十分低沉，有飽歷滄桑的感覺。他接著說： 「我叫藍莫，係超靈視雜誌社既社長。」
 
藍社長看起來四、五十歲，留著長頭髮，身穿白色長袍，有一點瘋狂科學家的味道。
 




「你好，藍社長。」我向他點頭說。
 
看不出藍社長有任何表情，他冷冷地說：「我不妨單刀直入。關於上個星期發生既事，結果係點你知幾多？」
 
「大概知道……最後失蹤既人全部都搵得返。不過失蹤嗰段日子既記憶就冇晒。佢地所有人都唔知道究竟發生咩事。」
 
一切有關背後真相的蛛絲馬跡都消失了，包括網上「Etiäinen 研究會」的資料。
 
「警察打算就咁結案。連上個禮拜你差啲死既事都唔提，只係當做普通既舊工廈火警。」
 
「咁都好難講既……當晚實際上發生左咩事，我自己都唔係太清楚。」
 
藍社長沉默了一會，望著窗外面，問道：「我嗰女，弦玥，佢最後同你講左咩？」
 
「欸？弦玥係社長個女？」




 
社長沒有回應。
 
「……弦玥佢最後交低左呢樣野俾我。」
 
我把手上弦玥的戒指除下來給他看。社長拿起來看了一看，然後慨嘆地說：
 
「原來已經完成左……」
 
「社長知道呢隻戒指係咩野？」
 
「量子電腦。而家你先好好保管住佢。」社長把戒指交還給我。
 
「但係呢樣係你個女既……遺物。我俾返你會唔會好啲？」
 




「遺物……呢。」社長苦笑著，說：「當晚火警之後，警察徹底搵過晒成棟大廈，但係都冇發現任何人既屍體。」
 
「咦？但係弦玥明明係我面前……」
 
「你肯定佢係弦玥？」
 
──說不定那只是她的分身。
 
我凝望著手上的戒指，下定決心，說：「社長，我想係雜誌社做，剩係暑假都可以！」
 
社長沒有考慮的樣子，很隨便地回答：「嗯。你去搵霜虹。」
 
 
就這樣，從今天起我便是超靈視雜誌社的一員。也許有一天，當我明白手上戒指的意義，我有機會可以再見到妳嗎？