在夢境與少女相遇後有壞人殺死了我: 第09章 (15)
「如果你有時間聖物，如果係咁……咁我咪可以返到藍藍受傷之前，阻止爆炸發生？」我問。
即使洗走紋身，身體難免留有疤痕，殘餘的輻射都可能對胎兒造成影響。
然而，最簡單、妥善的、最直接讓我找到兇手的做法，就是回到過去，阻止一切發生。
「理論上係可以，但我唔會比你咁做。」日來晴拒絕。
「點解？」我雙手按桌。
「時間聖物唔係比你救女而用。」他一臉莊嚴，「佢需要儲存多年既能量，先可以發動一次。」
「程強，最近我經常不安，預感即將有大事發生，就好似當年天界淪陷咁，我都驚《來族》會被毀滅。」他皺眉地說，「時間聖物，我係要留返黎，係需要挽回一切既時候用。」
「所以……你唔好諗喇。」他再次拒絕。
「晴哥！」我懇求地叫了一聲。
「快啲去探多次藍藍，然後搵春郎，商量出發既事啦。」日來晴還是要把我打發。
離開了族長的房間，我沉著步伐，走去藍藍的療養房。
我喜歡叫那地方做療養房，因為不喜歡隔離兩字。
「點開口好呢？」我躊躇著，「有左BB，但你未生到就可能死左，死之前每次發作都會多1-2%皮膚燒傷，仲有輻射，輻射會侵害身體，同埋影響到其他人，所以要將你隔離。」
不可能直說吧。
白衣姑娘沒有攔截我，讓我繼續沿走廊過去。
「叩叩——」我輕敲房門。
過兩秒，我便扭開門進入，轉身把門關上後，坐到藍藍的右手床邊。
「藍藍，老婆。」我輕輕拍她。
她正在熟睡，臉上敷了些冰藍色的啫哩。
「藍藍。」我再叫兩聲。
看她不醒，我把右手放在她的肚子上，感受一下裡面的小生命。
左手摸摸自己的臉，自己的眼角，有著一些皺紋。
「我已經三十幾歲，已經有幾條眼紋，個樣都殘左，的確……係做爸爸時候。」
「你自己係度……講咩啊？」藍藍朦朧地問，慢慢從熟睡中醒來。
但首先，我要做一個好丈夫。
「傾完嗱？」她從被子中抽出右手，摸著她肚上我的手。
「點啊我？我塊面膜靚唔靚？」她側左臉過來問，「啲姐姐話敷住佢，可以保濕滋潤塊面，同埋冰涼成分可以減少灼痛，皮膚會快啲好返。」
我滴著淚，覺得很愧疚。
「老婆，如果我嗰日冇出到去飲酒，或者我早啲返黎，可能……妳就唔會……」我愧疚地流著淚，流著不止。
「傻啦你，講哩啲。」藍藍虛弱地，體恤著我，「我係水精靈先仲瞓到係度咋，你係風精靈黎，怕火，唔炸死就奇啦。如果你係屋企既話，咪又係我保護你？」
「分分鐘比你累到兩個一齊死埋添啊。」
「依加咪幾好……」她淚眼望我，「你冇事。」
「藍藍……」我彎前攬著她。
「你有左BB，族長話係風水混合精靈，出世之後會屈機不可一世。」
「族長仲話，知道邊度有洗紋身既藥水，晏少少我就可以出發去買。」
「你只要等我返黎，就可以洗走啲紋身。」我一口氣說。
藍藍笑了，又抓緊我摸她肚的手。
「唔怪得之，你偷偷摸我個肚啦。」她明白地說。
「你去啦，我慣左等你。」
「我亦都……」她手有點抖，「信你會返黎。」
「傻豬，我梗係會返黎啦。」我抓緊她的手，左手慢慢撫起她額頭的頭髮，「你唔係以為我會嫌棄你呀嘛？」
「唔知架，你成日都自己走左去，又好夜先返，我點知……你邊次會唔返黎？」她扁嘴兒，把擔心傾訴，「然後一早又出左去，走又唔講聲，你都……唔鍚我lu。」
「趕返工丫嘛，唔係點養老婆大人？」我左手再撫後她額頭的髮，忽然停下，「死，今日未請假添，算啦……都係。」
「你請假先啦，正經事要緊。」藍藍說，拿下我的手。
「咁好啦……比一分鐘我。」我離開床邊，面對著房門口。
右臂把「最」字紋身移上眼周，讓我看到青綠色的靈氣。
「大自然偉大的靈氣，請聽我的呼喚，聚集到我的身前。現在給予汝等一道命令，將以下說話一字不漏傳送給精靈小學校長。」我念念有詞，「和藹可親既校長大人，小弟程強因為遇上恐怖襲擊而暫時前往避難，故此缺席一天，不便之處，有怪莫怪。」
「去啦。」我右手一揮，靈氣集中起來飛送出去。
「呼——」
「搞掂喇老婆。」我拍擦雙手，坐回床邊。
「仲有我未請。」她委屈地看著我。
藍藍是一位幼兒園老師，平時放假在家種種花，彈彈鋼琴。
但如今家中的盆栽和鋼琴，都被摧毀了。
「大自然偉大的靈氣，請聽我的呼喚，聚集到我的身前。現在給予汝等一道命令，將以下說話一字不漏傳送給精靈幼稚園校長。」我重覆地說，「校長你好，我係程強、藍藍既丈夫，想幫佢請病假，係咁。」
說完，藍藍打了我一下。
靈氣就這樣發送出去。
「態度差咁遠既？」她難以置信，氣得不知道說什麼，「我返到去一定要再解釋喇今次。」
「係架。」我單膝跪在地上，上身靠近藍藍，「所以你冇時間亂諗野架喇。」
我手指碰一碰她的鼻子，「好好休息，瞓多陣覺，瞓醒就諗點解釋，你諗下諗下，我就會返左黎。」
「不過，我依加都未去，你唔洗咁擔心。」我說，「首先我要搵左春郎先，佢會同我一齊去。」
「吓佢黎左啊，咁你快啲搵佢啦。」藍藍催促。
「丫仲有，你地諗住去邊度買洗紋身既藥水？」她再問。
「紋身店掛，詳情我要再問問。」我說，掏出腰間的小錢袋，左右搖搖，「總之你老公有錢，你唔洗擔心我買唔到。」
「收起佢啦。」藍藍說，把手收回被子之下，「仲有我要瞓喇，你快啲去搵春郎啦。」
「嗯。」我微起身子，從上親吻她一下，「早抖藍藍。」
接著，我便離開房間，出發去找春郎 ‧ 不覺曉。