光陰似箭呢句話真係一句名言。,十年前既我仲係一個咩都唔識,岩岩中學畢業既細路。十年後回顧返當天,真係有好多感觸,又覺得D事好似都係岩岩發生咁,東華義莊巧遇師父,嘉賢臺同雨瑤結緣,達德一戰等等...依家既我同雨瑤已經結左婚,雨瑤都學左些少既道法,當然佢就唔係正式拜入御鬼門,只係師父有教下佢點寫下D最簡單既符,點防範下小鬼咁。 呢十年,我除左返份牛工外,我都繼續我既修行。我決定承襲我師父既拿手絕活,符咒學同請神術,另外再外加陣法,三者互相協調。符咒學同請神術師父都可以指導我,但係陣法就要我自己鑽研。而基本上,我都係一個幾懶既人,所以陣法方面我係無咩進展。 1988年,春。師父依然住係西環,而我同雨瑤就係香港仔買左層樓一齊住。 「上官太,我出門口啦!」我艱難地開門,準備去師父屋企。雖然天氣開始回暖,但係雨瑤都係要逼我著到成隻粽咁先可以出街,所以搞到我連開門都有D問題。 香港仔有專線小巴去到西環,所以好快,我就出現係師父屋企。師父雖然已經六十幾歲,但係因為長期練內外功,所以無論外貌同身體機能仲係好似一個四,五十歲既中年人咁上下。 一入屋,師父示意我坐低,面情沉重咁開口道:「一仔,你二師叔已經大約搵到劉伯溫個墓,所以我同一班師叔會去行一轉。你就唔好跟黎啦,呢淌既混水你無必要趕上。」

「下,唔得!多個人多一分戰力呀師父!我都要去!」我心知師父佢地係抱住必死既決心,將生死置於度外,所以心境係極其豁達,轉個詞黎講,就係即係唔冷靜。我點可能睇住師父佢地係咁情況下同一個咁厲害既人物正面對決呢!? 「唔得!你未成氣候!你要再潛修下先!」師父一下子就打消左我呢個念頭,仲不耐煩地揮一揮手,示意我唔好再諗可唔可以跟埋去。我知道師父決定左既野,就一定唔會變,佢唔比我光明正大咁跟去,我就一定唔可以去。咁好,我偷偷地跟去囉。 我既然要偷偷地跟埋去,我自然需要知道時間同地點,「師父,咁你地去邊又會幾時去?」 「鎖羅盤,呢幾日內就會出發。」師父有心唔比我知準確時間,但係礙於一個修道之人不屑講大話,所以唯有含糊其詞。 鎖羅盤,原名鎖腦盆。係一個位於新界東北既地方。相傳呢到有一條曾經係住滿人,人才濟濟既村莊,但係有一日,有一對外出打工既兄弟返黎探親,竟然發現所有村民都同時消失哂,條村好似本身就係無人住咁!呢個傳聞出左黎之後,有人話班村民只係搬走左啫,唔通一世住係D村入邊咩,嗯,呢個推測合理。既然係搬屋,自然就會將將屋入邊既野都搬走架啦,但係有行山客竟然發現,鎖羅盤村入邊既村屋竟然原封不動!傢私...擺設...公仔...甚至有本做到一半既小四作業簿,但係成件事中最弔詭既就係...佢地發現,所有村屋既鐘都係不約而同地停左係三點三個到...唔通...半夜三點三...冤魂索命,無常爺將成條村既人通通押返地府受刑,一個活口不留...?到現時為止都係無人知到底真相係點。我都唔例外。 我既然知道左個個地方係咁難纏,自然我就要準備一下架啦。係師父屋企修左一陣符法,練左一陣請神,我就推塘師父話有事,今日唔練要走先。 我要去邊?我自然係要準備下幾日後要幫師父既用品啦。去四師叔到拎?去無相師叔到咪姐係話比師父知我會跟埋佢地去,傻架咩。 我其實依家係要趕入上水。因為上水有香港唯一一個鬼市。