在夢境與少女相遇後有壞人殺死了我: 第07章 (19)
離開房間，我馬上拉著日來晴下樓梯。
「日來晴，藍藍兩母女係邊層？帶我去。」我緊急說，腳步一級級下落。
「佢地……係六樓登船層。少爺，你真係要去？」他問，緊隨著我。
「廢話。」我說，「仲有，到底發生咩事？」
「聽講好似係，藍藍小姐帶媽媽落七樓，諗住去船頭甲板度，曬下太陽。」日來晴說。
「點知佢媽媽一直咳，一直咳，中途比一個非常講究衛生既先生見到，話佢係度散播病菌，會令好多貴族名流受感染，要求佢立即落船。」
「痴線，唔比人咳？」我問。
「而且又會咁啱，一帶媽媽出黎就有事。」我抱有疑問，「會唔會薇薇叫紅毛搞出黎呢？」
「關薇薇小姐咩事？」日來晴無知地問，又繼續說，「要知道，銀達尼號上面，真係集中左好多，世界上最有影響力嗰 1% 既人。」
「佢地如果出左咩事，真係好大鑊。財經界、演藝界、建築界、世界政治等等，都會受到影響。」
「而且有錢人係最愛命，最驚無啦啦染絕症，哩啲風險梗係可免則免。」
「咁點解去左六樓？」我心急問，雙腳一直下梯級。
「因為有警衛幫手執野，想逼佢地落船，然後先至開船。」
聊著，我們已經到了六樓，這是上落船用的登船層。
眼前是接待處，那裡圍了一大堆貴客，以藍藍兩母女為中心。
「唔好趕我地落船。」藍藍懇求，雙手緊抱行李，不想被警衛取走。
「我都話，退番船飛既錢比你，等你可以去撘其他輪船咯。你做咩咁厚面皮，賴死唔肯走啫？」一位穿燕尾服的紳士問。
「就係佢搞事？」我問日來晴。
「唔止。」日來晴答。
「我知喇，肯定係嫌錢少。」紳士旁邊的肥胖女士，用黑蕾絲扇子，半掩著臉說，「聽講啲窮人有好多招，屈到盡先肯算數。」
「窮人點屈都唔夠你班 PK 屈得多啦。」我很衝動，卻遠遠就被日來晴拉住。
「少爺，冷靜啲，你想做乜？」他緊張地問，手拉住我不放。
「係咪嫌錢少啊？我再加啲當係補償，100英鎊夠唔夠？」紳士問，從西裝袋裡拿出紙幣。
「唔係啊。」藍藍一臉委屈，抱著媽媽，「我媽媽趕住去美國睇病，下一班船都唔知幾時先有，哩度我地人生路不熟，落左船我地就冇地方住架喇。」
「我知喇，佢仲嫌唔夠，想要埋住宿費，咁比夠200英鎊人地啦。」肥胖女士用扇子掩臉，裝作輕聲地說。
「或者係人地冇落台階呢！」後面的人索性喊出來。
「我地兩母女，咳咳……，唔係啲……咁既人。」中年母親，臉色發青地說。
四周旁人馬上退後一步，用手掩住鼻口。
「妖你咳就唔好講野啦。」肥胖女士直接尖叫。
「係囉，快啲落船啦，死病鬼。」其他瘦瘦的名媛女士也爭相抱怨。
一時之間，大家不敢靠近。
本來眾人包圍得很近，現在離遠了一點，稍為散開了一點。
我看一看，有沒有認識的人。
「金陰 ‧ 貝多芬都係度。」我驚訝發現，此外，他旁邊還站了一位古板的中年男人。
「金陰！」藍藍欣喜地說，如得救一樣，行近兩步，「幫下我地，幫我地講兩句。」
「你識哩個女仔？」古板男人問，語帶責備。
「老師，你真係識講笑。」金陰神態自若，對求助的她視若無睹。
「唔識就好，記住你今晚仲有鋼琴演出，去到美國仲有比賽。如果你無啦啦識埋啲唔三唔四既人，小心影響你既名聲，同埋前途。」
「係既老師，我一定會小心啲唔三唔四既人。」金陰恭敬地說。
「金陰 ‧ 貝多芬，你……講咩？」藍藍受到驚嚇，手抖震起來。
「頭先你仲話鍾意我。」她滿眼是失望的淚水。
眾多名流貴族隨即議論紛紛，謠言馬上四起。
「吓……堂堂鋼琴才子。」
「原來佢鍾意玩女。」
「原來佢暗地裡係啲咁既人。」
「喂，你亂講啲咩？」金陰瞪大雙眼，咆哮而出。
藍藍嚇懾了一下，被母親護住。
「頭先嗰句，已經夠告你誹謗。一係你即刻落船，一係你就等律師信啦。」金陰在震怒中說。
「警衛，仲唔做野？」古板男人立即要求。
「唔好……唔好……」藍藍和母親搖頭，兩人畏縮又無助。
「係囉，快啲請佢地落船啦，唔好阻住開船。」燕尾服紳士再度發言。
警衛雖然不想靠近，但逼於無奈，也要上前抓她們下船。
首先，是扯她們的行李。他們打算先把行李移交岸上，這樣人就自然會跟著離開。
「唔好，啲行李唔比得你地。」藍藍和媽媽死抱緊行李。
「用警棍啦。」旁人催促，「打一野我唔信佢唔放。」
其餘幾名警衛，右手紛紛拔出腰間的警棍。
太過分，實在太過分。
遠遠看著，拳頭已經握緊，握力愈來愈大。
「日來晴，我忍唔落去。」扯齊西裝背心，我直接邁步出去。
「少爺……」這次，他也拉不住我。
穿過人群，我不客氣地走到警衛身邊。
「小姐，唔好要我地難做。」警衛對藍藍作最後通牒。
「佢地係本大少既客人。」我嚴正地說，語帶警告地質問，「你地想做乜野？」
「喂，佢係邊個？」「你睇下佢？」旁人眾說紛紛。
「程強……少爺。」警衛立即恭敬地退後兩步。
「今日、聽日、後日，佢地都唔會落船，聽唔聽到？」我清晰地問。
「程強。」藍藍委屈含淚，左手掩嘴，仍哽咽起來。
「但係佢地……」燕尾服紳士和眾人有話要說。
再一次，又一次，我的做法跟以往別無二致。
——牽起藍藍的手，把她護在身後。
「有咩不滿，搵我。」我淚眼，對全世界宣佈。