那些年，當香港仲係百鬼夜行既時代: 5. 鎖羅盤III – 惡鬥II

無相師叔請水神水德星君上身，並將手中既藍色符向前擲出!頓時，我覺得我自己好似身處係沙灘上，聽到海浪拍岸既聲，亦聞到海水既味道。為首既食火鬼識意想到要避，等後邊既吸水鬼頂上去擋，可惜太遲。 無相師叔既符已經化作一道又一道快速既浪，密如洪水既浪花直接打左係食火鬼身上。只聽到食火鬼一聲慘叫，我見到佢火紅色既身體慢慢暗淡落黎，就知道，佢玩完了。 五行鬼陣中，其中一行就咁就玩完。會唔會太簡單呢?劉伯溫份人咁奸....會唔會中間有詐...? 「哼，仲以為五行鬼陣有咩咁厲害，原來都係不堪一擊!哈哈哈...」無相師叔為人豪爽，佢無咩機心，所以唔覺中間有詐係正常。我望一望劉伯溫既表情。 佢個表情竟然係有D訝異，佢仿彿唔相信單憑師叔既一張洪水符就擊殺左佢其中一隻陣腳。嗯?唔通佢真係無諗到師叔們實力係如此厲害!? 「區區一陣食火鬼當然唔會打得嬴你地啦。老夫讓下你地姐。餓鬼刑殺四方!」劉伯溫再次下令只有四餓鬼既五行鬼陣出擊。哦，今次佢醒啦，佢將四鬼平排放，除左令我地唔知佢邊隻鬼係殺著，亦都係防守方面更易協調。 「攻佢木鬼，佢無左火幫佢地擋!」無相師叔提醒師父，師父立即散功。講起又奇怪，師父今次散功散得非常快。應該係五陽大陣既幫手，個陣可以催旺五行力量，幫助師父可以更快散走五行之力。師父就係散完功之後，同企係對面既二師叔換一換左方位。 「天雷滅頂，橫空出世，五行無上，以金為勢!奉請西方太白金德真君!」師父再次請神上身。今次請既係金神。 師父又緊接再甩出手中一張帶有些微反光既符，個張，就係頑金符，但係既然係我師叔特製既，效果一定比一般頑金符強得多。 「九九輪轉，凶者必滅，天地合我，暫借天上天下雷火!離!」神雷火符破空而出!由師父借用神力而驅動既神雷火符果然不同凡響，只見語音剛落，天上就滿佈陰雲，就黎要落雨咁。須臾間，仲打起雷上黎。雷聲隆隆作響，其聲之巨大實在不下於飛機係隔離起飛咁。 嘭一聲!突然一道極粗既閃雷係從天而降，直直打中五行鬼陣既所有餓鬼，同時亦打中埋劉伯溫!雖然呢一下有毀天滅地既力量包含其中，甚至我覺得食火鬼係到都擋唔住，但係劉伯溫同三隻餓鬼就硬生生咁挺過左。唯獨一隻木鬼化作一縷白煙，灰飛煙滅。 「再黎!萬物踏土，土生五行，五行無上，以土為終!迎請中央鎮星土德真君!」無相師叔唔等師父散功，送神走，佢已經直接提符上馬，同大師叔換一換方位，再請五炁真君既土德真君上場。 「土生萬物，四方極土，九方土地，鎮守大地!震!」成個過程去得太快，我都唔知無相師叔甩出左一張咩符，我只係發覺我所企既地下不停震，甚至有D位震出一啲裂縫出黎! 我一眼關七，立時就留意到係吸水鬼既腳下既土地突然一分為二，吸水鬼就立即墜入一隻猛獸既口中，此生此世都唔會再出現係人間界。 我又望向劉伯溫既方向，佢面如死灰，睇怕佢今次殺手鐧出得太早，比人一一剋死哂啦。 當係水鬼完全沒入大地既窟窿時，劉伯溫突然大喊一聲，「算啦!走!君子報仇，十年未晚!」佢身影一動，直接往鎖羅盤村既方向逃去。 「帝師兄，王希師兄，拜託你地清除一下附近比劉伯溫害死既鬼魂同埋佢用黎守自己棺既守魂，再入墓破佢肉身，我地去追佢，等我地纏住佢令佢無時間返黎救自己肉身，幫你地爭取多D時間!」 如果要殺死一隻可以修煉到肉身不壞，三魂七魄俱在既鬼，咁就一定要先破佢既肉身，再破佢既元魂。所以師父決定同其餘兩位同墓有更多認識既師叔分工。 「一，跟住我同無相，我地要幫帝師兄同王希師兄爭取多啲時間!」 我點點頭，跟住師父同無相師叔後邊，就開始向鎖羅盤死村跑。