三日好快就過去。我同雨瑤係中間個幾日出過一次街。阿雪無再出現。所有野都好正常。我依約係晏就三點就去到嘉賢臺等師父。 但係當我仲行緊上去嘉賢臺既時候,我已經聽到師父既聲,好似同人傾緊計咁。 「哼,大白早竟然都想嚇人,你睇黎真係死性不改,慣犯黎架啦喎。本來我仲諗緊好唔好收左你定度左你就算,估唔到要逼我鎮你!」 「師父!」我急忙跑上去嘉賢臺既個塊小空地到。 「阿一!唔好過黎!呢隻野冥頑不靈!我要鎮佢!」師父一手拎住張符,一手舉高,算係阻止我過黎。佢?哦,我見到啦!同師父相峙既原來就係個隻女鬼! 「一方極樂,三界侍衛,五方鬼帝,九重天神,急鎮惡鬼,以吾之身為引,急迎北陰酆都中鬼帝!」 語音一落,頓時陰風四起,樹葉被吹到周圍都係。雖然依家係下午三點,但係無啦啦天竟然開始黑。呢個形勢同師父當年係東華義莊請南方鬼帝一樣。 黑暗中,嘉賢臺既小平台上邊只有兩個身影,一個係我師父,另一個係一個著住一套清裝既女人。 呼呼呼,陰風不停吹,我唔敢靠近師父一步,我怕會打擾到佢。 「就憑你這個小道士就想滅我正一品領政廳長!?天佑大清!我是不會那麼容易就讓你們這幫反賊成功的!八旗軍!起陣!」女鬼仰天大笑,仲要講D唔咸唔淡既普通話。我一啲都唔明佢講咩。但係只見佢講完,一堆小鬼就三五成群咁衝哂出黎,仲圍住師父不停轉。 「區區小鬼竟如斯膽大!」師父怒目望住隻女鬼,大喝一句。及後又係衣服中抽出一黑一白既東西,「眾黑白無常,執刑鬼領命!活捉來人!」 倏地,師父附近地下突然出現左好多個人頭,我認得出,佢地有D就係係東華義莊追殺過我七爺八爺。 女鬼既鬼仔同師父既黑白無常,執刑鬼打埋一齊,頓時笠笠咁亂。有好幾隻女鬼既鬼仔想衝過黎我到,但係都比出黎睇熱鬧既阿雪嚇走左。我甚至睇睇下有D悶。睇鬼打交同睇人打交差唔多。鬼打交無血出,消失左就姐係死左。我見到係個班七爺八爺中有幾個特別高大,有時一打三都好輕鬆。而女鬼同師父身邊都有8隻鬼圍住佢地自身。不過其實最悶既係,D鬼黎黎去去個係個招,好似個個都係同一個模出黎。 「阿雪丫,點解佢地個人隔離有鬼圍住既?」 「哦,當佢地運用既鬼仔幫佢手既時候,佢地係唔可以郁,只可以專心致志咁控佢地。隻女鬼驚你出手偷襲佢,所以放D鬼係隔離做護法,而你師父怕隻女鬼仲有幫手,所以都放幾隻係到做護法囉。」阿雪笑嘻嘻咁同我講。 「咁點解佢地黎黎去去都係個幾招打人既方法?」 「佢地係要運用佢地自身既精神力去操控D鬼,愈多鬼,佢地就愈難控,咁仲點可能分心叫甲鬼出咩招,乙鬼出咩招丫。」 唉,連阿雪知既野都多過我,我真係..唉。 「八旗護法!上場!」女鬼忽然尖叫一聲。 只見佢手邊八個陰影都同時郁起上黎,目標只有得一個!就係我師父! 一隻高大少少,條脷好長既白無無常想衝去擋住個幾隻咩護法。 點知頭先係鬼戰場上殺鬼無數既謝必安竟然比個幾個護法一掌打死! 我結舌瞠目,驚訝個幾隻鬼既真正實力。呢個時候,只見八個身穿黃色,鑲黃邊,白色, 鑲白邊,紅色,鑲紅邊,藍色 鑲藍邊鐵甲既鬼擊殺左白無常之後,依然向住我師父疾衝!