第二十章:藍地子契顯威風 大街赤龍驅狗靈


(子契篇)香港,不是因為她,根本沒有我回來的價值。我跟宋廣進通過電話知會我回來的原因,亦因我一個家人也沒有,所以要入住預先訂了的酒店暫住。


晚上我便約了詠詩一同在我酒店附近晚飯,也是尖沙咀的一些西餐廳。詠詩又如第一晚在我餐廳重遇一樣,用著一般朋友的態度跟我閒聊。我為了不讓這情況繼續下去,特意跟她討論驅魔的事情。

「詠詩,咁你地除左聽到果啲樹既哀鳴聲,有無話見到咩幻覺或者有人話撞鬼之類既野?」






「咁又無,係之前同你講過半夜好多人發惡夢咁。」


「如果有靈體既話,應該妙法寺都應付到。即使應付唔到都搵到原因,唔會咁無能。今晚我去睇下咩環境先,再睇下點做。」


「好啊,麻煩曬你今次特登番黎。」






「唔好客氣,我都好有興趣知道究竟係咩黎咁犀利。」


晚上十點左右,我們到了藍地。這是屯門最北的地方,位處偏僻,不算繁盛的地方。最核心的可數藍地大街,但十一點後食肆商店也會關門,把整條街顯得有點陰森冷清,詠詩帶我來到藍地最著名的季季紅酒樓裡門前與幾位職員打聽一下。


因為藍地也算是一個小圍村,大部份人都是姓陶,而詠詩也是姓陶的原

居民,所以村中上下也認識她。





「德叔,呢位係黎幫我地既驅魔師,佢一定可以幫到我地條村。你成日係酒樓應該聽到唔少消息。可唔可以話俾我呢位朋友聽,或者佢可以幫到手。」


德叔抽著煙,用了一個如見救星的眼神看著我,問我要不要煙。當然我也不客氣接過道謝後,德叔便開始說:

「大師大師,今次你真係要幫下我地啊!」


我回答說:

「千祈唔好咁講,降魔正道係我地既天職。德叔,我想問下你之前呢到有無發生過類似既事件?」


德叔想了一會,之後說:





「有啊!好似之前隔離富泰都有發生過咁既事啊!」


「富泰?」


詠詩補充說:

「富泰係我地藍地附近既一條公屋村。」


德叔繼續說:

「我聽啲茶客講,早幾個月前又係成個富泰啲樹到半夜又會發出啲哀怨聲。後尾又係搵好多人都幫唔到手,最後好似有個大陸佬收左幾十萬先搞得掂。」






我說:

「大陸佬?收左幾十萬?雖然有本事,但咁大貪?」


「係啊,講普通話架。好似有成四十幾五十萬架,但詳情我就真係唔知。」


又有一個職員甲搭嘴說:

「成五十萬啊!我有個老友住富泰,當時佢話每戶都夾左幾百蚊啊!」

於是詠詩和我隨便在藍地四處逛逛後,等到十二點後再次踏入藍地大街。除了顯得陰森外,更聽到大家所講的哀鳴聲『鳴。。。鳴。。。』」






詠詩說:

「就係呢啲聲喇,真係好恐怖。。。」


我環顧了四周,看不見有什麼鬼魂在附近。我走近其中一棵發出哀鳴聲的樹,當我走近時感受到有一份怨氣,但又不似一般鬼魂的怨氣,究竟是什麼呢?我決定先離開找宋廣進研究一下。


安撫詠詩後,我便約了宋廣進到旺角的酒吧坐下聊聊這狀況。

「宋總管,岩岩我講呢種情況,你都係驅魔師,你有遇過嗎?」


「我睇過一啲驅魔文獻都有類似既case,但我本身就未遇過。」






「咁究竟係咩黎?」


「根據《妖魔紀年》裡面講,呢種係狗靈,會由施法者用法控制死去既狗靈魂做奴隸,但一定唔係普通既施法者,好大可能都係轉世驅魔師先有咁大能力。你今次既case令狗靈附係物件上發出哀鳴聲咁簡單,相信呢個人目的都係求財。」


