火之最者,燎原火。我腦海忽然泛出一句說話。呢句說話係師父係初教我火行術既時候講既。唔通我岩岩真係使出左燎原火!? 嗯,雖則我好想搞清楚到底係咩一回事,但係依家唔係諗呢啲野既時候!我應該盡快返去救左師父先! 我收拾心情,將震驚既情緒收起,準備再同師父並肩作戰,燎原火一事,係我幫師父打走左劉伯溫先再問都未遲。接下黎,因為唔使再一路閃避敵人既關係,我好快就返到師父個到。係遠處我見到師父氣喘不斷,大汗淋漓,而星宿都只係圍住係佢十步而內既範圍,數量都由原本既十六隻銳減至六隻。師父既法力始終唔會有一眾神獸咁深厚,睇黎師父會隨時就頂唔順。 見到師父既情況,我無立即衝入戰場,而係躲係一間村屋中。我唔係貪生怕死,而係我要準備請火德真君上身,再一口氣打出三張燎原火符!我兵行險著,希望以燎原火呢種自然之力同三神一戰。 我開始運氣,慢慢地結好手印,憑記憶踏出罡步。左三步,右兩步,前三步...我小心翼翼咁踏出每一腳,因為稍有差池,我就隨時會喚神失敗,比神力反噬。 「火海無邪,燚滅眾妖,五行無上,以火為道!奉請南方熒惑火德真君!」 一般請土地之類既小神上身呢係無咩感覺,但係今次請呢個最古老既神衹之一,我就可以感受到一股好強大既靈力源源不絕咁灌入身體中。係依刻,我個頭十分痛,痛到好似就黎裂開咁,我諗係因為個一股只屬於神既力量就要降臨吧。身體亦到好似全身比火燒緊咁,好熱,熱到就黎要溶啦!我終於知道師父點解每次請呢種大神上身後都唔可以再郁,因為當一個凡人得到呢股神力之後,佢可以保持清醒已經係極限。 我終於抵受唔到個股咁霸道既力量,眼前景物開始有D模糊起黎。 我好熱,頭好痛...我係咪就黎要死啦?但係...但係我唔救師父就無人救到佢架啦喎...我唔可以死架.... 「奎木狼,鬼金羊,擋住玄武!」 點解會咁!?無相死左,到依家連徒弟仔都唔知去左邊。係大霧中操控住六隻動物同三隻謎之生物作戰既中年人心暗忖。 被指派去擋住一隻烏龜般既生物既奎木狼同鬼金羊同時發出一聲低嗚既慘叫聲。佢地活生生咁比隻大烏龜一巴掌拍死了。 無啦,我已經無辦法再運靈力去再眾集星宿。該名中年人係嘆息既同時,又勉力避開左一道從天而來既火焰。個道火焰係由天上其中一隻謎之生物使出的,而個隻生物就好似一隻大雀咁。 中年人審視一下戰場。 會輸下話?唉,其實輸一次半次有咩所謂?但係今次一輸就連自己條命仔都輸埋,真係有D唔甘心。唔單止,如果真係阻止唔到漂係空既劉伯溫的話,相信死既人唔止我一個。 中年人抽出兩張反出金色光芒既符。中年人好似下定決心咁,緊握手中既符,對住佢身邊既動物低喝,「全部同我一齊上!」 既入絕境,何不黎個絕處逢生? 中年人身影倏地消失,下一次再出現,已經跳到去戰場另一個人--空中既老人--面前。 沉默已久既老人終於開口。「以其人之道還治其人之身。九九輪轉,凶者必滅,天地合我,暫借天上天下雷火!離!」 天上突然劈下一道天雷,中年人係毫無防備之下比道雷打中。中年人既身軀當下好似斷線紙鳶咁向下飛墜。 「踫!」