那些年，當香港仲係百鬼夜行既時代: 21. 鎖羅盤XIX – 最後

中元二品郝罪地官又簡稱地官。佢統馭世上所有既土地神，可以話係大地之尊。佢比起火德真君級數又要高幾級，直逼十殿轉論王真身咁強。但係師父經過多場大戰，身體未必可以承受到咁強大既神力加持，可惜，我醒起已經太遲，師父已經雙腳跪地，彷彿好似成個人被壓到抖唔到氣，我知，師父正同緊神力爭鬥，嬴左，就可以借用地官既神力，輸左，隨時連自己既生命都會賠上。 「大地為身，物依人附，人間樂土，括盡所有!崩葬!」師父佢手持七張有寫野黃土符。即使跪係地下黎，師父依然可以好有霸氣咁喊出一句。望住師父手中既符紙，我就知師父一早準備左咁做。 語音剛落，四周大地即猛然震動，好似有上千隻上古巨獸不停踏動地下，震到我幾乎連企都企唔到!而墓牆則開始出現裂痕，有啲裂痕甚至由牆腳一路裂，裂到上天花板，睇黎唔使幾耐，成個墓就會崩裂，向內倒塌，如果我地繼續留係到，相信肯定會比大量泥土生葬。師父呢招係一招玉石俱焚既招數，不分敵我咁殺死戰場上所有既敵人。唉師父，葬左劉伯溫好啦，唔好葬埋我同你自己先得架!我實在估唔到師父既決心竟然去到咁大。 「唉，師父，走啦，就冧啦!」我不停猛拍師父既手臂，但係師父無回應到我，依然係保持雙腳跪地，以手支撐身體既樣。我仔細一睇，原來佢已經暈左。睇黎呢一下已經將功力深厚既師父直接抽乾。我馬上抬起師父，朝我地黎既方向就走。唉，仲有D卷宗，仲有兩位師叔既遺體都帶唔走。墓入邊D卷宗唔係咁緊要既姐，條命緊要過個一堆無生氣既字呀!而叔既遺體可以再返黎挖掘返出黎既，相信師叔們都唔會怪我咁做。始終生既比死既重要丫。 師父唔算好重，我一下子就可以將佢抬上我背後，好輕鬆就孭住左佢，腳底抹油，準備走人。 「唔駛旨意走!我死都要搵埋你地黎陪葬!」一直好冷靜咁應戰既劉伯溫，睇黎終於比我地逼瘋，老羞成怒下要拉埋我地落去地府陪佢。你都傻既，我會跑得慢過一個阿伯?雖然我孭住師父，仲兼夾地動山搖姐，但係我假假地都係全港十八區短跑冠軍喎。 但係我跑離劉伯溫唔過十步，我就見到佢既身影係我旁邊出現，下一秒就擋住我回頭個條路。下，有咩理由咁快呀!?殭屍喎!?我低頭望一望佢雙腳。佢腳上穿住一對明朝時代既白布鞋，上邊有幾條淡淡既紋，不過最吊詭既係佢雙腳離地。呵，咁唔怪得之佢快過我，因為我用腳跑，佢用唔知咩野黎飛! 我當下從身中抽出所有剩餘既冰藍水冷符。 「地面萬物，尊水為父，洪洪大水，苦海飄浮!淹!」我再次使出洪水咒。但係今次既洪水咒既目標並唔係劉伯溫，而係墓牆! 墓牆因為抵受唔到靈力既撼動而應聲而爆。靈力組成既洪水將我同師父一同沖走，直往盜洞出口沖!而劉伯溫因為以為我想抗擊佢而飛高避開左呢招，所以無受到牽連。不過就係咁註定佢追我同師父唔到，如果佢一齊被水沖走的話，佢好有可能可以從墓中破土而出，避開師父打出既最強一擊之餘，再回頭收拾我同已經暈左既師父。 隨住洪水既水流，唔使好耐，我就見到湘西花蓮子同埋一眾摸金，發丘人既屍體。而墓牆係呢個時候亦終於大塊大塊咁崩瓦，有幾塊卡車咁大既墓磚仲幾乎砸到我。我已經再聽唔到劉伯溫既聲音，睇怕佢已經唔係比泥土生葬左，就係已經癲左咁搵緊路逃走，唔得閒理我同師父。 水流去到盜洞口個一片死屍到就停住左。我急忙將師父抬上地面，因為唔單止墓天花開始冧，地下亦有大量裂紋，如果再係上邊施加壓力，相信就會跌落下幾層既主墓入邊，以後都見唔到太陽哥哥同月亮姐姐。 好不容易終於上返地面，但係我都唔敢因此而鬆懈。因為我唔知到底劉伯溫個墓有幾大!因為佢個墓一冧，我所企既泥土就會無左支撐，好快就會沉降落去，分分鐘形成一個又一個無底深淵! 我決定向海方向走。根據我學左咁多年墓構，古時既人起墓一定唔會接近海邊，因為怕有地震等事令到墓牆崩裂，海水直接灌入墓中，令死者不能安寧，我相信劉伯溫都明呢個道理而唔會起得太近海邊既。 我一路上抬住師父猛衝，而鎖羅盤村既屋亦開始一間接一間咁倒下來，周圍塵土飛揚，視野極度模糊，我只能夠靠我既記憶，一直往海邊方向衝! 終於，我成功跑到去鎖羅盤村舊時用作出海既一個小碼頭，同時地震都開始暫緩。我輕輕將仍然呼吸緊，但係無左知覺既師父放下，而自己就大字型咁攤係地下。 完結了。我望住正係我頭頂緩緩落下既夕陽。終於所有野都完了。