再一次愛上沒有放下的舊情人: 二十七

身邊既Karen醉到坐左係到，呀Wing老豆見我只係照顧佢，亦都左去，而呀Wing就留左係到

「你係邊個」Karen望住我問，聲線顯得佢已經醉，而且認唔出我

我攬住佢，無出聲，怕佢認得出我

點知佢推開我，然後話：「你走開呀，我有男朋友架」

我之前咁對佢，佢都仲要專一咁對我，反而我就懷疑佢，心裡又是一酸



我諗，如果我飲醉左，可能唔會講同一番話，反而係見到靚女就攬

眼前依個女仔，其實愛我多過愛佢

「佢醒左你好哄番佢啦」呀Wing望住我，笑住講

「我係呀成呀」我望住Karen說，佢聽到之後又驚又喜咁望住我

「你係..呀成？」Karen質疑說



或者佢好驚訝我點解會黎左搵佢，由佢既表情同眼神，可以睇得出佢內心充滿驚喜

「你黎做咩」Karen表情一變，雙眼又再一次通紅地向住我講

「我？我黎接你走囉，你睇你呀，搞到人啦」我試圖哄著佢說

「你都唔信我，點解要黎接我，你走呀」

Karen一邊拍打我既心口，一邊大吵大鬧



「我唔係唔信你呀，我知道你對我好專一架」我嘗試令佢冷靜

其實聽到佢岩岩咁講，我已經知道我錯怪左佢

「跟我番去啦好無呀？」我見佢無出聲，接著說

佢依舊無出聲，攬住我，我望住呀Wing，希望佢可以幫我，但佢只係一面無奈

「我地番去啦」佢搖著頭，不過見佢眼神開始動搖，我就繼續說服佢

「你再唔走會搞住人架啦」佢望住呀Wing，然後點點頭

我見佢就範，於是就抱起佢準備離開

「我送你地去搭車呀」呀Wing說，可能佢見Karen醉到咁我一個人會搞唔掂



我亦都接受佢既好意，我同佢一齊抬Karen上的士，然後就目送我地離開

番到去，我咩都無理，幫佢換好衫就扶佢上床，免得佢一身酒氣咁上我張床

唔知幾時開始，佢已經醉到訓著左，我亦都唔想整醒佢，係佢身邊望住佢

Karen臉頰醉得紅紅的，我亦都被佢既樣迷倒，我細細力錫左佢額頭一下

正當我看得入神，睡意亦開始侵蝕我既精神，慢慢地，我再支撐不住眼皮，進入夢鄉