那些年，當香港仲係百鬼夜行既時代: 9.東華義莊III—聚陽陣

搞完一輪，都已經成六點幾，雖然我同黑仔晏就都無跟大隊返學校食午餐，但係我地一啲都唔肚餓...肚餓既感覺已經比強 烈既緊張感所取代。唯獨義莊張仲大口大口咁對住D死屍食免治牛肉飯。 「嘔...嘔...」見佢食得咁滋味，黑仔嘔埋出黎。「佢D飯D免治牛肉同死屍爛左既肉有咩分別呀....」 我望下佢D牛肉，又望下死屍D肉。「嘔...嘔...」我應唔到黑仔，因為我都嘔埋一份。 「亥時到!」係酉時(5PM-7PM)開始嘔既我地，到左呢刻已經乜都嘔乾淨哂。 只見義莊張叫完一聲，佢就走左去東華義莊一間細房入邊拎野。 個時電燈雖然開始普及，但係呢間義莊仲係唔知點解用緊燭台去照明。 我再望望右望望，突然，眼角見到一個十分高大既身影企左係黑仔隔離! 我下意識想大叫黑仔小心，但係黑仔已經見到個黑影，「嘩!!!」 佢嚇到成個人彈起，仲撞到前面放燭台既枱。黑影忽消。 「你地又搞咩呀!?」義莊張把聲又出返黎。 唔通頭先個身影係佢?無理由丫，佢無咁高架喎，又無咁大隻架! 正當我想問佢個時，佢塞左D野入我手中。「拎住啦，等我搬返起張枱先啦。」 係黑暗中，我只在意我頭先見到D咩，而無介意到底義莊張比咩我拎住。只係覺得件野都幾大，但係又幾輕。 到義莊張點返光個燭台，我先有時間研究義莊張比左D咩我。 慘白既面色，紅卜卜既兩頰，紫藍色既中山裝，頭戴POP帽，唔係紙扎公仔又是何物!?我立時合眼，並且一手掉左佢。 「嘩唔好搞我呀我無辜架大佬!!」見完黑影又見呢D，仲要幾乎咀到埋去，我真係嚇到一身冷汗。 「好貴架隻童子!你竟然掉左佢..」義莊張一手接住隻紙扎公仔，一手打落我個頭到。 比人打左鎚，成個人即時無咁驚，因為至少有人打我，而唔係只係得一堆黑影同紙扎公仔陪我。 「咁驚係咁架啦....」 「好彩無爛...快D幫下手啦，亥時一過就無行架啦!」 「哦哦...」我當然唯唯諾諾答應，因為快D搞掂快D走。 義莊張熟頭熟路咁放好隻「童子」係義莊既右邊。 轉頭又同我講，「搬埋其餘D人仔出黎，我要開壇。」 我招呼埋黑仔，入左去間細房搬。 一踏入間房，我就覺得有幾十對眼望住我咁。 仔細用力睇睇，「嘩!呢到有無一百隻紙扎公仔呀!?」黑仔未等我驚完，已經大成叫左出黎。 「隔離房新買個幾隻先岩呀細路!!」可能聽到黑仔大叫，所以義莊張就係出面就提醒我地入錯房。 「走啦走啦，都話唔係呢間。」 我同黑仔快快手係另外唯一一間房搬多三隻公仔出黎，途中再經過個間紙扎公仔房，但係我地都唔敢再望入去。 出左義莊正廳，分別安放左佢地係左邊，左下同右上。 「黑D個個企右下，白D個個企左上。」 「一陣見到咩都唔好出聲，知唔知!?」義莊張根本都唔係想問我地知唔知，因為我地都未答佢，佢就開始講D九唔搭七八 既野。後尾先知，原來呢D就係請神。 「萬年人世，天道為尊。鎮鬼殺鬼，非我願之。此鬼為善，蒙求引路。輪迴三世，奈何橋上。以童子為餌，暪黑白無常， 望能直抵陰陽!奉請翊聖雷霆驅魔辟邪鎮宅賜福帝君 !」