「咁只要將狗靈趕出樹,我就可以當鬼魂咁對付啦!」


「無錯,所以你既赤龍晶介同地火銀鎗一定卓卓有餘。」


「如果真係轉世驅魔師做啲咁既事,我一定要好好教訓佢!真係枉為轉世驅魔師!宋總管,等我捉到呢個人我再交俾你發落!」


「好啊,咁辛苦你喇子契,飲杯!」


「份內事姐,飲杯!」


第二天晚上我約了詠詩在尖沙咀的酒吧,跟她商討村裡的事。

「詠詩,我已經查到係咩事,亦都搵到方法對付。但我想問,尋晚德叔講果個大陸佬之前你有聽過佢黎藍地?」


「咁又好似未聽過,你懷疑係佢做既?」


「呢個人我相信就係搞出今次呢單野既人,捉唔到佢,即使我幫到今次,佢仍然會去第二度作惡。」


「咁。。。」


「等聽晚我就拆穿佢,順手捉佢番圖騰制裁!」


「嗯,係喇。。。今晚你唔趕時間嗎?」


「唔會,你有事搵我?」


「我懷疑佢好似係出面有第二個。。。」


「佢?你男友?」


「我見佢個whatsapp有約左個女仔上佢屋企食飯,又見到相簿有佢同個女仔既合照。我。。。我唔知啊。。。佢話會同我結婚。。。」


「我只係個外人,好似唔係太方便俾意見。。。」


「你當我無講過啦,cheers。。。」


她是在買醉了,清完一杯又一杯。很快她便七分醉了,所以我扶她上的士送她回藍地。在車中我忍不住把心中所想的對著睡了的她說:

「我地由相識到而家,十一年喇。我從來都無諗過放棄你,而家我地係回憶?定係傷口?我真係認為我地曾經深愛過,曾經動地驚天過,但邊個岩邊個唔岩,係呢刻我真係分唔到。我只係希望你知道其實我五年黎個心一直都無離開過你,將來亦都係,尤其是今次再見番你我知道我永遠都要係你背後愛住你。。。」


她沒有回答我,當然我知道她醉了我才敢跟她說這番話。


「叮噹」,伯母出來應門。她的眼神很差異,我知道為什麼。

「伯母,詠詩飲醉左喇,我送佢番黎。」


「阿基啊,你入黎坐陣啊。」


「哦。。。好啊,世伯呢?」


伯母扶著詠詩一邊上房一邊說:

「世伯佢訓左喇。等我黎得喇,你坐陣先啊。女啊,你做咩飲咁醉啊?」


伯母安頓好詠詩後,拿了兩杯茶跟我坐在客廳,跟我說:

「阿基,有啲說話唔好怪我地老人家多事。」


「伯母唔好咁講。。。」


「其實個女呢口硬心軟,你地既合照佢仲放係房到架其實。」


我一聽,心裡不禁一戚,她心裡還有我嗎?但我沒有作聲,伯母繼續說:

「你地分手後呢五年佢雖然成日都有新既男朋友帶番黎見,但始終睇個款都係啲花花公子,但佢又唔聽我地講。」


「伯母,我只係想詠詩可以開開心心咁生活,如果佢有事,我為佢死都可

以。」


「唉,對唔住喇阿基,你對我個女咁好,佢就咁對你。。。」


「唔好講呢啲喇伯母,其實今次詠詩搵我係想我幫你地手解決條村鬧鬼既

事。」


「原來你識捉鬼架?」


「其實我係驅魔師黎,既然今晚我都入左黎,就今晚搞掂佢!」


「阿基,但你好似都飲左唔少,洗唔洗。。。」


「放心伯母,飲左酒我更加勁啊,哈哈!我行先喇,聽晚就會無事架喇!」


深夜一點,藍地大街已經靜了很多。我沿著一直走到福亨村路和藍地大街的交界,這邊的哀嗚聲聽上去更加密度高,相信那個人也在附近。路中間,鳥無人煙,陰風陣陣,哀鳴遍野,我把左手握成拳頭,蹲下將左拳的赤龍晶介直衝向地面。我大喊:

「赤龍,出黎!」


一條赤紅的飛龍從地面飛出來,在半天龍嘯一聲,我繼續說:

「飛向啲樹將狗靈趕出黎!」


赤龍如我所言飛向樹木,穿過我身邊不少的樹,很淒厲的哀鳴聲,我知道狗靈都受傷了。果然看見不少黑色狗的形狀鬼魂從樹幹跑出來,我立即喊著:

「追殺佢地!一隻都唔好俾佢地走甩!」


狗靈們四出撲來,最少三四十隻從四方各面出現。雖然牠們動作敏捷,但我的赤龍也威猛了得,不斷窮追猛打。黑影重重,狗靈數量雖多,但始終赤龍威力更大,戰事再落去也看得出勝負已定。


在這時,一個男人突然跑出來,搖著他手上的搖鈴。「叮叮,噹噹。。。」狗靈們好像從搖鈴中得到指示,全部也通通遠離赤龍往藍地大街的出口處跑著。


所謂窮寇莫追,我立即說:

「赤龍番黎!」


之後我當然我不會放過那個搖鈴的人。他好像也有一點點功夫底,跟我拳來腳往幾回合後,他自知不敵。臨急抱腳逃走之際,他跌倒在地上,我沒有錯失時機將他抓住,按他在地上,說:

「你係咩人?點解識控制狗靈?快啲講啊!」


男人掙扎著,用普通話說:
「快點放開我!我叫你快點放開我!不然我哥來了,你的命就死定了!」
已有 0 人追稿