那些年，當香港仲係百鬼夜行既時代: 7. 達德小學VI --蠱師

我手持鐵棍向前沖去。我瞄準住飛頭蠻隻眼插去。飛頭蠻十分靈活，去左一退，靈巧地避開左我呢個致命既一擊!哼，我上官一係中學打交多過食生菜，我一早估到你會避到啦!你向我左邊退算你失策啦!我手持自製網既左手以迅雷不及掩耳既速度出手。正當我信心滿滿可以一舉擒獲佢個時，佢竟然向上升起左!

我立即停低，轉身，對佢怒目而視。佢都不遑多讓，向我報以一個詭魅既微笑。我再度舞棍前奔。今次我係以打爛仔交既方法去應戰。我將手中既棍向前扔去，鐺的一聲，棍落地。飛頭蠻果然係以向左退既方法避開支棍。棍雖不中，但係拳頭已到。一拳打出。一股強大既反作用力自拳頭傳送到我既手臂上，我無退，隻飛頭蠻都無退，我既拳頭就深深陷入佢既眼窩裏。 我無諗咁多，我左手再次遞出!手中既網就如一隻老鷹，而飛頭蠻就係隻束手就擒既雞仔。老鷹來勢凌厲，但係隻飛頭蠻竟然係呢刻再度後退。原來佢知我既拳頭唔足以令佢致命，網就會。呸!區區一隻飛頭蠻既然計算得如此周到。我又隨手執返一隻長棍。係我眼中，呢枝棍就趙子雲既纓槍，一枝可以收死飛頭蠻既霸王槍。 我用舉起長棍，準備再次進攻。豈料我竟然見到有個網笠住左飛頭蠻。原來係雨瑤。 「喂我笠住左佢啦!」雨瑤興奮咁大叫，同頭先係到喊既樣恍如兩人。 我都無再停留，身影一動，三步併作兩步到左隻飛頭蠻既跟前。隻飛頭蠻死死咁盯住我，眼中有一絲絲既怨氣。佢好似想靠眼神食左我咁。 「比我丫阿瑤。你望咩姐死人頭!」我用手掌大力拍落隻飛頭蠻天靈蓋到。「喂!出黎啦!我捉住左你個頭呀!」我企係操場既中間，拎住個頭向四周大叫。 「你地竟斗膽入黎我地既結界仲要傷害蠻兒!不知天高地厚!」就係我亂叫個時，一把渾厚，聲如洪鐘既聲係我後邊響起。 「哼，肯出黎啦....嘩，做咩咁多蟲架!?」伴隨住把聲出現既竟然係一個類似印度人既人，講唔係好正既中文，滿身符紋，仲要腳底下有一堆不知明既蟲。D蟲係佢腳爬下爬下，發出歷歷沙沙既聲。我仲見到有幾條蜈蚣係佢身上爬，但佢好似滿不在乎咁。 「蠱師同降頭師係不容其他人侮辱!百蟲，用你地既性命黎捍衛我地既尊嚴! !」