我拜左宇文將為師呢單野呢,黑仔係知既。我已經練到可以隨心開天眼,佢都係知既。 所以當我同佢講呢度有鬼個時佢個樣刷哂一聲白哂。仲嚇到火機都跌埋。 我當然唔想比其他人知道呢到有鬼,我當堂大力拍落黑仔到,「楂火機都楂唔穏!未老先衰呀!?」黑仔無比咩反應我,只刻走 左去我後邊。「唉我同豬肉榮搞啦。」豬肉榮係個班人入邊既其中一個,佢個名有個榮字,所以我地叫佢做豬肉榮。 就當再去望隻女鬼時,佢已經唔見左。師父同我講過,有時鬼都有好奇心,想知你咁大班人做咩。只要我地唔去搞佢地就得。 唉,我唯有當呢隻女鬼真係好有好奇心啦。千其唔好有咩事呀.... 爐好快就透著左,大家都好開心咁燒野食。而我就比幾個男仔拉走左,話去廁所。其實我地只係夾計諗住扮失蹤,好等出邊仲好 天真咁燒緊野食既個班人黎搵我地,再到時,我地就扮鬼嚇其中一個女仔,再之後...嘿嘿嘿。 我當時都無忌憚隻女鬼,咁係因為我開過天眼睇,附近除左有少少陰之外,根本就無鬼,所以好自然地,我都扮埋一份去嚇人。 等左半個鐘,企係嘉賢臺入口做探子既黑仔話,終於見到佢地黎搵我地。我地個時已經準備好哂所有既野,只等主角出場。 男主角,野人。同女主角,可盈都出現,睇黎按計劃進行就得。咦,雨瑤原來都跟埋黎。佢今日著住一件T SHIRT,著條短裙, 真係好靚。  「唔好掛住望啦,去啦。」黑仔拍一下我。 黑仔一下拍落黎,我立即返黎現實。 我地個計劃就係扮下鬼叫,用燈光效果,人影嚇佢地。 「HEHE,哥哥黎陪我玩啦~」黑仔扮聲係有D料到喎!扮到咁似既!? 「一仔...一仔..你聽唔聽到有人講野...?」 「咪扮啦,你真係扮得...」 「我未開口架...真係未開呀!」黑仔眼神充滿恐懼,冷汗又係佢既額頭滲出黎。 唔對路,黑仔個樣唔似講大話。 我猛然用開天眼望返魚貫入黎,由野人打頭陣既隊伍。心即刻涼左一半。 玩出禍啦。 我所望到既場境十分詭異。野人既隊伍兩人為一排,分為兩排筆直地前進,而兩邊,就有一大班既鬼向佢地下跪。 應該話,D鬼係向野人對頭方向既一架8人大轎下跪。而係轎前面有兩隻鬼拎住兩面好大既牌。上面寫住王府出嫁。 「叫停佢地!唔好再行入去!我地撞到鬼嫁啦!」