師父好快咁結左個手印,再用打火機燒D符,然後將燒緊既符逐個逐個咁塞入去黑仔佢地個樽入邊。 「好,快D對個樽呼氣!」師父厲聲咁對黑仔佢地三個講,而黑仔佢地三個都依言呼氣。 明明個樽係透明既,但係當黑仔佢地一呼氣入去,當堂變左黑色!但係以豬肉榮手持既樽入邊既黑黑得最深。佢既黑係黑到反光。黑仔同另一個朋友既黑,就黑得黎有少少透明,就好似用好多既水黎溝稀既墨汁既顏色。 「叔叔!佢地暈左丫!」可盈突然尖叫起上黎。我另轉頭,見到黑仔佢地全部合埋哂眼,頭向下垂。 「佢地生魂同女鬼既魂惡鬥完,自然需要休息,唔好打搞佢地。」師父望都唔望下佢地,佢仍然自己係廳一個箱到摷野。 「先收魂,後再魄。」師父有意無意地講左呢句說話。我知佢係教緊我野。我目不轉睛咁望住師父跟住落黎既動作。 只見師父收左豬肉榮既樽,再放一隻公仔埋樽口。隻公仔只有手掌咁,係一隻女布娃娃,身上邊著住一套白色連身裙,手就拎住一把白色遮,而口唇就有少少粉紅色。雖則隻公仔眼大大,但係佢既笑容又好奇怪。就好似陰陰咀咁笑,望得耐我都有D不寒而慄。 「轉輪慈王,煉化九道 ,統領萬鬼,萬物莫視!人間惡鬼,不得留停,天旨勿違,今上告之!再請十殿轉輪王急收鬼! 」 師父猛然對公仔喝出一句,就係呢個時候,樽入邊既黑氣竟然比隻女娃娃吸收緊!隻娃娃慢慢開始變黑...佢既白色遮慢慢變成灰色..再慢慢變色黑色!唔單止,佢既眼白亦變左向血紅色,變到同眼珠完全唔同既色!原本眼神柔和既娃娃,因為眼睛顏色既變化而變得相當怪異...就好似..我地係嘉賢臺見到既女鬼咁樣! 「一仔,你見到既女鬼係咪咁既樣?」師父低聲問道。 我點點頭,「係,但係隻鬼無帶遮既。」 「呵呵,遮唔關事,呢隻公仔咁岩本身有把遮姐。」 當樽既黑氣比隻娃娃悉數吸盡既時候,娃娃隻眼好似眨左一下。 「師父佢隻眼...」 「我岩岩收左佢個魂入公仔佢隻眼就識郁,睇黎都真係幾猛。」師父嘆左一口氣,繼續道:「點解會咁大怨氣?點解死左都唔肯放過人?唉...」 師父放低左隻娃娃係一張茶几上,同時左右手拎起黑仔同埋另一個朋友既黑樽。再同時放過去娃娃既身邊。娃娃真係仲竟然吸收,本來頭髮短短既娃娃,呢刻竟然慢慢變左長髮! 唔單止,佢咀唇既顏色竟然慢慢變得鮮紅..好似可以流出血黎咁.... 隻娃娃又再眨一眨佢自己隻眼。但係我無理,我只係死命咁盯住個兩個樽。因為師父既然話得佢猛,眨眼當然唔會係佢唯一既板斧。眨眼其實根本唔需要驚。 個兩個樽既黑氣開始慢慢變淡,到最後,完全透明。 「小女子身世咁可憐,你竟然咁忍心離我而去...唔好走呀!留低陪我一生一世!!!一!生!一!世!!」

隻娃娃竟然開口尖叫!